1 Genuai Bidigo po ma weyu, te po wai, “Megi eno nagebolo nago te Aron dali, aga ogomani me, augwali te pris dabe pedalomainogo yabo sę po waibao. Te kibu bulmakau omai wai me deli badi, te sipsip omai si, te keni kenigo augwali tigi dolisiąwai dabe sao. 2 Tama te witgo plaua hasia polali mu, te sao. Nago te plauade te yis me mugio. Tama te plaua meba selama, te bret nigibadi, tama te plaua meba selama, tama te ni oliv wel dali taluama, te bret nigao. Tama plaua meba selama, tama te bisket meba nigibadi elama, tama augwalide te oliv wel pilao. 3 Tama te bret, me te bisket dabe te bonou wa me deliba munama, tama nago te bulmakau omai, me te sipsip omai si te ofa ilibo sogo te enabolo mao. 4 Tama Aron dali, aga ogomani augwali dali, te eno lotu ugwa beba odasa aselama, augwali wę paluao. 5 Nago augwali wę paluama silibo si, teda te pris ugwa dabe te Aronba muao. Holobo ugwa mubadi, tama bobage gudubo ugwa me muyu, tama dwasianu hagawiade mubo ugwa me te agabolo gudulama, tama te wiegi yai kukulugo agaba kęnao. 6 Tama ugwa te aga tobolude bagulama, tama te po elalubo medal gol te nai sao, te Genuai Bidigo nai dao, tama te tobolude muani ugwade kęnao. 7 Tama wel selama, te pris nigilali bidi dabe sa muabo wel, tama aga tobolude te wel gelama, aga te sęde sa muao. 8 Nago Aron sa muna silibo si, teda agai ogomani odasa aselama, tama augwaliba te hobolo ugwa muao, 9 tama augwali tabide te kukulu bagulama, tama augwali tobolude ugwa dage dabe kęnao. Nago tama tiwai sę te Aron aga ogomani dali augwali te pris dabe nigiliyu, tama tiao. Tama te bidi dabe augwali dali, te augwa wąį ogomani nosali pedalubo bage, augwali hanigo naga te pris sę sesemane sogo ela paibao,” wali.

10 “Tama Moses nago te ofa yabo bulmakau te Deliba Sisinabo lotu ugwa be tų pąba sela aselama, tama Aron dali, aga ogwa dabe dali, augwaligo nogo te bulmakau toboluba mumainao. 11 Tama eno gedude nago te bulmakau te ugwa be tų pąde elagameo. 12 Tama te bulmakau kaneme meba nago nogo danigo selama, tama te alta gąų dabeba muao. Tama te tigidali kaneme elalubadi te alta pagede gelao. 13 Tialima, nosali te tabide ili tigidali sobadi, te wiegi yai homu, me te dwasianu dini homu si te ili dali elalubadi selama, tama te tigidali altade ulama, te enabolo ofa ebo tiwai ilao. 14 Tiali goli, te bulmakau mi, me wali, me te di tabi tomode elalubo, te olo madi bulu badu siago domainogo ulao. Te bulmakau da, te augwaligo dwai sę yali sela sąbo ofa yaibao.”

15 “Tama nago te ofa yabo sipsip omai gomunai wai sao. Tama Aron dali, aga ogomani dali, augwaligo nogo te sipsip toboluba mumainao. 16 Tialima, te sipsip elama, tama te kaneme selama, te alta me si me si bogo badu sąyao. 17 Tama nago te sipsip todogo pelama, tama te sągą si wę telabadi, te haliga dabe me tilama, tama tigidali te sipsip tobolu daiba ugwadu manao. 18 Tama tigidali te altaba munama, te ofa tiwai yao. Tama ena Genuai Bidi eno homu pemene wiegi yai te ofa elama, siago dabo denami ebo te eno homu pemene wiegi yai yaibao.” * Ef 5:2; Fil 4:18

19 “Tama nago te si wali sipsip selama, tama Aron aga ogomani dali augwaligo nogo te sipsip tobolu daiba ugwadu mumainao,” Genuai Bidigo Mosesbolo te po wai. 20 “Tialima nago te sipsip kibu elama, tama aga te kaneme dwasianu selama, tama Aron aga ogomani dali augwaligo dolo olo sabi badu te kaneme muao, tama augwali te kaneme dolo a nogo danide mubadi, te dolo a sągą dani badu muyu yao. Tama te poude munalubo kaneme tigidali te alta me si me si bogo badu sąsą pao. 21 Nosali nago te altade munalubo kaneme meba, me te pris sa muabo wel sobadi elama, tama Aronba me agai gudali ugwaba segeni sąsąyu, tama aga ogomaniba me augwaligo gudali ugwaba segeni sąsąyu yao. Nago tama tiali da, teda Aron aga ogomani dali augwaligo gudali ugwa me, te tigidali augwali eno bage deli naga dao.”

22 “Tama nago te sipsip me togolama, tama te sipsip ili tigidali te pris bage augwali sa munama, tama ofa ilabo nai sao. Te nisali danu, me te haliga mesegelali delegabe ili, me te wiegi yai te sipsip kibu homu sobadi, te homu me si tede ili elalubo, tama dolo sągą badu te tele mi, te me sao. 23 Tama te tudi badu augwaligo enabolo te bo disiąwai yis meni yai bret ofa ilali nai, nago te deli deli haniani bret dabe sao, me deli augwaligo te oliv wel dali ulali, tama gasa augwaligo te oliv wel me te bisket dali me ulubeo. 24 Tialima, te kibu mi, me te bret te Aron aga ogomani dali augwalibolo menama, tama augwaligo te ofa ilibo sę eyu, te ena gedude augwaligo te nai dabe ugwaba sidu geyu yaibao. 25 Tama augwaligo nogode munalubo te nai selama, tama te alta daiba ugwadu munama, te ofa ebo dabo siago tigidali domainao. Tama ena Genuai Bidi, eno te ofa ebo denami wiegi yai ebo te eno godolo mu yaibao. 26 Tama nago te Aron te pris sęde sa mumainogo elali sipsip kibu aga bau te nago nogogo tulama, tama sela bilibo, te eno gedude tama tiao. Tama te kibu bau te naga tuagameo.”

27 “Tama dagego te pris sa muabo sogo pedalubode, dagego te kibu bau, me te sipsip sągą tele mi selama, nago te pris sa muyu, ofa iliyu, tama nogogo tulama, eno gedude sabilao. Tama nosali te mi te pris dabe augwalibolo mao. 28 Tigidali sogo Israel dabe augwaligo te kibu sipsip te ena dali deli homu pedelainu enabolo ofa mao, augwaligo te kibu bau, me te dolo sągą badu tele mi selama, tama te pris dabe augwalibolo mao. Te Israel dabe augwaligo te tiwai mabo ena Genuai Bidibolo momainao.”

29 “Te Aron isibo side da, teda augwaligo agai te pris sę yali ugwa dabe te aga ogomanibolo mao. Tama Aron aga hani bidi augwali te pris sę emainogo sa mubo sogo, te ugwa mumainogo yao. 30 Tama te Arongo ogwago te aga aya Arongo het pris sę yali tiwai selama bidainogo ebo sogo, agai te a naga olama nogo me badu si sogo usu nama, te ugwa mubo usu selama, te ugwa mumainao. Tama te a naga olama me si sogo aga eno te Deliba Sisinabo ugwa be obo tomoba pelama, tama te Tedali Gasagi Yai Be Habu tomoba peyu, te sę emainogo yao.”

31 “Tama nago te Aron aga ogomani dali augwali te pris sę emainogo sa mubo sogo, nago te ofa ilali te sipsip mi selama, tama senede munama, tama te ugwa be obo bagulali tomode ulao. 32 Tama pris dabe augwaligo te mi dali, te bret me te basket wade munalubadi selama, tama eno Deliba Sisinabo Ugwa Be tųde dulaluyu, tuao. 33 Augwaligo augwa dwai sę yali sela sąyu ofa ilali nai te augwa ma tumainogo yao, te augwali te pris bidi dabe da olama, sa mubo sogo te tiwai yao. Te pris dabe augwaligo naga te nai tuyu, tama te we bidi augwaligo te nai me tugobeo. Menio. Te augwalide habu mu selao, te tedali mu gasagi yai nai naga dao. 34 Tama te kibu mi me bret meba munalubadi te kigamuba sabalobaso da, teda te nai augwaligo me tugio. Te kibu mu habu selao, te tedali gasagi yai mu dao, tama augwaligo te siaba ulama, tama siago tigidali dela silimainao.”

35 “Nago te Aron aga ogomani dali augwali te pris sa mubo sę iliyu, tama eno nagebolo wali po gilama te a naga me te si sogo te sę dolo yao. 36 Tama tigidali sogo nago te bulmakau me deli selama, te dwai sę yali sęgę sela sąyu, ofa ilao. Tama te ofa ebogo te eno alta te wiegi yai eno gedude ilao. Tama te ni oliv wel te eno altaba sa muyu gelao, te eno nai naga dao. 37 Nago te altaba te tiwai sę ilibo te 7 tama sogo te sę yao. Tama te alta te eno nai mu da weyu, te eno habu mu selaibao. Tama bidi me deligo nogogo me dįayu, ma magi nai me deligo te alta sai ugwadu daiba muyu da, te nai da, te tedali gasagi yai nai naga dao, te eno nai naga dao.”

38 “Tigidali sogo dagego te kibu sipsip wai si te kibu be deli yai elalubadi, tama te altaba munama, ofa yao. 39 Tama sipsip me deli te kigamu ofa eyu, tama gasa sipsip me te pio mu ofa yao. 40 Tama te sęgę deli yai plaua te witgo nigai dali, te sęgę deli yai oliv wel dali begelama, te hasia sipsip me deli dali ofa ilao. Tama me, dagego te sęgę deli yai wain ąį dali te ofa tiwai elama, te gelao. 41 Tama dagego te gasa sipsip me deli te pio ofa yao. Te deli tigi poai plaua me, te oliv wel me, te wain ąį me selama, tama te kigamu yali ofa tiwai gilama yao. Te tubo naigo ofa ebo dagego te nai ena Genuai Bidibolo mobao, tama te siago deyu, tama wiegi yai denami ebo te eno godolo ebo dao. 42 Te siago tigidali domainogo ulubo ofa te dagego sesemane sogo te ofa nosali yao, te eno Deliba Sisinabo Ugwa Be tų pąde tigidali sogo te ofa ebo, te eno sueibao. 43 Tama eno genuai ula te ugwa beba pedaliyu, tama te badu digi te eno bulu elaluyu, tama tedali gasagi yai bulu tama nigilaibao. Tede me ena te Israel we bidi dali deliba sisinaibao.”

44 “Tama tibaso, te Deliba Sisinabo Ugwa Bede alta si da, te eno nai da weyu, te eno sa muaibao. Tama eno te Aron aga ogomani dali augwali sa munama, augwali te pris sę tiwai emainogo yaibao. 45 Tama ena dage Israel dabe tomode bidiyu, tama ena dagego God bidaibao. 46 Tama dagego ena bugagia koneama, ena Genuai Bidi da weyu, ena duga God dao, tama eno naga dage te Isip tǫde selama, tama eba odasa asai. Tama tiyu, ena dage tomode bidaibao. Ena digi, ena God, dagego Genuai Bidi dao,” te po wai.