4
Pita dali Jon si te kalabus elama, te kaunsil gesabide dolaluali po
1 Te Pita dali Jon si te we bidibolo po ola mobadi, te pris bidi dabe dali, te Moni Lotu Be tempel genuai enesigi bidi kepten dali, te Juda dabe bidi sibi Sadyusi bage dali, augwali te bidi si pageba sabolali. 2 Jisasgo tagala palai bidi sigo te we bidibolo te po wai, “Te Jisas isilama, ma hodaloai. Tibaso, dago koneagameo, te tigidali isibo we bidi ma hodaluaibao,” te po wai. Tama te po baso, te genuai bidi dabe sębę yali. 3 Augwaligo te bidi side sębę elama, nogo bono dunama, kalabus beba muai, piode, te do kigamu po tų dodolainu. 4 Tiali goli, augwali sigo po ola mabo po te odali we bidi te augwali hauwa mugo te po mu konealuali. Tama te bidi dabe nedelama, te namba hauwa mu 5,000 yali.
5 Te sogo kigamu te Juda dabe genuai bidi dabe dali, te nogi elalubo monu dabe dali, te Juda dabego bomo yai po ola mabo bidi dabe dali, augwali Jerusalem buluba sisinagasali. 6 Tama bidi dabe me sisinagasali, te pris bidi tuni bidi, te bidi nogi Anas, te bidi dali, aga hani bidi dabe Kaiafas dali, Jon dali, Aleksander dali, augwali tigidali sisinagasali. 7 Tama te sisinagaselama, i olama, te Jisasgo tagala palai bidi si tomoba dolagasali. Augwaligo augwali sibolo te po hanalu wali, “Magi elama, dage sigo te sągą dwai bidi ma dwagi yai ilaliwe? Mena bomogo aga dwagi yai ilaliwe? Mena nogigo te aga ma dwagi yai ilaliwe?” te po wai.
8 Godigo Dwagi Yai Mobogo te Pita kolesaga pągąna sąyani. Te Pitago te po wei ponoyu te po wai, “Genuai bidi dabe, monu dabe, odao. 9 Dadi sigo te sągą dwai bidi ma dwagi yai ilali baso, dagego da si po tų ebao. 10 Tibaso, dage tigidaligo koneąo, te Israel we bidi dabe tigidali me, dagego koneao, ede te sągą dwai bidi dolalubo, te Nasaret bidi Jisas Kraisgo nogi bomogo e bidi ma dwagi yai ilama, aga sągągo dolalubo. Te bidi Jisas dagego ni pedaide elai bidi da. Tiali goli, Godigo aga gų pagede ma hodolai. 11 Te tiwai Godigo po buku tomode e po asęai elalubao,
‘Dage be sę ebo bidi dabego e masigi sela sąyani.
Tiali goli, megi Godigo te masigibolo genuai nogi
mawai.’* Tib 118:22
Te po page Jisasde po wali. 12 Jisas deligo te da tǫde bidi tau sabo te usu yaibao. Tigidali bulu Godigo da ma dobola sabo sa muani bidi me menio,” Pitago te po wai.
13 Te Pita dali Jon sigo te po tama olama, wi meni baso, te Judago po tų ebo kaunsil bidi dabe noma sai. Augwaligo odai, te bidi si skulba pabe, olo bidi si naga dao, tama tibaso, augwali noma sai. Augwaligo te sogo koneai, te bidi si Jisas dali bidai dao. 14 Tiali goli, te polobadu sągą dwai bidi agai te Pita dali Jon si pąde wiegi yai dolalubo suali. 15 Sulama, te po magi ilama, aiyaba elalugobeo. Tama tibaso, augwaligo Pita de Jon sibolo “Gasa habuba dage si osogo piąo,” wali. Genuai bidi dabe augwa hasi tega si po dodolali. 16 Augwa hasi te po hanalu wai, “Dago te bidi side magi sę yaibawe? Jerusalem tigidali we bidigo koneai, te dwagi yai bomai sę te bidi sigo yali, tama dago mena tama dualogo menio. 17 Tiali goli, te po tigidali we bidi dabebolo pususu bilidali weyu, dago te bidi sibolo te po bomai mu wainao, ‘Dage sigo Jisasgo nogi munu ma pususu pigimio, we bidibolo,’ te tiwai po augwalibolo wainao,” augwaligo te po wai.
18 Te po augwa hasi minama, augwaligo tega si i olama, dolagasali. Augwaligo po bomo elama, augwali sibolo wali, “Dago dage sibolo habu selebao. Dage sigo Jisas nogi ma gasa we bidibolo ola magio, agai po wagio,” te po wai. 19 Tiali goli, Pita dali Jon si dolalubadi, te Pitago te po wei ponoyu te po wai, “Dadi sigo Godigo po tagalama, dagego po wali pobaso, Godigo gedude te dolo yaibawe? Duga digi gedugo dagaliąo. 20 Dadi sigo gedugo suali sę me, odali po me, te dago tagalogobeo,” te po wai. 21-22 Tama te kaunsil dabego me badu bomai sę yabo po tega sibolo ma wai. Tigidali we bidigo Godigo nogi ugwaba siyu bidali, agai bomogo te sągą dwai bidi dwagi yai ma ilai baso. Te bidi agai kibu be bidi si nogo sągą sese te 40 yia silai, tama aga da gesi bidi menio. Tama augwali sigo te sągą dwai bidi dwagi yai ma ilama, tama te we bidi tigidali Godigo nogi ugwaba sobaso, te kaunsilgo ‘Te bidi si dago mena tama elego menio,’ te homu yai. Tama te po olama, augwaligo te bidi si olo tagala palai.
Godigo po odama wali pabo bidi hanigo Godibolo po pusubo bomo sai hagede hanalu wai po
23 Te kaunsil dabe augwaligo te Pita dali Jon si olo tagala palama, tega si augwa si haniba polo pai. Tama sabolama, te po pusa mani, te pris hani genuai bidi dabe dede, monu dabe dedego tamadi wali po. 24 Tama te Godigo po odama wali pabo bidi hani augwaligo te po odama, augwali deli homu ebadi, Godibolo te po wai, “Genuai Bidi, dago sę Tolalubo Bidi, te dagalu dede, tǫ dede, te tamu ąį dede, te augwali tomode bidibo nai tigidali me, nagaduba nigali. 25 Dago wąį Devit, nago sę bidi, tebolo nago Dwagi Yai Mobogo po me deli e tama po wai. Te po obaso, Devitgo te po wai.
‘Gasa bidi hani magi baso moni sębę yaliwe? Te
bagego te sę usu isąwai, augwaligo magi baso hwįgi
pabo homu yaliwe? 26 Te tǫ genuai bidi dabe
dali, te bidi tonalubo bidi dabe augwali deliba
sisinagaselama, sisi yai, te God me, te Godigo sa
muani bidi me, te side hwįabo homu yai,’ * Tib 2:1-2
Devitgo te po wai. 27 Tama te Devitgo polobadu wali po yaligia, augwaligo te sę tamadi yali. Te genuai bidi si, Herot dali, Pontias Pailat dali, e buluba sisinagasali, te gasa bidi hani me, te Israel we bidi me. Augwaligo Jisas dali hwįabo homu yali, te nago dwagi yai tedali sę bidi, te bidi nago polobadu sa muai bidi. 28 Polobadu nago bomogo me, nago homugo me, te po wai, ‘Augwaligo nosali te tigidali sę yaibao,’ wai. Tama tibaso, tamadi augwali sisinagaselama, te tigidali sę yali. 29 Genuai Bidi, augwaligo da elaibao po wai, te po nago odao. Da da, nago sę ebo bidi dabe da. Nago da bomo ilao, tama dago nago po pusubo wi egobeo. 30 We bidigo nago bomo sumainao. Gasi ebo we bidi dwagi yai ma ilao. Da tagala palama, nago dolo sę ebo bidi agai nogide we bidigo polobadu susiąwai bomai sę emainao,” augwaligo te po wai, Godibolo.
31 Te augwaligo Godibolo po olama, silibo si, te sisinagasali bede tǫ mali yai. Godigo Dwagi Yai Mobo augwali kolesagaba asali, tama te sogo gagalama, Godigo po augwaligo pususu pai, wi ebe.
Godigo po wali pabo bidi augwali homu deli yali
32 Te bidi Jisas konealubo we bidi augwali homu deli, kolesaga deli elama, bugagia bidali. Bidi mego “Te nai ena naga dao” po me wabe. Augwali tigidaligo augwa doado bage dobolama, tigidali we bidi usu yai. 33 Jisasgo tagala palai bidi dabego te po tigidali we bidibolo pusai, ‘Genuai Bidi Jisas gų pagede ma hodaluali,’ te po bomai mu. Godigo te Jisas konealubo we bidi tigidalibolo moni dwagi yai sę yali. 34 Augwali tomode me me nai te bage habuge menio. Be page bidigo, tǫ page bidigo me augwaligo te po wai, “Gasa bidigo e nai sabo homu ebaso da, abelagasao.” 35 Abelagaselama, page bidi dabego te masigi selama, te Jisasgo tagala palai bidi dabebolo mani. Augwaligo selama, te nai meni yai we bidi tigidalibolo dobayali.
36 Te augwaligo te tobage sę ebadi, te bidi me deli bidali, agai nogi Josep. Augwaligo nogi me poai, te nogi Barnabas. Te nogi page, ‘Abagi pogo bidi tau sabo da.’ Agai hani nogi Livai, agai page bulu te Saiprus tǫde, te tamu ąį tomode elalubo tǫ dao. 37 Tama te bidi Barnabasgo agai tǫ me bidigo togwa menama, abelali. Abelama, Barnabasgo te mone ge dabe te Jisasgo tagala palai bidi dabebolo magasali, augwaligo dobamai hagede.