1 Te bidi Pol dali Barnabas si te Aikoniam be naniba sabolama, te augwali sigo polobadu te bulu Antiokde yali sę tiwai ma yali. Augwali si te Juda dabego bomo yai po ola mabo be tomoba pelama, Godigo po bugagia pusa mani. Bugagia pusa menama, te Juda dabego me, te Juda hani isąwai bidi dabego me, te Jisasgo wiegi yai poba augwa homu tigidali muani, umabo we bidigo tialio. 2 Tiali goli, te Juda dabe me badu augwaligo te po odobo hagela homu ebaso, augwaligo te Juda hani isąwai dabebolo bidi posobo po geme walali, augwaligo te Pol dali Barnabas dali sigo ebo sę dolomainu yai. 3 Augwali si Aikoniamde hauwa sogo mu bidama, augwali sigo Genuai Bidigo po bomo elama, mu pusali. Augwali sigo te po wai, “Te Genuai Bidi agai we bidibolo dwagi yai sę ebo homu ebo dao.” Tama Genuai Bidigo agai bomo augwali sibolo menama, augwali sigo we bidi noma sabo sę dabe yali, te we bidigo ‘Te bidi sigo wabo po mu dao’ omainogo yai. 4 Tama te be nanide bidali we bidi tomode si pedali. Me badu we bidi augwaligo te Juda dabego po wali pai, me badu augwaligo te Jisasgo tagala palai bidi sigo wali po wali pai.

5 Te Juda hani isąwai bidi dabe me badu me, te Juda dabe me badu me, augwaligo genuai bidi dabe me, augwali tigidaligo te homu yai, “Dago te bidi si tigiba masigi sąnama, ela muaibao,” homu yali. 6 Tama te bidi sigo tiwaibao wabo po odobo si, tama augwali si wi pelama, Listra buluba pali. Nosali te Derbe buluba pali, te bulu si te Likonia tǫde elaluali. Tama te tǫ pąde elaluali dwasianu bulu meba pali. 7 Te tigidali bulu tǫde augwali sigo Godigo dwagi yai po tigidali we bidibolo pususu bilali.

8 Te Listra bulude te sągą dwai bidi me deli bidali. Te bidi aga idago tabide sągą tama dwai ame nai, tama agai aga sągągo bilibo menio. 9 Tama agai dugulalu, Polgo wabo po odali. Tama Pol agai suali, te bidi agai homu tigidali te Jisasba bugagia muani kolesaga te usu yali, aga dwagi yai ma ilainogo elalubo usu da homu yali. Tama Pol agai te bidi gedugo bomonama dolo ponama tonaluali. 10 Tama tialima Polgo bomonama tonalu, agai po bomonama pusuyu te tama wali, “Nage hodaluama, naga sągą sigo bugagia dolaluao,” te po wai. Tama te bidi agai polo hodaluama, aga sągągo bilibo gagalali. 11 Tama te Likonia tǫ we bidi dabe hauwa augwali sisinagaselama, Polgo wabo po odali. Augwaligo Polgo te yali sę sulama, Likonia pogo moni i wali, “Dago god dabe dagaludu da pageba dulalio. Tama te bidi sigo tigide bidibo,” te po wai. 12 Tama te we bidi augwaligo Barnabas te Sus nogi poai, te Sus aga augwaligo genuai tobolu god da. Tama augwaligo Pol suali, agai po wabo bidi, augwaligo te nogi Hermes poai, augwaligo po wabo god nogi. 13 Tama te tibo god Sus lotu wabo be te be nani sesege badu elaluali. Te Susbolo nai ulama mabo pris bidi agai omai kibu bulmakau dabe magasali. Tama magaselama, te dwagi yai ni yabe tau dabe selama, kibu bulmakau magede domonani, au yali. Augwaligo homugo te kibu bulmakau dabe elama, te bidi sibolo augwaligo lotu po wainogo.

14 Te Barnabas dali Pol si augwaligo te we bidi augwaligo augwali sibolo lotu po wainogo ebo sulama, augwa si ugwa pisa yali, augwali sigo te sę hagela baso. Augwali si te we bidi tomoba polo pelama, te we bidibolo bomona weyu, te po wali, 15 “Dagego te kolesaga egimio. Dadi si me bidi dage tiwai tama dao,” wali. “Dadi si dage pageba asali, Godigo dwagi yai po dagebolo pusa mawainogo asai dao. Tama dagego te odolali lotu po wabo tibo god tudiba muiyąo. Tudiba munama, dagego te God mu pageba asiąo, hauwa sogo bida bida peduabo God pageba asiąo. Agai te dagalu me, tǫ me, tamu ąį me, tigidali tede bidibo nai dabe me agai nigai dao. 16 Tama polobadu Godigo tigidali we bidi hani augwa kolesagadu pabo sula tagalai. 17 Tiali goli, agai tigidali sogo tigidali we bidi augwaligo aga bidibo konemainu, dwagi yai nai dabe we bidi tomode mubo dao. Agai te dagaludu tulubage me, giliga nanobo sogo me, agai dąį ilibo dao. Tama agai nai pedalama, tama dage bugai homu emainogo te sę ebo dao,” augwali sigo te po wai. 18 Tama te we bidi augwaligo te bidi sibolo lotu po bomonama wainu yali, augwali sibolo nai noga mawai hagede me. Augwali sigo moni sę bomo mu elama, te we bidigp ebo sę paliali.

19 Te nosali te Juda dabe me badu Pisidia tǫde bulu me si elalubo, me nogi Antiok, me nogi Aikoniam. Te bulu side Pol dali Barnabas dali si polobadu osogo bidali. Te Juda dabe augwali tedu te Listra buluba aselama, augwaligo tigidali we bidi homu hodolama, tama augwaligo Pol tigiba masigi sąwai. Masigi sąnama, tama agai mu isai bidi gagayali homu elama, augwaligo aga tigi be nani buluba kegasa pelama, mugi pali. 20 Tialima, te Jisasgo po wali pabo we bidi augwali sisinagaselama, agai tigi bologobea sagasali. Bologobea sagaselama, Pol ma hodolama, te be nani tomoba ma pali. Tama te sogo kigamu aga dali Barnabas dali si te gasa be naniba pali, te be nani nogi Derbe.

21 Te bidi Pol dali, Barnabas dali augwali sigo te bulu Derbede bidibo we bidibolo Jisasgo dwagi yai po pusa mani. Tama pusa menama, we bidi hauwa mu Jisasba augwa homu mu muani. Tama augwali si te Listra be naniba tǫdu ma geasa pelama, te Antiok be naniba sabolali, te Pisidia tǫde. 22 Augwali sigo te Jisasgo po wali pabo we bidibolo dwagi yai po mobo mani, augwaligo Jisas konealubo homu dąų walomainu. Augwali sigo te genuai po ola mawai, “Dago te Godigo tųdu pobadi, gasa we bidi augwaligo dabolo haniani sęgę mawaibao, tama nosali Godigo da tonalubo buluba da sabolaibao,” te po wai. 23 Tama tigidali bulude augwali sigo Jisasgo po wali pabo hani we bidi tonaluabo tobolu bidi dąį ilali. Tama nai osogo gisilama, Godibolo po olama, augwali sigo te tobolu bidi dabe Godigo nogode muai, augwaligo aga konealubaso.

24 Te Pol dali, Barnabas dali si augwali te Pisidia tǫ tomodu pelama, te Pamfilia tǫba sabolali. 25 Teba sabolama, augwali sigo Godigo gesi dwagi yai po te Perga be nani we bidibolo pusa mawai. Tama tedu pelama, Atalia buluba sabolali. 26 Tama augwali sigo Atalia bulu taga pelama, moni geba deli selama, tama ąįdu pelama tama Antiok buluba sabolali. Tama te bulude polobadu Jisasgo po wali pabo hanigo augwaligo nogo tega si tobolude munama, agai tega si tau somainu, Godibolo gedu haluasa po wai. Te po olama, augwaligo te bidi si polobadu tagala palali. Tama augwali si te tǫba ma sabolali, te sę egi pomai hagede, tama augwali sigo te sę ela bila silama, ma asali. 27 Tama augwali si Antiokba ma sabolama, augwali sigo Jisasgo po wali pabo we bidi dali deliba sisinagasali. Tama augwali sigo te sę yali po augwalibolo pusali, tigidali nai Godigo augwali si tau sali sę me, tama Godigo te Juda hani isąwai we bidi augwaligo agai po konealubo sunumi dayali. 28 Tama augwali si Jisasgo po wali pabo hani dali bobobage sogo mu bidali.