1-2 Te Israel dabe augwaligo te bulu Refidim tagalama, ma soali. Tama solama, tama augwaligo te bulu Isip taga soali sogo gagalama nedeyu, tama polua si mu silama, te polua sela wabo te dei delide, te sogo naga augwali te nai meni yai wa pai bulu Sainaiba sabolai. Tama augwali bidabo pesage te bulu du Sainai pąde nigai. 3 Tama Moses te bulu duba God dali po miainogo holai.

Tama Genuai Bidi bulu dude bidiyu, Moses i olama, agabolo te Israel dabe augwalibolo maiabo po meba wali, te hani dabe te Jekopgo wąį dabe dao. 4 Genuai Bidigo te po wai, “Dagego eno yali sę te Isipde suai dao. Tama eno dage te ba kemodagego te aga gesi noma gǫų te bogo ugwadu daide sela soabo tiwai elama, tama dage eno e buluba odasa aselama, tama megi dage ena dali bidibao. 5 Tama dagego megi eno bomai po dąų olama, tama eno po mu wali peyu da, teda dage eno gasagi yai tedali we bidi hani pedelaibao. Tigidali tǫ me, tigidali we bidi me, te eno naga, tiali goli eno dage sa munama, hagea siyu, tama dage ena we bidi mu bidaibao. * Bom 4:20; 7:6; 14:2; 26:18; Tai 2:14 6 Tama dage eno te pris sę ebo tuni we bidi hani bidibo tiwai yaibao. Tama dage te eno tedali we bidi mu bidaibao.” Genuai Bidigo Mosesbolo te po te we bidi dabe augwalibolo mao wai. * Ped 1:6; 5:10; 1 Pi 2:9

7 Tama Mosesgo te bulu du tagalama, tama pelama, te Israel dabe genuai bidi nigilali bage augwali sisinama, tama Genuai Bidigo agabolo te bulu dude wali po tigidali augwalibolo wai. 8 Tama tigidali we bidigo te po wai, “Dago te sę dabe tigidali te Genuai Bidigo po wali gilama te sę yaibao.” Tama Mosesgo te we bidigo po te Genuai Bidibolo wagi pai.

9 Tama Genuai Bidigo Mosesbolo te po wai, “Odao, te genuai husugu yai pǫde bidilama, tama ena nageba asiyu, tama te we bidi augwaligo te eno nage dali po mibo odolama, tama sesemane sogo augwaligo nago poba homu dąų omainao.” Tama Mosesgo Genuai Bidibolo te we bidi augwaligo wali po wai.

10 Tama Genuai Bidigo Mosesbolo te po wai, “Nago te we bidi augwalibolo te po wagi pelama, megi de do si te augwaligo homu kolesaga me dodolama, tama ugwa wę tedelama, tama augwaligo enaba lotu po wainogo sisilaluao. 11 Augwaligo do digi sisi yao. Te duba sogo ena dulama, tama ena te Sainai bulu dude bidibadi, tama te we bidi augwaligo ena sumainogo yaibao. 12 Nago dąį mubogo te bulu du bagulama, tama te we bidi augwali te dąį tomoba pigimio. Tama augwalibolo te po olama, tama augwali bugagia dua bidiyu, tama augwaligo te dąį bolama, tomoba pelama, te bulu duba hologio. Tama augwali te bulu du pąba pigio. Tama niwai bidi me deligo te dąį bolobaso da, augwaligo aga ela muao. 13 Tialima, augwaligo aga elebo sogo augwaligo nogogo aga eligio. Te augwaligo masigi sąnama eliyu, me te enigo aga enao. Te bidigo, me ma te kibugo te dąį bolobaso da, teda dagego aga te kolesaga elama elao. Te dage deli sogo te bulu duba holabo sogo elalubao. Tama te sogo dagego te bu wabo nai nogi biugel te bu wai da obaso da, teda dage piąo,” Genuai Bidigo te po wali. * Hib 12:18-20

14 Tama Mosesgo te bulu du tagalama, dulama, tama te we bidi augwalibolo te lotu po wabo sisi iyąo te po wai. Tama augwaligo agai po wali pelama, augwa ugwa dabe wę telawai. 15 Tama Mosesgo augwalibolo te po wali, “Dagego do digi sisi ela muao. Tama megi e side gagalama, do tama te sogo dage we dabe dali me pilamo dao,” wali.

16 Tama bidama, te sela sogo wabo side kigamu, te genuai pǫ te bulu dude pedelali, tama te pǫ kulukulu olama, tama be sele ula pepeda pelama, tama bu wabo nai biugel gela genuai mu wai. Tama te bulu du sesegede pesage nigali we bidi dabe tigidali wi mu elama, tama augwali tigi didibili yai. * Ped 4:5 17 Tama Mosesgo augwali odasa te be mesalo buluba pelama, tama augwali te bulu du sesegede God dali deliba sisinai hagede dolalugi pai. 18 Tama Genuai Bidi te sia tomode bidilama dulali, tama te Sainai bulu duba bidagasali, tama genuai hanogo te bulu du tigidali mu mesega sai. Tama ugwaba holali hano te genuai sia mu dabo hano holobo tiwai mu yai, tama tǫ mali genuai mu te bulu dude pedelai. * Bom 4:11-12 19 Tama te bu wabo nai biugel gela wabo genuai eyu, tama genuai mu pedelai. Tama Mosesgo po Godibolo olama, tama Godigo pedauwalidu agai po wei ponobo odainogo yai.

20 Tama Genuai Bidi dulama, te Sainai bulu du bagede bidiyu, tama agai Moses te bulu duba ugwa holomainogo aga i wai. Tama Moses te bulu duba ugwa holai. 21 Tama Genuai Bidigo te po agabolo wai, “Nage aiyaba dulama, tama te bomo yai po tigidali we bidibolo magi pao, tama augwaligo te dąį bolama, tama ena me suagasigio. Augwaligo te dąį boloyu da, teda we bidi hauwa isaibao. 22 Te pris dabe augwali ena pąba asobo bage, augwali me te augwaligo homu kolesaga dwai meda elalubo dabe geselama, tama augwali eno gedude wiegi yai pedelao. Ma, te kolesaga isąyu da, teda eno augwali dene ilaibao,” wali.

23 Tama Mosesgo te po Genuai Bidibolo wai, “Te we bidi dabe augwali edaba me hologobeo, magi basowe, naga digi nago bomai po dabolo mawai. Tama da te bulu du sesegede bobegelama, tama dąį muai, tama dago te bulu du habu selebao,” te po wai.

24 Tama tialima, Genuai Bidigo agabolo te po wai, “Te usu da, nage aba dulama, tama Aron aga selama, tama nage dali edaba holao. Tiali goli, te pris dabe, me te we bidi dali, augwaligo te dąį muani bolama, ena pąba me edaba holamo da po wao. Ma, augwaligo te dąį boloyu da, teda augwali eno dene ilaibao,” wali.

25 Tama Mosesgo te po wabo odama, tama aga te we bidi dabe bidibo digi dulama, tama Genuai Bidigo agabolo mani po tigidali augwalibolo pusai.