30
Genuai Bidigo wiegi yai sę aga we bidi dabeba yaibao wali
1 Genuai Bidigo Jeremaiabolo po mayu, te tama po wali, 2 “Ena Genuai Bidi, ena Israelgo God, eno te po obao, nago te buku me deli selama, te eno nagebolo mani po tigidali asęao. 3 Ena Genuai Bidi, eno te ena we bidiba yabo sę dąį ilali sogo elalubao, te Israel dabe me Juda te bugagia ma bidaibao. Te eno augwali te tǫ te augwa wąį nǫų dabeba polobadu mani tǫba ma odasa aselama, te augwa tǫ mu ma pedelaibao,” wali.
4 Genuai Bidigo te Israel dabe me Judade homu elama, agai te tiwai po wali,
5 “Ena Genuai Bidi, eno te po obao,
te we bidi dabe haliga dua tegaluama bidibeo.
Menio.
Augwali wi umagia mu elama,
te augwali dwai gela mu wai dao.
6 Magi basowe? Te bidi dabego wai ame nabo dawe?
Tialima, magi baso eno suali tigidali bidigo augwa
haligaba nogo mubawe?
Augwaligo te tama tebo te wego wai ame nainogo dene
genuai ebaso ebo tiwai ebao.
Magi baso augwaligo gesabidi te gasagi yai tedali dwai
mu pedaliyu,
te bidigo wi umabo ebo tiwai ebawe?
7 Homu dene mu ebao,
te dwai sogo mu me deli pedelaibao.
Te dwai sogogo te gasa dwai sogo ebo tigidali aiyaba
elalueibao.
Eno we bidi dabe, te Israel dabe,
augwali te sogo genuai sęgę elalueibao.
Tiali digi, te eno augwali ma saibao.
8 Ena Tigidali Bomo Elalubo Genuai Bidigo, eno te po obao,
te eno te boi bidi dabego te Israel dabe mageba
domonani ni nami pedai alua sąnama,
te eno augwali kalabus elaluali silimainogo yaibao.
Tama augwali te gasa hani dabego olo sę ebo bidi bidali
tiwai munu ma me bidigobeo. Menio.
9 Te augwali ena Genuai Bidi,
augwa God dologode bidaibao.
Me eno te Devitgo hani bidi me deli augwaligo king
nigilama,
tama augwali aga dologode me bidaibao,” te po wai.
10 Genuai Bidigo te tiwai po wali,
“Dage Israel, dage Jekopgo hani dabe,
dage eno sę bidi me sę ebo we,
dage wi me elama, midigi igio.
Mu tama, eno dage digibulu bulude
te kalabuside bidibadi ma saibao.
Tama dage te duga tǫba digi ma aselama,
te bugagia dugulaluagameo.
Te niwai hani me deligo dage wi me iligobeo.
11 Ena Genuai Bidi, ena dage dali bidibao,
te dage tau saibao.
Dagego te dwai sę yali dao.
Tama eno dage dodolobo sę igi menigi da,
te dolo menigi da.
Tama tibaso, eno dage e tǫde sela sąwaibao.
Te eno dage augwali tomoba te tagala palobaso
bidigi pali tǫ pedai kantri dabe te mu silaibao.
Tialima, te dage eno me silimainogo egobeo.
Mu tama, te eno dwai dene dagebolo mawaibao,
tialima, eno te doloba pai kolesaga naga wali peyu,
te eno dage dodolaibao,” wali. * Jer 46:27-28
12 Genuai Bidigo te tiwai po wali,
“Israel, te augwaligo nage dwagilama mu elama,
te nago genuai keni pedela sabeo.
13 Te nage tau somainogo enaba gedu haluasa po wabo
bidi meni yai.
Te nage tigi usu ma ilabo marasin te menia sai dao.
14 Te nago polobadu abagi wali bidi hani dabe,
augwaligo nage homu kegeda palama,
te homu godolo me ebeo.
Nago te dwai sę hauwa yali te genuai sęgę elalubao.
Tama nage eno dolama,
te sesena pai bidigo aga boi bidi dali ebo kolesaga
tiwai yali.
15 Nago te keni halubaso, te gela hauwa wabo tagalao.
Te keni me pedela sogobeo.
Nago dwai sę hauwa yali, tama nago sęgę genuai
elalubao.
Tama tiyu eno te kolesaga nageba ebo dao.
16 Tialima, mu tama, te hani dabego nage dolobo sę
ebao,
te augwa digi dolaibao.
Te nago boi bidi dabe augwali te digibulu buluba
kalabus paibao.
Te nageba dwai sę eyu,
te nago doado bage tigidali wi sali hani dabe,
te boi bidi dabego dwai sę augwaliba elama,
te augwa doado bage dabe wi saibao.
17 Te nago boi bidi augwaligo te tiwai po waibao,
‘Saion te olo nai tiwai elama, te mu dwaibao.
Te bidigo agade homu me egobeo,’ te po waibao.
Tialima, ena Genuai Bidi, eno te tiwai po obao,
eno digi nago tigi usu ma ilama,
te nago keni pedela somainogo yaibao,” wali.
18 Genuai Bidigo te tiwai po wali,
“Eno te olo mu tau sabo wiegi yai kolesaga te Jekopgo
haniba elama,
augwali tau saibao.
Te augwaligo augwa bidabo be dabe sęnama,
te augwa tǫde bugagia ma bidaibao.
Tama augwa te Jerusalem taun ma dodolama,
te polobadu elaluali pesagede ma nigaibao.
Tama augwa te kingo be aga elaluali pesagede ma sę
yaibao.
19 Tama te Israel dabego enaba buba hwi wabo tęąbi
po waibao.
Te augwa tęąbi weyu, wiegi yai pemene yaibao.
Te eno augwali hani genuai pedalumainogo elama,
te augwali dwasianu hani me bidigobeo.
Tama te gasa we bidigo augwali haniba te genuai nogi
momainogo elama,
tama te hani dabego augwali nogi aiyaba
elalumainogo me egobe dao.
20 Te Israel dabe augwali te bomai hani elalu,
te polobadu bidali tiwai yaibao.
Te eno augwali tau selama,
te augwali te augwa tǫde bugagia bidaibao.
Te eno augwaliba dwai sę yainogo ebo
hani dabeba dwai dene mawaibao.
21 Te augwa bidi dabe digi me deli te augwa tobolu
bidi pedelama,
te augwa tonalueibao.
Ena Genuai Bidi, eno te po obao,
te ena digi eno te bidi ena pageba oda saibao.
Magi baso meni, te bidi dabe augwa homugo digi
te ena pąba asobo usu egobeo.
22 Tama dage Israel te eno we bidi hani mu pedelama,
te ena dagego God bidaibao,” te po wai dao.
23 Odao. Genuai Bidigo haliga sębę te dwai sę ebo
bidi dabeba pedelainogo ebo,
te bomai wali me tulubage te augwaliba pedalubo
tiwai yaibao,
tama te poboge ebo bomai waligo te augwali tobolu
aiyaba agabo tiwai yaibao wali.
24 Genuai Bidigo haliga sębę me elaludu,
te agai yaiba homu yali sę tigidali ela siligi paboba
usu naibao.
Te nosali dagego te sę page koneaibao wai dao.