1 Te we bidigo sęgę dabe augwali tigide pedalobaso, augwaligo konila po wabo Genuai Bidigo odali. Tama tibaso, aga sębę dwai mu elama, tama agai isi te we bidi bidibo pesageba taga palali. Tama te isigo te bidibo pesage me badu bogo badu dali. 2 Te tama tibaso, te we bidigo Mosesgo augwali tau somainu i wali. Tama Mosesgo augwaligo po odama, agai Godibolo gedu haluasa po wabode te isi sula sali.

3 Tama augwaligo te bulu nogi augwaligo e tama nogi yali, Tabera wali, te po page da “Isigo dai.” Magi baso meni, Genuai Bidigo isigo augwali dai madi dao.

4 Te gasa bulu we bidi Israel dabe dali aselawai bage me elaluali. Augwali bulu hasa hauwa tubo we bidi dao. Tama tibaso, augwali hasa hauwa tuaio po hauwa mu kųą pali. Tama te Israel dabego me te po hauwa tama wali, “Dago te hasa hauwa tuaio. Tiali goli, dago menade sogowe? 5 Te Isipde dago sųgų hauwa olo selama, tuyu yai dao. Me, dago te haniani bobi, me melen, me haniani aniani me sai dao. 6 Tiali goli, megi da, dago bomo pela silalio, tama dago nai menio. Te nai mana naga elalubo da, te nai hagela mu dao,” wali.

7 Mana te dwasianu bin ge tiwai nai dao, tama aga tigi poai te bunu dabego mege tiwai dao. 8-9 Tama te bidibo pesagede hulide te tulubage segeni eyu da, te mana dali tama tulalubo dao. Tama kigamu hulide we bidi te pesagede bilaluyu, te mana tama sesa bilibo dao. Tama nosali augwaligo masigi du selama dilama, ma ni dagego haluama plaua nigilama, tama nosali augwaligo meba selama, senede ulama, augwaligo bisket nigibo dao. Te augwaligo tubadi, te bret augwaligo oliv wel dali ulai bret tubo tiwai ebo dao. * Sai 16:13-15, 31

10 Tama te we bidi augwa we wai puluba augwali augwa ugwa be mabode dolalua peyu, gela weyu yali. Tama Mosesgo augwali gela wabo odali. Tama Genuai Bidigo augwali dali sębę genuai mu ebaso, Moses aga homu sęgę yali, 11 tama Genuai Bidibolo e tama po walali, “Nago magi baso ena dali dwai sę yaliwe? Magi baso nago ena dali wiegi yai homu ebewe? Te me nago magi baso te we bidi tonalubo sę enadubabolo mawai dawe? 12 Tama eno augwali tabide pedalumainu yai menio. Tama me ena we gilama augwali ame nai menio. Te tama tialima, nago enabolo te wai tolalubo we yali gilama, magi baso eno nogode tolalua po waliwe? Te Isip tǫdu gagalama, te nago augwaligo wąįbolo mawaibao olama wali te tǫba usu nigi paibawe? 13 Te we bidi augwali hasa dabe hagede gela olama, enabolo hanalubo. Tiali goli, eno te hasa dabe menade sogowe? Ena usu munu me egobeo. 14 Enaduba deligo naga te we bidi tonalubo usu egobeo. Eno usu me egobeo. 15 Ma, nago te sę ena dali tama tiainogo da, teda nago ena hobede elama, nago ena elama, isilao, tama eno te bomai sę me te sęgę tologobeo,” Mosesgo te po wai.

16 Tama Genuai Bidigo Mosesbolo e tama po wali, “Nago 70 genuai bidi dabe ena pageba sesao. Tama nago augwali eno ugwa beba odasa aselama, tama augwali nage dali dolalumainao. 17 Tama ena aiyaba dulama, nage dali po waibao. Tama eno nagebolo te mani te mobo bidigo bomo meba selama, tama eno augwalibolo mawaibao. Tama augwaligo nage tau selama, te bidi dabego sęgę augwaligo me tolomainao, tama nagaduba deligo nago te sęgę tigidali me tologobeo. 18 Megi te we bidi dabebolo e tama po walao, ‘Dagego te Godigo gedude wiegi yai pedalobo kolesaga wali piąo,’ po wao. E po me augwalibolo wao, ‘Tama dagego do te mi tuabo nai sabo kegaluao. Genuai Bidigo dagego hasa hagede gela wabo te polo odalio. Tama dagego dage Isipde bugagia bidai dao wabo po me, Genuai Bidigo polo odalio. Tialima, megi da, odao, Genuai Bidigo dage hasa menama, tama dagego tuiagameo. 19 Dagego te hasa dabe tuabo te deli sogo o si sogo, o a naga sogo, o nogo si sogo, o 20 sogo me tugobeo, menio. 20 Dagego te nai mi dabe te tudubadi polua deli pelama, tama dage boguabo homu elama, tuabo hagela yaibao. Genuai Bidi dage tomode te bidibao, tiali goli dagego aga tudi ola menama, tama dagego aga dali wado po wali weyu, e tiwai po wali dao, “Magi baso dago Isip tagalama asaliwe?” Dagego te tama kolesaga yalio. Tiali, megi te nai dabe dageba megi pedalaibao.’ Te tama po augwalibolo pusao,” Genuai Bidigo Mosesbolo te po wai.

21 Te Mosesgo Genuai Bidibolo e tama po wei ponani, “Genuai Bidi, odao. Eno te 600,000 bidi dabe tolalubo dao. Tama nago te po wali, ‘Augwalibolo te polua delide tuabo te hasa dabe mi mawaibao,’ po walio. Tiali goli, nago te hasa dabe menade gegelama, augwali mawaibawe? 22 Dago te tigidali sipsip me kau kibu dabe sese eliyu da, augwali sese usu egowe? Ma, te genuai tamu ąįde elalubo sųgų dabe augwali sese mu siyu da, augwali sese usu egowe?”

23 Tama Genuai Bidigo Mosesbolo po wei ponoyu, e tama po wali, “Te eno bomo usu meni yali bogo. Te pęwadage sogo tama nago suaibao. Tama nago koneama, nago homugo eno nagebolo mawaibao wali te nai te yabao po waibao. Te nai pedalogowe, ma meniwe?” wali.

24 Mosesgo te po oda selama, tama aga buluba pelama, tama te be bulu badu bididuali we bidibolo Genuai Bidigo wali po pusigi pali. Tama agai 70 tobolu bidi dabe sisinama, tama augwali te lotu be bagulama dolaluao po wali. 25 Nosali Genuai Bidi te pǫ dulude bidama, te tǫba dulama, tama Moses dali po wagasali. Tama nosali Genuai Bidigo Mosesbolo mani mobo bidigo bomo meba selama, te 70 tobolu bidi dabebolo mani. Tama te bomo augwaliba asobo si da, teda te pęwadage sogo tama augwaligo te profet bidi dabego po pusubo tiwai pusali.

26 Tiali goli, te 70 tobolu bidi dabe tomode bidi si, te Eldat me Medat, augwali si te bede bididuai, tama augwali si te meba tobolu bidi dabe dali te name ugwa beba pai menio. Augwali si te bede bidibadi, tama Genuai Bidigo te mobo te augwali sibolo mani, tama augwali sigo te profet dabego wabo po tiwai wali. 27 Tama gesi bidi me udalama, Mosesbolo te po waligi pali, “Eldat me Medat si bede bidiyu, te profet bidigo wabo po wali.”

28 Te Josua, Nungo ogwa, Moses dali bididuali. Te Josua aga te Moses tau sabo bidi, aga gesi bidide bida bida asudama, megiba tama usu nagasali. Tama Josuago te gesi bidigo wabo po odama, agai e tama po te Mosesbolo walali, “Genuai bidi, nage pelama, augwali sigo pedauwali panigi pao,” wali.

29 Tiali goli, Mosesgo te po wei ponoyu, e tiwai po wali, “Nago homugo ena bidi mebago hasegelaiba homu sęgę ebawe? Homu sęgę tagalao. Eno homugo Genuai Bidigo agai mobo bidi tigidali we bidibolo menama, tama tigidali we bidigo profet bidigo po omainao.” 30 Mosesgo po ola silama, aga dali te Israel dabego tobolu bidi dabe dali augwali beba ma pepela yali.

31 Tama te Genuai Bidigo moni genuai wali te tamu ąįde pedalomainogo elama, te waligo te ba sibi hauwa mu te wan mita tama ugwadu te tǫba bola asali. Tama augwali te bidi dabe bidibo pesage tomoba, me te bidibo pesage bogo badu dabe me duadua peyu tama yali. Augwaligo te kilomita hauwa mu te tǫ mesesege pelama elaluali. Te augwali bidibo pesage nigilama bidali tǫ sesegede tigidali tama. 32 Tama te we bidigo te ba dabe sabo sę te hulide me, ulade me yali. Tama me sogo be posobode me, augwaligo te tiwai sę naga yali. Tama te we bidi sesego ba dabe hauwa sali, te 1,000 kilogram usu nama deli deligo mu sali, tama we bidi mebago ba hauwa mu sali, te 1,000 kilogram edelama ba sali. Tama augwaligo te ba dabe pesalama, tama te be mesalo dabede giligade nani elama wialali, te giligago te ba mi omainu. 33 Tama te we bidi dabe augwaligo te ba dabe tubo gagalo pobadi yaide, deli sogo tama Genuai Bidigo te we bidi dali sębę yali, tama agai moni gasi tagala palama, tama we bidi hauwa isali. 34 Tama augwaligo te we bidigo tigi te bulude pubulali. Tama augwaligo te bulu nogi e tiwai polali, “Te hasa tuainogo gela wabo we bidigo gų page dao.” 35 Tama nosali augwaligo te bulu taga pelama, te Haserot buluba pesage nigigi pali.