1 Genuai Bidigo Mosesbolo e tiwai po walali, 2 “Nago koneani, te kantri bulu Kenan eno dage Israel dabebolo maiabo homu ebo nago koneanio, tama tialima, nago te 12 hani tomode deli deli tobolu bidi sa mumuna pelama, tama augwali te Kenan bulude tigidali tǫba sa susa biligi pomainogo tagala palao,” wali.

3 Mosesgo Genuai Bidigo po odama wali peyu, augwali te Paran bulu kemi sane yai bulude bidiyu, agai te hani tobolu bidi dabe tagala palali. 4 Augwaligo nogi te e dao: Samua, te Sakurgo ogwa, te Ruben hani dao. 5 Safat, te Horigo ogwa, te Simeon hani bidi. 6 Kalep, te Jefunego ogwa, te Juda hani bidi dao. 7 Igal, te Josepgo ogwa dao, te Isakar hani bidi dao. 8 Hosia, te Nungo ogwa dao, te Efraim hani bidi dao. 9 Palti, te Rafugo ogwa dao, aga te Benjamin hani bidi dao. 10 Gadiel, te Sodigo ogwa dao, aga te Sebulun hani bidi dao. 11 Gadi, te Susigo ogwa dao, aga te Manase hani bidi dao. 12 Amiel, te Gemaligo ogwa dao, aga te Dan hani bidi dao. 13 Setur, te Maikelgo ogwa dao. Aga te Aser hani bidi dao. 14 Nabi, te Vopsigo ogwa dao. Aga te Naptali hani bidi dao. 15 Me Guel, te Makigo ogwa dao, aga te Gat hani bidi dao. 16 Mosesgo te hani tobolu bidi dabe te Kenan bulu tǫ sese sa sugi pomainu tagala palali. Tama agai te Hosia te Nungo ogwago nogi hasegelali. Tama agai aga te Josua poali. * Te bidi nogi Hosia te “Ma dobola sabo,” te tama page elalubao. Tiali goli, te nogi Josua page te “Genuai Bidigo ma dobola sabo dao,” tama page elalubao

17 Te Moses agai augwali tagala palainu, agai augwalibolo e tiwai po walali, “Dage pelama, te distrik Negev ela pelama, ugwadu bulu du dabeba piąo. 18 Dagego bugagia suiąo, tama dagego koneiąo, te mena tiwai bulu yaliwe koneagameo. Tama dagego suiąo, mena tama we bidi te bulude bidibawe weyu suiąo, te augwali bomai hani yaliwe, ma meni yaliwe, suiawe? 19 Tama me dagego bugagia mu suiąo, te bulu tǫ te dwai yaliwe, ma wiegi yai yaliwe suiąo. Te we bidi te bomai obo tomode bidibowe, ma olo obo meni yai hanude bidibowe, suao. 20 Tama bugagia suiąo, te tǫ ili elalubowe, ma meniwe? Me te dulu elalubowe, ma meniwe, suao. Tama dagego te bulude ni du wai dabe me selama sesiąo. Dage olo ma aselamu dao.” Mosesgo augwalibolo te po te ni wain du tau ebo gagalobo sogo te po augwalibolo mani.

21 Tama te bidi dabe augwali te bulu tǫ dabe tigidali mu sa susa biligi pali. Te giliga asobo badu wę meni sane bulu badu gagalama, te saut badu usu nigi pali, tama te hanu Rehopba saboligi pali, te hanu Hamatba pabo sunumi pąbadu te not badu. 22 Hasia augwali te distrik Negev sabolama, tama augwali te hanu Hebronba pali. Te Ahiman de Sesai, me Talmai hani, te Hebronde bidali. Augwali te hani sela te augwaligo wąį te Anak hani dao. Te hanu Hebron te gasa bidi hanigo bolo hasia nigai, tama te kibu be a naga olama si nosali te Isip hanigo te hanu Soan nigai dao. 23 Tialima, te Israel tobolu bidi dabe augwali te Eskol † Te po Eskol page e tiwai dao, “Te ni wain du hauwa walali.” odogo yai buluba sabolama, tama augwaligo te ni wain du hauwa yai ni nologo deli togali. Te ni nologo sęgę mu yali, tama bidi deligo tolabo usu meni yani. Tama tibaso, bidi sigo ni palama dedage elama tolali. Te me augwaligo te ni fik du dabe me, pomigranet du dabe me, tama sali. 24 Nosali Israel dabego te odogo yai bulu nogi Eskol poali. Magi baso meni, te genuai bidi dabe augwaligo te pesagede ni wain du tede sai dao weyu.

25-26 Augwaligo te bulu bidi sese si sogo sa susa bilama, nosali augwali te Moses, me Aron, me te Israel we bidi dabe pageba ma aselayali. Augwali sese te bulu Kades te nai meni yai bulu Parande bidibadi. Tama te tobolu bidi dabego augwaligo suali nai po pusigi pali, tama augwaligo te sesali nai te we bidibolo waselali. 27 Tama augwaligo Mosesbolo e tama po wali, “Te nago dabolo sugi pao wali, te kantri bulu dago polo sugi pai dao. Tama te bulu tǫ wiegi yai mu elama, tǫ ili mu yai yali. Suao. Dago te bulu nai meba du sesali dao. 28 Tiali goli, te bulu bidi dabe augwali bomai bidi dabe mu bidama, augwaligo hanu dabe genuai mu dabe elama, tama bomai obo mu elaluali. Tama me dago te Anakgo wąį wai puluba dabe bidibo suali. Augwali te moni moni bidi dabe. 29 Te Amalek dabe te saut badu bidibo, te Negevde. Tama te Hit dabe me, Jebus hani dabe me, Amor hani dabe me, augwali te bulu du badu bidibo suali. Tama te Kenan dabe te genuai tamu ąį Mediterenian pąde bidibo, tama me badu te wę Jordan sesegede bidibo,” augwaligo te po wai.

30 Te Israel dabe augwaligo te tobolu bidi dabego po odama, augwali wi yali. Tama augwaligo Mosesbolo po hauwa wali. Tiali goli, tobolu bidi me deli, aga nogi Kalep, agai augwali daga bola sąyu e tama po wali, “Dage magi baso po hauwa wabawe? Megi da augwali dali hwįgi pelama, augwaligo tǫ sigi pinao. Magi baso meni. Dago bomo elalubao, tama dago augwa aiyaba elaluaibao, tama dago te tǫ saibao,” wali.

31 Tiali goli, te meba tobolu bidi dabe te Kalep dali te bulu sugi pali, te bidi dabe augwaligo te po wali, “Mu menio. Augwali bomo mu elalubao. Dago augwali dali hwįbo usu egobeo,” te po wai. 32 Tama tialima, augwaligo te Israel dabebolo te augwaligo suali bulu po tibo po ola mani. Augwaligo e tama po wali, “Te bulu tǫ te dwai mu dao,” wali. “Te dwasianu nai dabe naga holiyu, te we bidi nai habuge ebo. Tama tialima, te bulu da usu egobeo. Tama tigidali we bidi dago suali, augwali te dili bobobage yai bidi dabe mu. 33 Tama dago moni bobobage moni bidi dabe mu bidibo suali. Augwali te Anakgo hani dao. Dago augwali sulama, dago homugo tiali da te olo nai te kuli mano tiwai dao homu yali. Tama me ma, augwaligo da suali, te kuli mano tiwai tonani,” augwaligo te tobage tibo po wali. * Gag 6:4