1 Te Jisas aga page bulude bidali sogo te Juda hani genuai gavman tuni bidi nogi Herot agai te Jisasgo sę ela bilibo po odai. 2 Tama agai aga sę ebo bidi dabe augwalibolo te po wai, “Te bidi aga te baptais mani bidi Jon dao. Aga te gų pagede ma hodaluali dao. Tama tibaso, te tobage genuai bomai sę te aga nogodu pedalobo dao,” te po wai. 3 Te tiwai pedelali. Polobadu te gavman tuni bidi Herotgo bidi dabe tagala palama, tama augwaligo Jon pageba pelama, tama aga bonogo nogo dųnama, tama “Aga kalabusiba muao,” po obaso, te aga kalabusiba muani. Te tuni bidi Herot aga ama Filipgo we nogi Herodias, te wego “Aga kalabusiba muao” po obaso, teba muani. 4 Magi baso meni. Polobadu Jon agai Herotbolo te po widu geai, “Nago te we sali sę te dolo menio.” 5 Tama Jongo te po obaso, Herotgo Jon ela muabo homu yali goli, aga te Juda we bidi augwalide wi yai. Augwaligo homugo te Jon aga da, te Godigo po pusubo bidi profet da te homu yai dao.

6 Tama me sogode bidi meba augwali te tuni bidi Herot dali aga beba sisinani, te aga idago aga ame nani sogo pedalobo koneama tiwai. Tama te sogo te we Herodiasgo wegi, te gesi we, te aga te augwali tomode tęąbi ela bilai. Tama Herotgo godolo mu ebaso, 7 tama agai po dąų weyu, te gesi webolo te po wai, “Mu tamao, magi nai nago enabolo hanalu obaso da, teda te nai eno nagebolo mawaibao,” te po wai.

8 Tama te wegi aga idago agabolo te homu kolesaga mani, tama agai te Herotbolo te po wai, “Nago te we bidi baptais mani bidi Jon elama, aga mage togolama, tama aga tobolu te pou me delide munama, tama selama, enabolo eba magasao,” te gesi wego te po wai.

9 Agai tama po wai, tama tuni bidigo homu sęgę yai. Tiali goli agai po dąų weyu po mu po da wali te homu elama, tama aga dali dualama nai tuali bidi dabe augwaligo me te po wabo odai. Tama tibaso, agai te po aga sę ebo bidi dabebolo wai, “Te nai agabolo mao,” te po wai. 10 Tama agai bidi me deli te kalabus beba tagala palama, tama Jongo tobolu togogi pai. 11 Tama augwali aga tobolu te pou me delide munama sela asali, tama augwaligo te wegibolo mawai. Tama agai aga ida bidibo digi selasa pai dao. 12 Tama Jon aga wali pali bidi dabe augwali aselama, aga tigi naga selama pubulai. Augwaligo pubulama, tama augwali pelama, Jisasbolo te po wagi pai dao.

13 Te Jisasgo te Jon isali po wabo odama, tama agai te bulu tagalama, tama geba me deli selama, tama ąį daidu peyu, aga te bidi meni yai bulu badu pali, aga wali pabo bidi dabe augwali naga aga dali pali. Tiali goli te we bidi augwaligo aga pali po odobaso, tama augwali te hanude bidali tagalama, tama augwali aga pali wali pai dao. 14 Tama nosali Jisas aga te gebadu pelama, te wę u badu tugi pelama, tama agai genuai we bidi bidalubo suali. Tama agai augwali homu dene mu ebaso, tama agai augwaligo gasi sai bidi dabe usu ma ilali.

15 Tama pio aga wali pabo bidi dabe augwali agaba aselama, te po wai, “Te ede bidi meni yai madigi dao, tama be pio yalio. Tama nago e we bidi augwali tagala palama, pomainao. Augwa te be nani dabeba tedela pelama, tama augwa nai abela tugi pomainao,” te po wai.

16 Tiali goli Jisasgo augwalibolo te po wai, “Magi baso augwali pomainogowe? Duga digi augwali nai mao.”

17 Tama augwaligo agabolo te po wai, “Dago nai hauwa ede munalubeo. Te a naga bret badi, te sųgų si naga munalubao,” te po wali.

18 Agai te po wai, “Te nai enabolo edaba sela asao.” 19 Tama agai te we bidi augwalibolo po olama, augwali te noswaide duada pao te po wai. Tama agai te a naga bret badi te sųgų si dali selama, tama agai dagaluba ugwaba tonaluyu, aga Ayabolo nage usu dao po wai. Tama agai te bret pedama, tama aga wali pabo bidi dabebolo menama, tama aga wali pabo bidi dabego te we bidi augwalibolo te nai dobaba pai. 20 Tama augwali tigidaligo te nai tulama, tama augwali te naigo tabiai. Tama augwaligo te nai meba munalubaso, tama te Jisas wali pabo bidi dabe augwaligo te munalubo nai sisinama, tama bonou wa 12 pągąwai dao. 21 Te tiwai te 5,000 bidi dabego te nai tuai. Augwaligo te we me te wai puluba dabe augwaligo te nai tuali goli, augwali nedebeo.

22 Tama te nai tula silama da, tama megi da Jisas aga wali pabo bidi dabe augwalibolo te po wali, tama augwali te gebaba holama, te augwali polasa te sigi ąį u badu pao wai. Tama agaduba digi te we bidi augwali tagala palainogo yai. 23 Agai te we bidi augwali tagala pala silama, tama agaduba deli naga te bulu duba holama, Godibolo po wainogo yai. Tama pio agaduba naga te bulude bidai. 24 Aga tede bidibadi, te geba te sigi ąį digibulu tomodu pobadi, tama moni bomai wali te geba sabi badu asiyu, tama te ąį dini ugwaba holoyu, tama augwaligo ąįdu todogo pabo sę dene yali. 25 Tama te be posabo magade Jisas te sigi ąį daidu pelama, aga wali pabo bidi dabe augwali bidibo gebaba pedalainogo pai. 26 Tama augwaligo aga te sigi ąį daidu asobo sulama, tama augwali moni wi mu yai. Augwaligo te po wali, “Te isi bidi me deli dao.” Augwali wi eyu, tama augwaligo hwa wali. 27 Tialima polo Jisasgo te po augwalibolo wali, “Dagego homu kęna sao. Te ena dao. Dage wi egimio.”

28 Pitago agabolo po wei ponoyu, te po wai dao, “Genuai Bidi, te nage tama da wida, teda nago enabolo olama, tama ena me te wę daidu nage pageba asao wao,’ ” te po wai.

29 Jisasgo te po wai, “Nage asao.” Tama te po obaso, Pitago te geba tagalama, tama te sigi ąį daidu te Jisas bidiboba pabo gagalali. 30 Tiali goli agai te wali asobo sulama wi yali, tama aga te ąį tomoba tigi dwasianu hoasainogo yai. Tama agai bomonama i weyu, te po wai, “Genuai Bidi, nago ena tau sao,” te po wai.

31 Tama polo mu Jisasgo nogo munama, Pita nogogo tola sali, tama agabolo te po wai, “Nago naga homu tigidali enaba mubeo, dwasianu naga mawai. Magi baso nago homu si ebawe?” 32 Tama augwali si te gebaba hola soabo side da, tama te moni wali sia sai dao. 33 Tama te gebade bidali bidi dabe augwaligo agabolo aga nogi ugwaba sabo po weyu, augwaligo te po wai, “Mu tama, nage te Godigo Ogwa dao,” wali.

34 Augwaligo te sigi ąį nogolama, tama augwali pelama, te Genesaret te badu tugi pai. 35 Tama te bulude bidibo bage augwaligo koneani, te aga Jisas dao. Tama augwaligo te pąde elalubo be nani tigidali dabeba po todolo pela silama, tama augwaligo haniani gasi yai we bidi dabe tigidali aga pageba selasa asai. 36 Tama augwaligo agabolo hanaluyu, te gasi yai we bidi augwaligo nogo naga te agai ugwa sesegeba mumainao wai. Tama te gasi yai we bidi dabe augwaligo te tiwai yali bage tigidali augwaligo gasi usu ma ela silai dao.