1 Te Yawego agai polobadu dąų walali po wali peyu, tama agai wiegi yai olo tau sabo kolesagago te Sara dali dwagi yai sę yali. 2 Tama tiyu, Sara haliga elama, ogwa ame nani, te sogo Abraham monu dabe yai madi dao. Sarago te wai te polobadu Godigo agabolo te bodolu mani sogo tama naga ame nanio. * Hib 11:11 3 Tama Abrahamgo te Sarago ame nani ogwa nogi Aisak poalio. 4 Nosali te a naga olama, me badu sela sogo wali bidama siligi pabode, tama Abrahamgo Godigo po wali peyu, tama te ogwa Aisakgo gasa tigiwali bo togwalio. * Gag 17:12; Tpi 7:8 5 Abrahamgo digi kibu be bidi sese a naga, te 100 yia elalubadi, tama Sarago te Aisak ame nai.

6 Tama Sarago te po wai, “Godigo wiegi yai kolesaga enabolo ebaso, tama ena wiegi yai homu pemene eyu, tama ena gisugu obao. Tama tigidali bidigo te tiali po odobaso, te augwaligo wiegi yai homu pemene ena dali hodobo yaibao,” wali. * Te Hibru pogo te waigo nogi Aisak te “aga gisugu wabo,” te page elalubo.

7 Tama Sarago po ma wai, “Polobadu bidi mego e tiwai po Abrahambolo wabo usu meni yai, ‘Nago we Sarago te wai ame nenama, tama agabolo ame mawaibao,’ wabo usu meni yai. Tiali goli, megi Abraham monu dabe yai digi, tama eno agai wai ogwa te ame nanio,” Sarago te po wai.

8 Tama te wai Aisak genuai igulali. Tama aga te ame tubo tagalubo sogode Abrahamgo genuai nai ulalio. 9 Hagar te Isip bulu we, agai te Abrahamgo ogwa me deli polobadu ame nani, te Ismael dao. Tama te genuai nai tuali sogode Sarago suali, te ogwa Ismaelgo agai waibolo dwai gisugu mabo suai. 10 Tama agai Abrahambolo te po wai, “Nago te sę ebo we aga ogwa dali si sela sąyao. Te olo sę ebo wego waigo te nago doado bage bugulama, me badu me sogobeo. Te doado bage tigidali te eno wai Aisakgo nosali saibao,” wali. * Gal 4:29-30 11 Ismael mu te Abrahamgo wai, tama tibaso te pogo Abraham homu sęgę mu ilali. 12 Tiali goli, Godigo Abrahambolo walali, “Nago homu sęgę te sę ebo we Hagar aga ogwa dali tede igio. Nago te Sarago po wali pao. Te Aisakde naga te nago wąį hani wai dabe nosali pedelaibao. * Rom 9:7; Hib 11:18 13 Tama eno te sę ebo we Hagargo waigo wąį hani wai dabe, augwali me te genuai hani pedalumainu ilaibao. Magi baso meni, aga me nago wai dao,” wali. 14 Do kigamu mu te Abrahamgo te nai dali, te wę botol dali sisi elama, tama Hagarbolo mani. Abrahamgo te nai dabe te Hagar nageba anugulama, tama aga dali aga ogwa dali si ibaba olo tagala palali, gasaba.

Tialima, Hagar palima, te Berseba tǫ pedai badu subigila te bidi bidisiąwai madi biliduai. 15 Nosali te botolde wę sia sobaso, tama agai te ogwa te dwasianu ni dologode bididubadi taga soali. 16 Tama aga digibulu gana duagi pelama, homu kone palali, ‘Eno te wai isibo subo te ena hagelabo,’ te homu yai. Aga tede dulaludubadi, tama ogwa gela walio. 17 Godigo te ogwa gela wabo odali. Tama Godigo mobo bidi ensel te dagalude bidiyu, tama i olama, Hagarbolo te po wai, “Magi yaliwe, Hagar? Nage wi me elamuo. Godigo te ogwa aga bidibo madide gela wabo odalio. 18 Nage hogodasa pelama, te ogwa auwa sigi pao, tama nago pagea sao. Magi baso meni, eno te agai wai hani dabe te genuai hani pedalumainu yaibao,” wali. 19 Tama Godigo Hagar gedu pedelali, tama agai te wę ulu me deli pedalubo suai. Tama aga pelama, te wę botolde tugi pai. Tama te wę agai te ogwabolo mani, tama agai tuali. 20 Tama nosali God te ogwa Ismael dali bidibaso, tama aga genuai yai. Aga te Paran pedai badu te bidi dabe bidisiąwai madi bidali. Tama aga te bulu hasa gegebo konebo bidi mu pedelalio, te enesigi enebo sę agai mu konea pali. 21 Tama aga idago aga we me deli te Isip bulu we selama, aga ogwa mani.

22 Te sogo Abimelek te aga ami bidi tonalubo polalubo bidi Fikol dali, augwali si te Abraham bidibo madi pelama, tama po wai, “Te tigidali sę nago ebode te God nage dali bidibo dao. * Gag 26:26 23 Tialima, nago te God gedude po dąų walao, te nago enabolo me, te eno wai puluba dali me, te eno wąį hani dabe dali me, te tibo po wabo kolesaga me egobeo, te po wao. Eno wiegi yai kolesaga nagebolo yai. Tama tiwai naga nago te tibo sę isiąbo wiegi yai homu kęą pali kolesaga enaba ebadi, te nage megi bidibo tǫde bidibo we bidi me te tiwai kolesaga yao,” wali.

24 Tama Abrahamgo te po wali, “Eno tama tiwai po dąų walobao.” 25 Tama Abrahamgo Abimelek dali te aga sę ebo bidi dabe augwaligo agai ulu wę anoma bomonama sali po elalualio. 26 Tama Abimelekgo tobo wali, “Te tama tiali eno konebeo. Nago enabolo polobadu me wabeo. Megi naga eno te po odobao,” te po wai.

27 Tama tibaso, Abrahamgo te sipsip me bulmakau meba te Abimelek mawai, tama augwa si tomode po dąų walai. 28 Tama Abrahamgo aga sipsip hani tomode te a naga olama, me badu si, tama sipsip sou wai selama, tama me badu tedali dagalama, muani.

29 Tama Abimelekgo agabolo hanalu wali, “Magi baso nago tama tebawe?” 30 Tama Abrahamgo po wei ponoyu, te po wai, “Nago te sipsip wai a naga olama, me badu si, te nago sao. Te tebo kolesagade nago hanilama, te ena digi eno te wę ulu nigai da po omainogo ebao,” wali. 31 Augwa si te bulude po minama, dąų wai. Tama tibaso, te bulu nogi augwaligo Berseba nogi poai dao. † Te Hibru pogo te nogi Berseba te page si elalubao, me “te a naga olama, me badu si nedali wę ulu,” te me “te po dąų walali madi wę ulu.”

32 Augwa si te Bersebade po minama dąų olama, tama Abimelek aga ami tonalubo polalubo bidi Fikol dali, te augwali si te Filistia tǫba ma geasa pai dao. 33 Tama Abrahamgo te Bersebade te polo isisąbo ni me deli bulama, tama agai Yawego nogi weyu, gedu haluasa po wai, te aga sesemane sogo bidada peyu, bidada pabo God dao. 34 Tama Abraham te Filistia dabego tǫde sesabi gana elama bidalio.