1 Te Senbalat, me Tobia, me Gesem, me te dago boi bidi mebago te po odali, te dago te moni masigi obo ma geselebo sę tigidali silali po odali, tiali goli dago te sunumi musiąbadi dao. 2 Tama te Senbalat me Gesem sigo te po enabolo ola tolali, tama enabolo hanalu, te augwali si dali te bulu me deliba sisinaibao wali, te odogo bulu nogi Onoba sisinibo da wali. Tiali goli, eno koneai, te augwaligo ena muma sabo po olama, te augwaligo ena dolainogo wabo homu yai. 3 Tama eno augwali siba te tiwai po te bidi mebago wagi pomainu tagala palali, “Nehemia te genuai sę me deli ebao, tama tiyu agai te sę taga soyu, dage suagasabo usu egobeo. Te aga asobaso da, te sę bidi dabego te sę me egobeo.” Eno te po ola tolali. 4 Tiali goli, te bidi sigo te wali po tiwai naga te ena dali me si me si sogo wali, tama tigidali sogo eno te po wei ponoyu, te wali po tiwai naga augwali dali wali.

5 Nosali Senbalatgo enaba po ma ola tolali. Tama te sogo agai asęani pas te halusiąwai. Agai te aga sę bidi me delibolo menama, te enaba tolali. 6 Te pasde wali po te tiwai, “Ena Senbalat, eno Gesemgo te tiwai po wabo odai, te da pąde bidibo we bidi hani tomode te po me deli sabilibo odali. Tama te sabilibo po te tiwai wai, nage dali, te gasa Juda dabe daligo te king dologode munu ma bidigobeo olama, tama dagego hwįnama, te duga gavman tedali hodolainu yali. Tama te pagede naga dagego te obo banis ma geselebao. Tama nago me te naga digi te king pedalumainu ebo dao. 7 Tama nago te profet mebabolo walama, augwaligo te tiwai po te Jerusalem tomode pusumainogo yai, ‘Megi da, te da Juda dabe dena digi te king elalubao.’ Eno te sabilibo po page bugagia koneainu ebao, tama tiyu, eno homugo dadi si deliba sisinama, te po dodolainu homu ebao, tiyu king aga digi nagede augwaligo te wali po odabuo,” Senbalatgo te tiwai po asęna tolali.

8 Tiali goli, eno agai pas wei ponoyu, te tiwai po wali, “Nago te asęani po tigidali, te mu po menio. Te naga digi te po naga homude hodolama wali dao.” Eno te pas asęnama, agaba tolai dao. 9 Eno koneani, Senbalatgo hani dabe daligo te pogo da wi ilabo po wali homu yai. Augwaligo homugo dago te sę tagalama, tama dago te obo banis sę silisąmainu homu yali. Tiali goli, eno Godiba gedu haluasa po e tiwai wali, “God, te augwaligo wabo po tagalao. Eno homugo nago ena te sę ebode dąų walomainu ebao,” wali.

10 Nosali ena pelama, te Semaia sugi pali, te Delaiago ogwa, tama wąį nǫų Mehetabelgo wai dao, magi baso meni, aga te gasi elalu, te aga be taga pabo homu isąwani. Tama agai enabolo te tiwai po wali, “Dadi si te Godigo tempel beba peyu, tama te Tedali Gasagi Yai Be Habu tomoba geme duala sigi pinao,” wali. “Tama dago te be sunumi dabe paliaibao, magi baso meni, te boi bidi dabe te megi hulide aselama, nage elaibao,” wali.

11 Tiali goli, eno agabolo te tiwai po wei ponani, “Ena te wi ebo bidi dabe tiwai elama, tama te wi peyu, te geme me duala sigi pogobeo. Tama ena te wi pelama, te Godigo be tomoba geme me duala sigi pogobeo. Mu menio,” wali. 12 Nosali te pode eno bugagia homu kone palama, te tiwai eno koneani, Godigo te tama po te Semaiabolo me wabeo. Menio. Eno koneani, Tobia de Senbalat sigo aga abelama, te po ena dali omainogo yali homu yai. 13 Augwali sigo homugo te Semaiago pogo ena wi ilama, tama ena te Tedali Gasagi Yai Be Habu tomoba pomainu elama, tama te habu selai kolesagade ena sęgę somainu yali. Tama tibaso, te augwaligo eno nogi dolama, tama ena aiyaba elalueinu yai. 14 Tama tibaso, eno gedu haluasa po wali, “God, nago megi te Tobia de Senbalat sigo enade yali kolesagade homu koneama, te augwali sibolo dwai dene mao. Tama nago te profet we nogi Noadia me homugo koneyu, te gasa profet dabego me te ena wi iliyu, te haniani po wabo dao,” wali.

15 Te dago te Jerusalem moni masigi obo ma geselali, te 52 dei tama usu nama yali, tama te 25 dei, te polua sogo nogi Elul usu nama, te obo ma geselebo sę silai dao. 16 Tialima, te dago boi bidi dabe te da pąde bidibo bulu tǫ pedai bidi dabego, dago te obo nigila silali po odali, tama augwaligo koneani, te Godigo digi da tau sobaso, dago te sę yali da homu yai. Tama augwa koneai, te augwaligo dwai kolesaga da dali yainu yai, te geda munama, tama te augwaligo nogi aiyaba tulaluai dao. Tama tibaso, augwali wi yai.

17-18 Te da Juda dabe tobolu bidi hauwa te Jerusalemde bidalu, tama augwaligo te Tobia tau sabo po dąų walali, magi baso meni, te da bidi mebago wąį ma base dao. Tobiago te Sekaniago wegi sai, te Arago ogwa dao. Tama me Johanan, te Tobiago ogwago, te Mesulamgo wegi sali, te Berekiago ogwa da. Tama dago te obo banis sę geselebo sogo, te tobolu bidi dabe dali, te Tobiago me, te pas hauwa ugwaba, edaba toloduai dao. 19 Tama te tobolu bidi dabego enabolo te Tobiago wiegi yai kolesaga ebo po pusagasai. Tama augwaligo te Tobiabolo te eno ebo sę po tigidali pusigi peyu yai. Tiali goli, Tobiago te pas hauwa enaba tolali, te ena wi ilibo pas tolai dao.