1 Genuai Bidi te tama po enabolo walio, 2 “Tǫde bidio, polobadu we si bidali. Augwaligo ida deli naga elaluali. 3 Te augwali wegi ogwa we elalubadi, augwali si te Isipde bidali. Te bidi dabego augwali sigo tigide gagali eyu, augwali si dali penani elama, augwali si te penani we pedelalio. 4 Te gomunai wegi nogi Ohola, te Samariade po kisilama wali, te Israel tǫ not badu kantrigo genuai taun da. Te tomo wegi nogi da, Oholiba, te Jerusalemde po kisilama walio, te Juda tǫ kantride saut badu elalubo genuai taun dao,” wali.

“Tialima, eno te wegi si sali, te augwali sigo eno wai dabe ame nanio. 5 Ohola aga eno we da, tiali goli agai penani ebo kolesaga eyu, te agai te Asiria dabe dali gedu elama, te augwali agai abagi dabe pedelalio. 6 Te abagi dabe augwali te gegunai Asiria gavman bidi dabe da, augwali te ami polalubo ofisa bidi dabe augwaligo te wiegi yai husugu ugwa gudali. Te sawi yai ami dabe augwa te hosde dugulama boi hwįani. Ohola agai te gesi ogwa bidi dabe sulama, te aga haliga hogodasa holalio. 7 Tama aga te polalubo Asiria bidi dabego penani we pedelali. Tama agai augwaligo te tibo god dabe lotu wabo sę yali, tama aga eno gedude meda yai mu pedelai dao. 8 Agai te penani sę te aga Isipde bidu, te gesi ogwa bidide bidali sogo yali tiwai yali. Te sogo te bidi dabego aga ame tolama, te gagali eyu, aga penani elama, te augwa homu godolo yali te silalio. 9 Agai te dwai kolesaga Asiria dabe dali yali, te agai godolo mu yali abagi dabe mu da. Tama eno te Asiria dabe aselama, aga dolagasomainu ilai dao. 10 Te augwaligo agai ugwa peda sąnama, te aga habu olo mu bidali. Tama augwaligo Ohola te bainat hwągo ela munama, te agai wai naga tigidali sali. Te we dabe sibigo te tiwai sę te we Oholaba pedelali po mibo odama, tama augwa te po wali, ‘Agai te aga yali dwai kolesagade sęgę tolobo sę yai dao.’ Augwaligo te po wali.”

11 “Te tomo wegi Oholibago te sęgę dabe te Oholaba pedalubo suali, tiali goli agai tede homu kone palobeo. Menio. Agai te penani sę ebo bomo umagi mu eyu, tama agai te Oholago yali dwai kolesaga aiyaba elaluai dao. 12 Oholibago me te Asiria gegunai bidi dabe me, ofisa dabe dali gedu eyu yai. Tigidali te sawi yai gesi ogwa bidi, tama te wiegi yai ugwa gudai au elalu, tama augwali hwįbo hos kibu dabede dugulama hwįani. Tama Oholibago haliga augwalide hogodama, te aga augwali dali pagela pidu geai dao. 13 Eno suali, agai aga amago yali kolesaga tobage yalio. Augwali sigo kolesaga te meda yai mu yai dao,” wali.

14 “Tiali goli, Oholibago dwai kolesaga yali te umabogi mu yalio. Agai te Babilon gegunai bidi dabego piksa noma suali. Te bidi dabego te piksa te bagulali be dagade te mama yai pengo pilalio. 15 Te piksa dabe da, te gegunai bidi dabego te kukulu gudama, te augwaligo wiegi yai au yai ugwa dabe selama, te augwa tobolude bagulali. Oholibago te Babilon ami polalubo ofisa dabe piksa suali, te gasa sawi yai mu ebaso, 16 te aga haliga augwalide mu hogodaluali. Tibaso, agai te Babilonba po ola tolama, te aga dali piagasomainu augwaliba hanalu wai dao. 17 Tialima, augwali asama, aga dali pagela pilama, tama te augwa godolo yali homu silalio, tama augwaligo Oholiba te meda mu ilali. Augwaligo te tama sę ela pidu ela pali, te nosali agai augwalide hagela mu yai dao. 18 Oholiba aga te we dwai mu da. Agai dwai kolesaga te hania hanilama ebaso, tigidali bidigo koneani, aga te penani we da homu yalio. Te eno agade hagela mu yali, te eno agai ama hagela homu yali tiwai yalio. 19 Tiali digi, aga penani yali kolesaga genuai eyu, umabo mu yalio. Aga te Isipde bidu te penani yali te sogoba homu kone palama ebo tiwai yai dao. 20 Tede polobadu bididubadi aga te Isip bidi dabede haliga hogodali. Te augwaligo nai da, te kibu donkigo nai tiwai genuai elalu, te augwaligo tigi ąį te umagia mu pedalu, te kibu hosgo ąį tiwai yalio,” wali.

21 “Augwali te tiwai bidibaso, Oholiba, nago te nage Isipde te gesi wegide bidali sogo yali kolesaga tobage yabo homu godolo ebao. Te sogo te bidi dabego nago ame tolama, te gagali eyu, te nage dali pagela pidu geai dao,” Genuai Bidigo te po wali.

22 Genuai Bidigo po te tiwai ma wali, “Oholiba, nago te tobage dwai kolesaga ebaso da, teda ena God Genuai Bidi, eno po nage dali elalubao. Eno koneani, nago naga te abagi dabe nosali hagela homu yali, tiali digi augwaligo te nagede wado yabo sę eno ilibaso, te augwali tigidali badu asama, nageba dwai sę yagasaibao. 23 Eno te gegunai gavman bidi dabe dali, te ami polalubo ofisa dabe dali te bulu tǫ kantri Babilonde, me Kaldia, me te Pekot hani dabe, me Soa, me Koa, me Asiria, te tama bulu bidi dabe selama, tama augwali te kibu hos dabede dugulama, te augwali eno odasa asaibao. Polobadu nago te bidi dabe te ogwa bidide bidibo suali, te gasa sawi yai mu bidibaso, te nago augwalide gedu yai dao. 24 Tiali goli, megi da, augwa te not badu tǫ pedai bidali taga soyu, te nage dali boi hwį yagasaibao. Augwali te genuai ami hani dabe dali asu, te augwa hwįbo karis dabe me, te walu doado bage tolobo karis dabe dali asaibao. Augwa te hwįbo doado bage me selama, te hwįbo kapa madi munama, te sabele dabe dali, awa dabe dali tolasa asu, te augwaligo nage bagua sagasaibao. Te augwaligo nage aiyaba elalubo sę eno ilama, te augwaligo nage te augwa kolesagade digi po tų elama, te augwaligo nageba dwai dene mawaibao. 25 Nago ena tudiba mubaso, te eno nage dali wado po wali. Tialima, te bidi dabego nageba dwai sę mu yabo sę eno ilaibao. Te augwaligo nago guni me olo togolama, te nago wai dabe me saibao. Te nago tǫ kantride me badu bidali we bidi dabe, te bidi dabego augwali te bainat hwągo ela muyu, ma te augwali isiba ulaibao. 26 Te bidi dabe augwaligo nago ugwa pepeda sąnama, te nago wiegi yai beli me nogode muani ring dabe saibao. 27 Eno te sę dabe ebaso, te nago penani sę ebo kolesaga munu ma isąma, te nage Isipde bidu yali gagalasa, te tiwai megi e sogoba usu naga nagasalio. Te nago naga te tibo god dabeba lotu munu ma wasiąyu, tama nago te Isip dabeba homu kone ma egobe dao,” wali.

28 “Magi baso meni. Ena God Genuai Bidi, eno te tama po nagebolo obao, te nago godolo isąma hagela homu yali bidi dabe, te nageba dwai dene mabo sę yagasomainu eno tamadi tama sula tagalaibao. 29 Te bidi dabego nage godolo isąwai, te bidi dabe augwaligo nago doado bage tigidali saibao. Te nage olo mu bidaibao, te penani we aga bolu olo bidibadi te bidi dabego aga subo tiwai ebao. Nago penani dwai kolesaga hauwa ebaso, 30 tama nageba te sęgę dabe pedelaibao. Nago te gasa tǫ kantri dabego tibo god dabe tigidali wali peyu, te naga digi eno gedude meda ilali, te penani we aga yali kolesagago meda ilibo tiwai yalio. 31 Nago naga amago dwai kolesaga ebo wali pobaso, te eno nageba dwai dene mabo te agabolo mani dwai dene tiwai mawaibao,” walio.

32 “Ena God Genuai Bidigo te tama po obao, Oholiba, te eno nageba dwai dene mu mawaibao, te naga amabolo mani dwai dene tiwai tobage nageba me mawaibao,” te po wai. “Te eno nage te bomai wain ąį te genuai kabude tumainu ebo tiwai ilama, te nage wabo pabo bidi tiwai yaibao. Te gasa hani we bidi tigidaligo nage sulama, te nage gisugu mayu, te nageba dwai posobo po waibao. 33 Te wain ąį eno te Samaria mani tobage wain tiwai da, te naga nagebolo mawaibao. Nago tulama, te nage gęǫ page eyu, te nage haliga sęgę eyu, te wi dwai mu elama, te nage dolaibao. 34 Ena God Genuai Bidigo eno po dolo obao, nago tulama, te wain mu siminama, tama te kabu nago aluama, te aga pepedai me badu selama, te naga digi naga ame togaibao,” wai dao.

35 “Ena God Genuai Bidigo eno te tiwai po nagebolo obao, nago ena homu konebo tagalama, te ena tudiba munama, te tobage dwai kolesaga dabe mu yali. Tibaso, naga te yali dwai penani kolesaga dabede sęgę tolao,” wali.

36 Tialima, Genuai Bidigo enabolo te tama po wali, “Tǫde bidio, eno homugo nago te Ohola me Oholiba sigo dwai kugumini yai kolesaga yalide dagalama, tama po tų ilao,” wali. 37 “Augwali si te penani we da, te bidi me ela muai dao. Augwali sigo te tibo god dabe dali penani tiwai yali. Augwali sigo eno wai dabe ame nani, tiali digi augwali sigo augwali elama, te tibo god dabeba ofa eyu yalio. 38 Te kolesaga naga me ebeo. Menio. Augwali sigo te tiwai gasa dwai kolesaga me yali. Augwali sigo eno be te eno gedude meda mu ilali. Te augwali sigo te Sabat bodolu muani side bomai po bolali, te eno bodolu muani side digi mu dao. 39 Augwali sigo te wai dabe te tibo god dabeba ofa ela silama da, teda augwali si te sogo naga hogodasa aselama, te eno beba lotu wagasali. Te tiali kolesagago augwali sigo eno be meda mu ilalio. Augwali sigo te kolesaga dwai mu eno bede digi yai dao,” wali.

40 “Te augwali sigo gasa dwai kolesaga mu me yali. Augwali sigo te digibulu bulu bidi dabeba po ola tolama, hanaluama, augwali asao wali. Tialima, augwaligo te po odama, te augwali asali. Te we si ąį paluama, te gedu au ilibo pen pilama, te beli dabe me nogode ring dabe muanio. 41 Te augwali sigo bet me deli au ilama, tede dugulalu, tama augwali sigo te tobage wiegi yai nai dabe te bet pąde elalubo tebolo sai me deliba muani. Tama augwali sigo te eno augwali siba mani te wiegi yai denami ilibo hano ebo pauda me, te oliv wel me, augwali sigo te tebolo saiba muanio. 42 Augwaligo te tǫ wa pai bulude bidali bidi dabe hauwa selama, te augwali odasa aselama, tama te we si dali augwaligo nai da tuali. Te augwa wiegi yai pemene eyu, i hae subigila wali. Te bidi dabego te we sigo nogoba ring muyu, te augwali sigo toboluba te kwin wego madi muanio. 43 Eno sulama, eno te homu yali, te sesabi mu elama, te we sigo bidi tagalobo kolesaga elama, te megi da augwali si te penani we pedelama, tama te bidi dabe augwali siba naga pai dao. 44 Augwaligo te Ohola me Oholiba siba penani sę igi piduali, te penani we si da po wai dao. 45 Augwali sigo te sali bidi dali bidali tagalobo kolesaga eyu, bidi dabe ela muani, tibaso te doloba pai bidi dabego augwali po tų ilama, te tama po weyu, te augwali si isimainao,” po wai dao.

46 “Tialima, ena God Genuai Bidi, eno te tiwai po obao. Te genuai hani bidi i olama, te we si penani yagasomainao. Te augwaligo augwali si wi dwai mu ilabo sę elama, te augwa te augwali sigo doado bage bisigi elama, sainu yaibao. 47 Te augwaligo te we siba masigi sąnama, te augwali si bainat hwągo enama, te augwali si isaibao. Te augwali sigo wai dabe augwaligo ela munama, te augwali sigo be tigidali isigo domainao,” wai dao. 48 “Te tiali kolesagade eno te tǫ kantride penani yali kolesaga mu sela sąwaibao, tama tigidali wego eno te sę ebo sulama, augwa te tiwai konemainu yaibao, te we sigo penani kolesaga yali tiwai sę te augwaligo munu me egobe dao waibao. 49 Dage ama nami we sigo, odao. Dage sigo penani sę hauwa eyu, tama dage sigo te tibo god dabeba lotu po wali. Tibaso, eno te dwai dene dage siba mawaibao. Te tiwai dage sigo bugagia koneao, ena digi ena God Genuai Bidi, eno te po wabo dao.” Te po wali.