1 Te Mosesgo Israel we bidi tigidali i ola sisinama, tama agai augwalibolo te po walali, “Dage Israel dabe, dagego eno megi dagebolo mawainogo ebo te bomai po odiąwe. Dagego te bomai po konea sao, tama bugagia wali piąo. 2 God, dago Genuai Bidigo, da dali te Sainai bulu dude po dąų walai dao. 3 Agai te dąų walali po te dago wąį dabe dali naga dąų walai menio. Menio. Agai te po dąų walali te da megi e bidibo bage da dali me dąų walali dao. 4 God te isi tomode te bulu dude bidiyu, tama agai po dage dali dolo wai dao. 5 Tama te sogo eno te Genuai Bidi de me dage dali tomode po ugwaba pusuyu, edaba pusuyu ebo bidi bidai dao. Magi baso meni, dage te iside wi elama, tama dage bulu duba pabo usu isąbaso tiali,” wali.

“Genuai Bidigo te po wali, 6 ‘Ena Genuai Bidi, ena dagego God dao. Dage olo sę ebo bidi te Isip bulude bidibaso, eno dage oda selama, eno dage odasa asai dao.’ ”

7 “ ‘Dage gasa God meba lotu po me olamuo. Dagego ena deliba naga lotu po wao.’ ”

8 “ ‘Dagego te olo nai piksa te dagalude me tǫde elalubo nai, ma wę te tǫ dologode elalubo nai piksa dabe me nigilamuo. 9 Dage te tibo god piksaba bogoli sugunama, lotu po me olamuo. Magi baso meni, ena Genuai Bidi, ena dagego God dao, tama eno dage te tibo god piksaba lotu omainu me sula tagalogobeo. Eno kolesaga da, e tama tilalubo, eno te bidi dabe ena godolo isąma ebo bidi dene mabo dao. Tama eno te bage augwaligo wai te nosali pedalobo bage te namba 3; te namba 4 hani, me nosali pedalobo bagebolo me te tobage dene me mawaibao. * Prs 26:1; Bom 4:15-18; 27:15 10 Tiali goli, te we bidi ena godolo elama, eno bomai po wali asobo we bidi da, teda eno augwali godolo mu elama, augwa hani nosali 1,000 pedalobo me godolo mu elalua paibao,’ wali.” * Sai 34:6-7; Nam 14:18; Bom 7:9-10

11 “ ‘Dagego God eno nogi olo dali nogi igio, duga Genuai Bidi. Magi baso meni, eno nogi olo dali nogi ebo bidi dene mawaibao.’ ” * Prs 19:12

12 “ ‘Dagego Sabat sogo eno bubuga mu nigilao, duga God, Genuai Bidi, eno sogo, te eno dagebolo wali gilama tama. * Sai 16:23-30; 31:12-14 13 Te a naga olama deli sogo duga olo sę yao. 14 Tama te dei namba 7 te Sabat dao, ma te hodo dolobo sogo dao. Te da eno bubuga dao. Tama te sogo mu deli da dage me, duga wai puluba me, duga sę bidi me, we dabe me, duga negebo hasa dabe me, gasa bulu bidi me dagego bulude bidibaso da, teda te sogo deli munu me sę elamuo, te sę ebo habu mu dao. Te duga sę ebo we bidi augwali te sogo te dage hodo doliyu, dage olo bidibo te yali gilama augwali me olo bidimainao. * Sai 23:12; 31:15; 34:21; 35:2; Prs 23:3 15 Dagego koneawe, dage te Isip bulude te olo sę ebo bidi bidali, te koneao, tama eno genuai bomogo, ena dagego God Genuai Bidi, eno dage tedu odasa asai dao. Tama te tiali pagede da, dagego eno te bomai po wali piąo, tama te toma tubo sogo bugagia wali pelama, toma tuyu yao,’ wali.”

16 “ ‘Dage duga ida aya dologode elaluyu, tama augwaligo po wali piąo, te ena God, dagego Genuai Bidi, eno dagebolo wabo yali gilama. Tialima, dagego te tama sę eyu da, teda dagede tigidali sę wiegi yai mu pedelaibao. Tama dage eno megi te mabo te tǫde dage bobobage sogo mu bidaibao,’ wali.”

17 “ ‘Dagego gasa we bidi elama isiligio.’ ”

18 “ ‘We sai me bidi pai we te we bidi dagego penani sę igio.’ ”

19 “ ‘Dagego nai wi sigio.’ ”

20 “ ‘Dagego ili po olama, gasa we bidi po tų ela magio.’ ”

21 “ ‘Dagego gasa bidigo we pesą igio. Tama dagego agai be pesą daliyu, me tǫ pesą daliyu, me agai sę ebo we bidi me pesą iyu, me kau kibu pesą iyu, me donki kibu me pesą me iyu elamuo, me te agai meba gasa nai dabe me pesą me iyu elamuo.’ ” * Rom 7:7; 13:9

22 Tama Mosesgo te po wali, “Dage tigidali te bulu dude sisinani sogo, Genuai Bidi te isi tomode me te moni genuai sisi pǫ tomode bidai dao. Tama agai po bomona haninama, tama te bomai po dabe dagebolo mani. Tama agai gasa po teba daganobeo. Tama agai te bomai po te masigi pedai side asęnama, enabolo mani,” wali.

23 Mosesgo po geninama weyu, te po wali, “Te isigo te bulu du mesega sali sogo, dagego te pǫ hulia sai tomode po me deli wabo odali. Tama tibaso, dagego genuai bidi dabe me dagego hanide genuai bidi augwali ena pageba aselama, tama augwaligo te po wali, 24 ‘God, dago Genuai Bidigo, dabolo agai genuai bomo mu ola mani, te dago aga te isi tomode po wabo odali sogo. Megi da, dago koneani. Me sogo Godigo te bidi me deli dali po wabo usu yaibao, tama te bidi me isibeo. 25 Tiali goli, God dago Genuai Bidigo da dali po ma wabo dago ma odiyu da, teda da isaibao. Te dwai isigo mu da dolaibao. Te magi baso mu megi da isaibawe? 26 Te niwai bidi mu te God tigidali sogo mu bidibo bidigo po te isi tomode bidi po wabo de isigobewe? 27 Moses, nage ma pelama, God dago Genuai Bidigo wainogo ebo te po ma odigi pao. Tama odama, tama ma asama, nago te odali po dabolo pusao. Teda dago odama, wali paibao,’ dagego tobolu bidi dabego te po enabolo te sogo wali,” Mosesgo te po wai. * Hib 12:18-19

28 “Te tama tialima, Genuai Bidigo dagego ena dali te wabo po odali, tama agai enabolo te po wali, ‘Te we bidi augwaligo po eno polo odalio, tama augwaligo po te dolo mu dao. 29 Eno homugo augwaligo te tobage kolesaga tigidali sogo emainu homu ebao, tama augwali tigidali sogo ena dologode elaluyu, tama eno bomai po tigidali sogo wali pomainao. Te tama eyu da, augwaligo sę dabe, me augwa wąį nosali asobo bagego sę dabe bugagia pedalaibao. 30 Tama tialima, nage ma pelama, augwali augwa ugwa beba ma piąo po wagi pao. 31 Tiali goli, Moses, nage ma asama, nage deli naga ena dali ede bidao, tama nagebolo eno bomai po tigidali mawaibao. Nago te we bidi te bomai po ola mao. Tama augwaligo te bomai po tigidali augwalibolo eno megi mawainu ebo te tǫde bidiyu, te bomai po wali pomainao,’ wali.”

32 Tama Mosesgo augwalibolo te po wali, “Dagego bugagia tonaluiąwe, God dago Genuai Bidigo dagebolo mani te tigidali bomai po dabe wali piąwe. Dagego te bomai po me deli geda munamo dao. 33 Te tigidali bomai po bugagia wali peyu da, dagego ebo sę dabe tigidali wiegi yai pedalaibao. Tama dage bobobage sogo mu te megi dagego sainogo ebo te tǫde bidaibao,” Mosesgo te po wali.