1 Te nosali te Juda bagego olo bidiyu lotu po wabo si te pedalai. Tama tebo side Jisas Jerusalem hanuba holai. 2 Tama Jerusalem bagulali obo pąde kibu sipsip dabego genuai soabo tų elalubo madi, tama te tų dolo si te dwasianu sigi ąį ge elaluai. Hibru pogo augwaligo te ąį nogi Betesda wai. Te ąį sesegede be mabo a naga elaluai. 3 Te be mabode gasi yai we bidi hauwa bidai, gedu widai bidi dabe dali, sągą dwai bidi dabe dali, tama nogo sągą dili isai bidi me, augwali te be mabode bidai. (Augwaligo te ąį memenege ebo tonaluyu bidai. 4 Me sogo deli sogo Godigo dagalude sę ebo ensel mobo bidi me deli te ąį tomoba dulama, tama te ąį te ensel bidigo memenege ilai. Te ąį memenege silai digi, tama niwai bidi me deli polasa ąįba dulali bidi da, te bidigo gasi polo silai.) 5 Bidi me deli te be mabode bidai. Te bidigo gasi elalubadi, kibu be te 38 kibu be te bidi gasi elalubadi tama yai. 6 Jisasgo te bidi pila mubo suai, tama Jisasgo koneai, te bidi gasi elalubadi, hauwa sogo mu bidai. Tama Jisasgo te bidibolo te po wai, “Nago homu da, naga tigi dwagi yai yabo homu ebowe?” Jisasgo te bidibolo te po hanalu wai. 7 Gasi yai bidigo Jisasbolo po wei ponoyu, te po wai, “Genuai Bidi, ąį memenege ebo side ena ąįba sela muabo bidi menio,” te bidigo Jisas dali te po wai. “Ena digi tama pobadi digi, gasa bidi dabe polo polasa peyu, ena geanobo dao.” 8 Jisasgo te bidibolo te po wai, “Nage hodaluama, doligulama, naga pibo somo selama, tama nage soao,” Jisasgo te gasi yai bidibolo te po wai. 9 Tama polo te bidigo tigi dwagi yai ma yai. Tama aga pibo somo selama, tama soai.

Te Juda bagego olo bidibo Sabat sogode Jisas agai te bidi geselai. 10 Tama Juda dabe genuai bidi augwaligo te gasi munaluali bidi aga pibo doado bage selama, sobadi yaide, augwaligo agabolo te po wai, “Megi da, te habu olama olo bidibo side dao. Nago pibo somo magi baso sela sobawe? Te nago Sabat sogo sę elamuo wali bomo yai po bolobao,” te Juda bagego te bidi dali te po tama wai. 11 Tiali digi agai po wei augwali dali ponoyu, te po wai, “Te ena geselali bidi agai enabolo te po wai, ‘Naga pibo somo selama, pao,’ enabolo te po wai,” wali. 12 Augwaligo agabolo hanalu wai, “Mena bidigo nagebolo te po weyu, ‘Naga pibo somo selama, pao’ waliwe?” 13 Tialima, te sana pali bidi agai Jisasgo nogi konebeo. Magi basowe? Te bulude we bidi hauwa mu elalubao, tama Jisas pai.

14 Nosali Jisasgo te bidi te Moni Lotu Be tempel tomode ma sulama, te po wai, “Odaliwe? Megi da nage usu yali dao. Nago dwai sę dabe ebo tagalao. Tiyu moni sęgę nageba pedalabuo,” Jisasgo te bidibolo te po wai. 15 Tama te bidi pelama, Juda genuai bidi dabebolo wagi pai, “Ena geselai bidi te Jisas yalio,” te bidigo Juda dabego tobolu bidi dabebolo te po wagi pai. 16 Tama tibaso, Juda dabe genuai bidi augwaligo Jisas dali boi bidi homu ebo gagalali. Magi basowe? Jisasgo te bidi geselali te Juda bage augwaligo olo bidibo side te sę yali. 17 Tialima, Jisasgo po wei ponoyu, te po wai, “Eno Aya agai sę polobadu yali sę megi tama te ela asobao. Tama eno me ena sę ebao,” Juda dabe genuai bidi dali Jisasgo te po wai dao. 18 Tama tialima, Juda genuai bidi augwaligo bomo eyu, Jisas mu elabo homu yai. Magi basowe? Augwaligo e homu yali, Jisas agai Juda bagego olo bidibo Sabat sogo bomo yai po te bolobaso naga menio. Jisas agai te po wabo, ‘God da, te ena Aya mu da’ wabo dao. Te wabo po da, Jisas aga digi aga te God tiwai pedalainogo wabuo Tama tibaso me augwaligo aga mu elabo homu yai.

19 Te Jisasgo po wei ponoyu, te po wai, “Eno dagebolo mu po tama obao, Godigo Ogwago agaduba homugo magi sę me ebo menio. Agai Ayago ebo sę naga sulama, agai ebo dao. Tigidali sę Ayago ebo, te aga Ogwago tama ebo dao. 20 Aya Godigo homugo aga Ogwa mu godola pabo, tama God agai ebo sę tigidali aga Ogwabolo ola mabo dao. Aya agai bomai sę me nosali aga Ogwabolo ola mawaibao. Tama te sęgo eno hasia yali sę aiyaba elaluaibao. Tama tibaso, dage noma siyu, homu hauwa yaibao. 21 God Ayago isai bidi ma hodolama, bidabo bomo mabo dao. Tama tibo gilama, Ogwago me aga homugo we bidibolo bidabo bomo mabo dao. 22 God agai digi agai bidi me deli agai po tų dodolobo menio. Tigidali po tų ebo sę agai aga Ogwago nogoba mawai dao. 23 Magi baso meni. Tigidali bidigo Godigo Ogwa nogi ugwaba samainogo, te Godigo nogi ugwaba sabo gilamao. God Ayago aga Ogwa e tǫba tagala palobaso, tama bidi te Godigo ogwago nogi ugwaba sisąbo bidi da, agai Godigo nogi me ugwaba sisąbo bidi da,” Jisasgo te po wai.

24 “Te eno mu po dagebolo obao, niwai bidigo eno po odama, tama te po wali pelama, tama ena tagala palali bidibolo te bidi agai bomo yai homu agabolo muyu da, te aga bidada peyu, bidada pabo bomo selama, bidaibao. Te bidi aga po tų aga dali me egobeo. Te agai isibo tagalama, tama megi aga bidabo bomode bidibao. 25 Eno mu po dagebolo obao, te sogo pedalaibao, tama te megi polo pedalalio, tama isai bidi augwaligo Godigo ogwago po odaibao. Tama te po odama wali pabo we bidi dabe da, augwali mu bidaibao. 26 Eno Aya aga bidabo bomo aga digi elalubo. Tama agai bidabo bomo aga Ogwabolo mawai. Enabolo. Tama te tiwai te bidabo bomo te aga Ogwago me elalubo. 27 Aga te Godigo Bidi Mu dao, tigidali we bidi augwaligo abagi hasi bidi dao. Tama tibaso, Ayago agabolo te we bidi po tų yabo sę mawai. 28 Dagego noma selama, tama homu hauwa egimio. Nosali me sogo pedalobo side da, gų pagede bidali bidi augwaligo te Godigo Bidi Mugo wabo po odaibao. 29 Tama augwaligo te po odobaso, tama augwali gų page tagalama, buluba dią asaibao. Me badu we bidi augwaligo dwagi yai kolesaga yali da, augwali hodaluama, bidabo bomo selama, bidaibao. Me badu we bidi augwaligo dwai kolesaga yali da, augwali hodaluama, tama po tųde sęgę saibao. 30 Eno homugo digi eno te sę ebo usu egobeo. Eno Godigo wali po naga wali pelama, tama eno po tų ebo dao. Tama tibaso, eno po tų ebo sę te dolo mu ebo dao. Magi basowe? Eno sę ena homugo me ebo menio. Te ena tagala palali bidigo homu eno wali pabo dao,” Jisasgo te po wai.

31 Te Jisasgo po ma weyu, te po wai, “Enaduba naga ena te Godigo Ogwa da weyu da, te po usu egobeo. 32 Tialima, gasa bidi me bidibo. Tama eno Aya God agai ena tau sabo po te we bidibolo pusubo dao, augwaligo eno wabo po mu po dao konemainogo ebo dao. Tama eno koneai, agai te wali po enade wabo da, te po mu po wabo da. 33 Polobadu dagego te bidi Jonbolo dagego hanalu wali po tagala palai. Tama agai po pusuyu, eno po mu po dao wai. 34 Bidi mego eno wabo po tau sabo bidi elaluyu da, te usu da. Me ma, te tobage bidi meni baso da, te me usu da. Tialima, eno homugo Godigo dage ma somainogo. Tama teyu, eno Jon badi dagebolo me eno e po obao. 35 Jon da, te sole ula ebo gilama, agai ula we bidi dabebolo mawai dao. Tama dagego pęwadage side te ulade dagego dwagi yai homu osogo yai dao. 36 Tialima eno wabo po tau sabo nai me elalubao, te moni bage mu dao. Eno Ayago enabolo sę mani, ena te sę tigidali elama, silimainogo ebao. Te sę dabe eno ebo dao. Tama te ebo sęgo me te we bidi ola menama, augwaligo konebo dao, Ayago ena tagala palobaso, ena asai dao,” Jisasgo te po wai. 37 “Tama Aya Godigo ena tagala palobaso ena asai, aga digi eno wabo po tau sabo dao. Dagego agai pedauwalidu wali po me odai menio. Tama dagego agai gesabi me munu me subeo, tama agai po me dagego homude bidibeo. 38 Magi basowe? Agai tagala palali bidigo wabo poba duga homu tigidali mubeo,” Jisasgo te po wai.

39 “Dagego te homu ebo dao, Godigo asęani po tego dagebolo te bidabo bomo menama, tama dage bidada peyu, bidada paibao. Tama te homu eyu, dagego te po tigidali sogo gegeyu, nedebo dao. Tama te asęani po aga digi enade po page ola mabo dao. 40 Tiali digi dage enaba aselama, bidabo bomo sagasobo hagela homu ebo dao,” te po wai.

41 “Te ena asali, te we bidi augwaligo enabolo genuai nogi momainogo asobeo. 42 Tiali digi eno dage koneanio. Dagego God godolo mu ebo menio, te tiwai homu dagede elalubeo. 43 Ena asali te ena Aya Godigo bomo dali genuai nogi dali selasa asiyu, asai digi, tama dagego eno po sabeo. Tiali goli, bidi me deli aga nogi dali asiyu da, teda dagego te bidigo wabo po saibao. 44 Dagego genuai nogi duga haside sabo dao. Tiali digi, dagego Godigo dagebolo genuai nogi maiabo sę te bomo elama, ebo menio. Tama tibaso, dagego eno wabo po mena tama duga homuba mugowe? 45 Dagego te eno Godibolo po tų ela mayao po waibao, te homu egimio. Eno te sę egobeo. Dage po tų ela maiabo bidi da Moses dao. Dagego homugo te bidi aga digi dage tau sabo bidi mu dao. Tiali goli agai dage po tų ela maiabo bidi dao. 46 Dagego Mosesgo asęani poba homu tigidali mu mugi sogo da, teda duga homu tigidali eno wali poba mugi da. Magi basowe? Te bidi Mosesgo enade po polobadu asęani. 47 Tialima dagego agai asęani poba duga homu tigidali musiąyu da, tibaso magila dagego eno po me mena tama odama, duga homu teba muaibawe? Dage usu egobeo,” Jisasgo te po Juda bage dali wai.