108
Bidigo te gedu haluasa po obaso, te Godigo aga we bidi tau saibao
1 God, eno homu te sisi ilama, dodolali
elalubao.
Megi da, te eno tęąbi weyu,
tama nago nogi ugwaba saibao.
Ena me pigobeo, te ena hogodama tama tiaibao.
2 Eno te gita me eliyu, tama musik waibao.
Te kigamu mu te eno tęąbi waibao.
3 Genuai Bidi, te eno nageba usu da wabo po
te gasa hani dabe tomode waibao.
Te eno nago nogi te augwali tomode ugwaba saibao.
4 Te sesemane sogo nago da wei mu ebao.
Te nago wei ebo homu te genuai mu dao.
Tama nago te nago po sesemane wali pabo dao.
5 God, te dagalude nago te genuai bomo elalubo
nago te tigidali we bidiba ola mao,
tama tigidali bulude te tigidali we bidigo
nago genuai nogi konemainu yao.
6 Nago da wei mu eyu,
tama nago dago gedu haluasa po wabo odolama,
tama nago genuai bomogo nago da ma selama,
tama da bugagia bidimainu yao.
7 God te aga tedali wiegi yai bede bidiyu, te po wai,
“Eno te hwįani aiyaba elalubaso,
tama ena te pemene elama,
tama te Sekem dobayu, tama te Sukot bulu odogo
te ena we bidi dabeba dobawaibao.
8 Gileat dali Manase, te eno dao.
Efraim te eno kapago nigai tobolu madi tiwai gagawali.
Tama Juda te king bidigo wiegi yai dono tiwai dao.
9 Tiali goli, Moap te eno wę paubo
dis pǫu gagawai tiwai,
tama Idom te eno su mubo pesage tiwai dao.
Tama ena pemene elama,
tama eno te Filistia dabe aiyaba elaluali i waibao.”
10 God, dego ena augwaligo te bomonama bagulali
te taun tomoba odasa pogowe?
Tama dego ena te Idomba odasa pogowe?
11 God, nago da tudiba muani da, agawe?
Te nago dago ami dabe te tau sogobe da
homu ebo da, agawe?
12 Te dago boi bidi dabe dali hwįbo tau sao,
magi baso meni, te bidi dabego naga da
tau me sogobeo.
13 Te Godigo da tau sobaso da,
teda dago te hwįbo ugaba ela holaibao.
Tama aga digi te boi bidi dabe aiyaba elaluaibao.