1 Megi da, Genuai Bidigo Mosesbolo e tiwai po wai, “Nage dali, te nago Isipde odasa asali we bidi me, dagego e bulu taga peyu, tama eno dagebolo po dąų weyu, dagebolo te mawaibao wali, te buluba piąo. Polobadu eno Abrahambolo, me Aisak dali, me Jekop dali, te tiwai po wai, ‘Tama eno te tǫ te duga hani wąį nǫų dabe augwalibolo mawaibao,’ wai dao. * Gag 12:7; 26:3; 28:13 2 Tama eno ensel mobo bidi me deli te dage pabo madi polasa tagalama, tama eno te Kenan hani, me Amor, me Hit, me Peres, me Hivi, me Jebus, te hani augwali eno sela sągi paibao. 3 Tama dage te wiegi wiegi yai haniani nai holobo madi, te ili elalubo wiegi yai tǫba bidigi paibao. Tiali goli, ena digi te ena dage dali me pogobeo, magi baso meni, te dage hagoma ebo we bidi dabe dao. Tiyu, te ena dage dali peyu da, te dage eno te tųde dolabuo,” wali.

4 Tama Mosesgo te we bidi augwalibolo te Genuai Bidigo te bomai po mobaso, tama augwaligo homu sęgę elama, tama augwaligo te wiegi yai au te tigide me mubeo. 5 Tama Genuai Bidigo po Mosesgo te Israel we bidi augwalibolo omainogo te po wai, “Dage te hagoma ebo we bidi dabe mu dao. Te ena dage dali pobaso da, teda eno dage dolabuo. Te ena dage dali pęwadage sogo naga bidagasali goli, te eno dage tigidali dolabuo. Tialima, odiąo, te dagego tigide elalubo ring gol te nai dabe tigidali peda sąwai madi, tama eno mena tiwai kolesaga dagebolo yabo te eno homugo bugagia konemainogo yaibao.” Te po wai. 6 Tama augwaligo te Sainai bulu du taga pabo sogo, augwaligo te tigide muani te au dobage te me mubeo.

7 Tigidali sogo te Israel dabe augwali pelama, te bidigi pabo madi, tama augwa ugwa be sę eyu yai, tama Mosesgo me ugwa be me deli selama, tama augwaligo te be sę ebo pesage te bulu badu te dwasianu digibulu gana te ugwa be sę eyu yai. Tama agai te ugwa be nogi te tiwai nogi poai, te God Dali Sisinibo Ugwa Be da wai. Tama dego te Genuai Bidigo homu kolesaga te koneainogo da, teda aga te ugwa beba paibao. 8 Tama Moses te ugwa beba pabo sogo da, te tigidali we bidi augwa ugwa bede bidiyu, tama augwali hodaluama, tama augwa ugwa be tųde dolaluyu, tama Moses te ugwa be tomoba pabo suai dao. 9 Tama Moses te ugwa be tomoba pai madigi, tama te pǫ aselama, te ugwa be tų pąba dolagasai. Tama Genuai Bidi te pǫ tomode bidiyu, tama Moses dali po miai dao. 10 Tama te Israel we bidi augwali te augwa ugwa be tųde dolaluyu, tama te pǫ te ugwa be pąde bidibaso da, teda augwali tobolu basi gulama, tama lotu po Godibolo wai dao. 11 Tama Genuai Bidigo Moses dali po miani, te bidigo aga abagi dali po mibo tiwai gilama yai. Augwa si te po ola silama, tama Moses aga te bidibo pesageba ma asiyu yai. Tiali goli, Mosesgo sę ebo ogwa bidi, te Josua, te Nungo ogwa, aga te tomode me bididuai. Agai te Sisinibo Ugwa Be munu me taga pisąwai dao.

12 Mosesgo e tiwai po Genuai Bidibolo wai, “Nago enabolo te e we bidi augwali te augwa tǫba odasa pao, te po wai. Tiali goli, nago enabolo te mena bidigo ena tau somainu yabo bidi te ena dali me pao wabo po, te nago me wabeo. Tama nago te po wai, ‘Eno nage bugagia koneani, tama nage eno godolo ebo da,’ wai. 13 Tama nago ena godolo eba wida, teda eno homugo nago enabolo te nago homu kolesaga ola menama, tama eno nage bugagia konemainu, tama sesemane sogo eno te nago godolo yabo kolesaga naga yaibao. Tama eno homugo me te naga digi sa muani we bidi te nago homugo ma konemainogo, te homu eno ebo dao.”

14 Tama Genuai Bidigo te po wai, “Ena digi nage dali hodobo peyu, tama nagebolo wiegi yai homu nagame ebo kolesaga mawaibao.”

15 Tialima, Mosesgo Genuai Bidibolo te po ma wai, “Te naga digi te da dali pisąwani da, teda nago da ede bidali te taga pomainogo te me tigio. 16 Ma, nage da dali pisąwani da, te gasa bidi hani augwaligo mena tama te nago ena me, te naga we bidi dabe dali, godolo ebo te koneaibawe? Tiali goli, nage da dali pobaso da, teda te gasa bidi hani augwaligo koneama, te da we bidi te gasa we bidi hani tigidali tiwai meni, da te gasagi yai bage mu da waibao,” wali.

17 Tialima, Genuai Bidigo Mosesbolo te po wai, “Eno te nago wali po selama, te sę yaibao. Magi baso meni, eno nage godolo eyu, tama eno nage bugagia koneai dao.”

18 Tama Mosesgo Genuai Bidibolo e tiwai po wai, “Eno homugo nago genuai ula ebo gesabi enabolo waselao.”

19 Tama Genuai Bidigo Mosesbolo po wei ponoyu, te po wai, “Eno nagebolo te eno wiegi yai ula tigidali ola mawaibao. Tama eno nogi nagebolo pusuyu, eno e tiwai po waibao, ‘Ena Genuai Bidi dao.’ Odao, te eno olo tau siyu mabo wiegi yai kolesaga eyu, tama eno bidi me delide homu dene eyu, tau sobaso da, teda eno te sę eyu naga ebo dao. * Rom 9:15 20 Tiali goli, nago ena gesabi me sugobeo, magi baso meni, te bidi me deligo eno gesabi subaso da, teda aga isaibao. 21 Suao, te genuai masigi me dedeli ena pąde elalubao. Tama nage te masigi daiba ugwadu dolugulao. 22 Tama eno gesabigo genuai ula te nage pąba asobo side, eno nage te masigi dudulawi me deli tomoba munama, tama nage eno nogogo mesegelama elalubadi, ena ela soaibao. 23 Tama nosali eno dagala sąbosi, tama nago ena tudi badu naga sumainogo yaibao. Tiali goli, nago ena gesabi me sulamuo,” te po wai.