1 Nosali gana gavman tuni bidi Serksisgo bidi me deli nogo tų ilali, augwaligo te nogi Haman nogi yali, te polalubo gavman tiwai pedelai. Haman te bidi nogi Hamedatago ogwa, tama wąį Agakgo wai dao. 2 Tama king bidigo te tigidali kiap bidibolo po olama, te Hamanba kidu sugunama, tama genuai nogi agaba mao po wai. Tigidaligo te kingo wali po gilama yali, tiali goli Mordekai deligo te tiwai sę me isiąwai. Mordekaigo te Hamanba kidu sugunubo te hagela mu yalio. 3 Nosali te gasa kiap dabego sulama, tama augwaligo agabolo hanalu wali, “Magi baso nago te king bidigo po wali pabewe?” 4 Hauwa sogo augwaligo Mordekaigo te tebo kolesaga ebo po wali, tiali goli Mordekaigo augwaligo te po odobo hagela yali. Mordekaigo augwalibolo te po wai, “Ena Juda dao, tama tibaso eno Hamanba kidu sugunubo usu egobeo.” * Mordekaigo Hamanba kidu sugunubo hagela yali, magi baso meni, Haman te Agakgo wąį. Tama Agak te Amalek hani me deli dao. Tama te Amalek dabe te Juda bagego boi bidi dao. Te po te buku Sai 17:8-16; Bom 25:17-19, tede elalubo suao. Tialima, te kiap dabego Hamanbolo te Mordekaigo wali po wai. Augwaligo homugo, “Te Hamango te Mordekaigo te tiwai idumainu gogolama sula tagalobowe,” ma suainu yai dao.

5 Hamango suali, Mordekaigo te kidu sugunama, tama agaba genuai nogi masiąbaso, tama aga haliga sębę dwai mu yalio. 6 Nosali agai hania koneani, Mordekai te Juda bidi yaibaso, tama agai Mordekai dolabo po mia selama, dąų walali. Te Mordekai deli naga tegobeo, menio, agai te genuai kantri Persia tǫde bidalubo Juda dabe tigidali ela muabo homu ebo sunumi gegai dao.

7 Te kibu be 12 wabode, te tama kibu bede te Serksis king bidi bidali, te hasia polua nogi Nisan delide, Hamango augwalibolo te satu gagali yao po olama, te mena polua te side te Juda dabe dolabo side te bodolu mumainogo te satu gagali yao po wali. Augwaligo gagali ela silama, tama augwaligo te tiwai haninibo suali, te nogo si olama, sągągo si wabo polua, te dei 13, te side te polua nogi Adar, te sogode agai augwali dolaibao po wai. † Te Hibru pogo te polua nogi Nisan, te dago Epril ma Me, te nogi dago wabo dao. Tama te polua nogi Adar, te dago pogo te polua nogi te Februeri ma Mas, tama wabo dao.

8 Tama Hamango te gavman tuni bidibolo te po wai, “Te we bidi hani me deli te nago tonalubo tǫ pedai provinsde te bidada pobao. Tama te hanigo te ede bidalubo we bidigo ebo kolesaga tiwai me ebeo. Augwali te gasagi yai tedali mu elalubo. Tama augwaligo nago te tǫ pedaide bomai po elalubo te wali me pabeo. Tama nago augwali gogolama tama sula tagalidu da, teda tego naga tau me sisąyu, tama nago tǫ pedaide ebo sę te dolasa me pogobeo. 9 Tialima, tuni bidio, te nago homugo te tigidali we bidiba po tagala palama, tama te we bidi augwali ela muabo po wao. Te nago tama tibaso da, teda megi eno mu po nagebolo obao, te eno mone silva umabo hauwa mu, te 50 milion kina te nago mone mubo beba muaibao. Te nago gavman sę te monego yagameo,” Hamango te po wai.

10 Te king bidigo te dodobolo pai ring elaluali, te agai ebo sę bomo mabo nai. Tialima, kingo te po oda selama, tama agai nogo danide te ring pedama, tama Hamanbolo mani, te Juda dabego boi bidi dao, te Hamedatago ogwa, te Agak hani bidi dao. 11 Tialima, megi da, king bidigo agabolo te po wali, “Te mone da, tagalao. Nago magi sę te we bidide yainogo wida, nago te naga yao,” wali.

12 Te hasia nanobo polua deli te 13 deide, Hamango te tuni bidigo sę ebo kuskus bidi tigidali i wai. Tama agai po tigidali augwalibolo olama, tama augwaligo asęanio. Augwaligo te po te tǫ pedaide bidalubo we bidi tigidaligo po deli delide asęani. Tama agai te pas te tigidali tobolu bidi dabeba me, te tigidali gavmanba me, te tigidali kiap dabebolo badi, tama tolali, tama tigidali paside te king bidi Serksisgo ring masalu naga elaluali, tama te tuni bidi aga digi asęai pas tiwai gilama yalio. 13 Te pas sela pabo bidi dabe augwaligo te pas selama, tama te tigidali tuni bidigo tǫ pedai tomode bidibo te tigidali tobolu bidi dabeba te pas selasa palio. Tigidali paside te tiwai po wai, “Te polua nogo si olama, te sągągo si wabo polua nogi Adar, te 13 deide, te dagego Juda dabe tigidali ela muiąo. Te gesi we bidi me, te monu dabe me, te we wai puluba me, te side naga tigidali mu ela silao. Te augwali homu dene ebo tagalao. Tigidali ela silama, tama augwaligo doado bage sao,” te po wai. 14 “Te tobolu bidi dabego te pas te tigidali we bidi dabebolo nedao. Tigidaligo odama, bidimainao. Tama nosali te side pedalubo si da, teda augwali elainu te augwaligo sisi yao.” Te pas dabede te tiwai po elaluali.

15 Tialima, te pas sela pabo bidi dabe augwali polo pelama, tama te tigidali tǫ pedaiba sela pali. Tama augwaligo te po me te polalubo moni hanu Susade pusali, tama te we bidi augwaligo odali. Tuni bidi king de Haman si naga te dwagi yai homu elama, dualama, wain ąį tudali. Tiali goli, te moni hanu Susade bidibo we bidi augwali te pode augwali dwai noma siyu, tama augwali homu kolesaga mu puna palio.