5
1-2 “Dage pris dabe, dagego te po odiąo.
Dage Israelgo, eno poba olo bugagia muiąo.
Tama dage kingo hani, dagego odiąo.
Dagego te doloba pai po tų odobo sę elalubao,
tiali goli dagego tama me tibeo.
Tama tiyu, duga digi te po tųba dodolobao.
Dage prisgo tibo lotu te Mispade hodolama,
tama te bulu du Taborde, me te Sitim taunde tiai.
Tama te dagego te we bidi dabego homu kolesaga dolali.
Tama tiyu, dage te hasa kę,
me te hasa waba bulubo tǫ dedage tiwai elaluali.
Tama eno dage dodolomainogo eyu,
te dwai dene dage tigidaliba mawaibao,” walio.
3 “Eno te dage Israelgo dwai kolesaga koneai dao.
Dage enade geme me duala sogobeo.
Dage ena wali me asisąma,
tama dage tigidali eno gedude meda yai pedelai,
te penani ebo we tiwai yai dao,” wali.
Te Israel dabego te Genuai Bidi dali gesabidi deliba me unulugobeo
4 “Te Israel dabego te tibo godiba lotu weyu yali,
tama te kolesagago augwaligo
homu kolesaga dąų walama,
tama augwaligo te Genuai Bidi
wali me pabo meni, te usu egobeo.
Tama augwa te yali dwai kolesagago
te augwali paniama,
tama augwali te augwa Godiba ma
asabo usu isąwai dao.
5 Te Israel dabe augwa hagoma
kolesagago digi augwa ma po tų ilali.
Te augwa dwai sę yali sęgęgo digi te augwa tulaluama,
tama te Juda dabe me te augwali dali tulaluai dao.
6 Augwaligo sipsip me bulmakau
te Genuai Bidiba ofa yainu sali,
tiali goli augwaligo te ofa olodali yali.
Magi baso meni, Genuai Bidigo augwali tagalali,
tama tiyu augwaligo aga munu
ma susiąbo ąǫ yai.
7 Augwaligo te Genuai Bidi tagalali,
te wego aga bidi tagalama,
te penani ela bilibo we tiwai yai.
Tama augwa wai dabego te tama konebe,
God te augwa aya mu da homu ebeo.
Tialima, te dwasianu sogo gana,
tama te boi bidi dabego augwali dolagasaibao,
tama augwa tǫ dabe dali dolaibao,” wai.
Te Juda me Israel dabe si hwįai
8 “Dage Gibea, dage Rama, dage Betel, dage Benjamin,
te bu wabo nai biugel bu waiąo.
Bomonama i wao.
Udada peyu, te boi hwiąo.
9 Te dwai sę wei ponobo side naga
te Israel dabe mu dolaibao.
Eno te po dage Israel haniba pusubao,
mu tamao, te eno wali gilama
te sę pedelaibao,” wali.
10 Genuai Bidigo te po wai,
“Odiąo. Te Juda polalubo bidi dabego
te Israel dabego tǫ me badu wi sai.
Tama eno wado po dwai mu augwaliba wali.
Tama eno augwali dolainu ebo te wę asiyu,
te nai dabe dolobo tiwai yaibao,” wali.
11 “Te Juda dabego genuai sęgę te Israelba mawai.
Te Israel dabe te gasa king meba bidiboba pali,
tama augwaligo te augwali tau saibao homu yali.
Tiali goli, te king dabe te olo bidi tiwai,
tama augwali tau sabo usu meni yai.
12 Tama eno digi te Israel dabe me Juda dabe dolaibao,
te dwai osogani me sumadigi dabego
te nai dolobo tiwai yaibao,” wali.
13 “Te Israel dabe augwali te tiwai
te gasi dwai mu ebo koneani,
tama te Juda dabego augwa keni dabe ebo sulama,
tialima te Asiria bulu tǫ kantri
genuai kingba pelama,
te augwali tau somainu hanalugi pali.
Tiali goli, te Asiria dabego augwaligo gasi usu ilama,
tama augwaligo keni pedela somainu
ilabo usu me ebeo.
14 Megi da, ena te bomai laion tiwai pedalama,
tama eno te Israel me Juda si dali hwįaibao,” wai.
“Te ena digi eno augwali pepeda palama tagalaibao,
tama augwali te tiwai bidimainu yaibao.
Te eno augwali kekasa pelama,
te bidi me deligo augwali tau siyu,
eno nogode ma sainu ebo usu me egobeo,” wali.
15 “Te ena te ena buluba ma pelama,
te ena we bidi tagaligi pelama da,
tama te augwali te augwa yali dwai sęgęde
te dene me sęgę sabo sogoba usu somainu yaibao.
Tiali goli, nosali te augwali enaba ma asaibao.
Te augwali dwai dene siyu bolo elama,
te augwali enaba ma asaibao,” wai dao.