1 Te pou elaluali a naga olama me badu nogo si ensel mobo bidi augwali tomode me deli te aga asama, enabolo te po wai, “Nage suagasao. Te penani ebo we te genuai ąį dabe ugwadu daide dulaluali, aga te yali dwai sęde dwai dene mu sabo sę, eno nagebolo te sę ebo ola mawaibao. * Jer 51:13 2 Te haniani tǫde tuni bidi augwaligo penani sę ebo kolesaga hauwa te we dali yali dao. Tama tigidali tǫde bidi dabe augwaligo me te we dali te penani ebo kolesaga eyu, tama augwali te kolesaga meni yai bidi tiwai eyu, te bomai ąį tuai bidi tiwai yai dao,” te ensel bidigo enabolo te po wai. * Ais 23:17; Jer 51:7

3 Tama agai enabolo te po olama, tama agai eno noma bidi te bidi meni yai tǫba selasa pai. Te tǫde eno te we me deli aga te mama yai genuai dwai hudigi ebo hasa daide ugwadu dulalubo suai. Te mama yai dwai hudigi ebo hasa tigide te Godigo nogi posobo po hauwa asęna pągąnaluai. Tama aga tobolu a naga olama me badu nogo si elaluai, tama te gąų nogo si me te hasago elalubo eno suali. 4 Te we agai te mama yai bobage ugwa me, te pe yai ugwa me muani, tama te ugwade haniani au yai te kapa golgo nigai nai elaluali, tama te wiegi yai au yai nai augwaligo gasa haniani wiegi yai masigi dali te bis dali sigo nigai. Tama te we agai nogogo te gol kap tolaluai. Tama te dwai damua pai haniani kolesaga me, te haniani dwai meda yai kolesaga te penani wego yali, te dwai kolesaga tigidali te kapde pągąnaluai. 5 Tama aga te dwai sę yali nogi aga gebode asęai elaluai. Te nogide te geme dualali page elaluali, tama te nogi aga digi te e dao: “Genuai hanu Babilon, te tigidali penani we dabego ida mu, tama te tigidali tǫde elalubo dwai dwai meda yai kolesaga augwaligo ida me dao,” te po te penani wego gebode asęani, te eno suali. 6 Tama te we agai te Godigo po wali pabo we bidi augwali dali te Jisasde homu kęą pai we bidi dali augwali te wego ela munama, tama eno suali te wego augwali kaneme tulama te kolesaga meni yai bidi tiwai aga yai.

Eno te sulama, ena noma mu siyu, tama eno homu hauwa mu yai. 7 Tama te ensel mobo bidigo enabolo te po wai, “Magi baso nago noma siyu tama homu hauwa ebawe? Te eno te wede geme dualali po page nagebolo ola mawaibao. Tama te dwai hudigi ebo hasa tobolu a naga olama me badu nogo si me, te nogo si gąų tobolude elaluyu, tama te naigo te we selasa pabo. Agade me te geme dualali po page nagebolo ola mawaibao. 8 Te nago suali dwai hudigi ebo hasa aga polobadu bidai, tiali goli megi aga me bidibeo. Tamadi tama agai te page meni yai tǫ dedage tagalama, tama aga edaba holama, tama aga pelama, aga mu dolaibao. Polobadu mu te Godigo te tǫ nigisiąbadi agai te augwali isiąma gamonaibao wali we bidi nogi te bukude asęai dao. Tama te bukude nogi asęsiąwani te tǫde bidibo we bidi augwali tigidaligo te hudigi ebo hasa sulama, tama augwali homu hauwa eyu, aga nogi ugwaba saibao. Magi basowe? Polobadu aga bidai, tama megi aga me bidibeo, tama nosali aga ma pedalaibao,” te ensel mobo bidigo te po enabolo wai.

9 Te po me agai enabolo wai, “Te dwai hudigi ebo hasade te dwagi yai homu kolesaga elalubo bidi agai bugagia kone palao, te hasade po page kuna konemainogo yao. Te a naga me badu nogo si tobolu te tiwai te a naga olama me badu nogo si bulu du dao, tama te penani we te bulu du dabe daide ugwadu dulalubo dao. 10 Tama te tobolu dabe augwali te tuni bidi a naga me badu nogo si me tiwai dao. Tama te tuni bidi dabe tomode te a naga dolai, tama me deli megi bidibao, tama me deli nosali pedalaibao. Nosali aga pedalobo si, teda aga te dwasianu sogo naga bidaibao. 11 Tama te polobadu bidali dwai hudigi ebo hasa, tama megi aga me bidibeo, te aga digi aga te a naga olama me badu nogo sela wali tuni bidi dao. Tiali goli aga te gasa tuni bidi a naga olama me badu nogo si te hanigo deli hani bidali. Tama tiyu, aga pelama tama aga dolama, tama mu hagawaibao.”

12 “Tama te nago suali te nogo si gąų, te gąų dabe te tuni bidi nogo si tiwai dao. Megi augwaligo te tuni bidi bomo me sabeo. Tiali goli augwaligo te tuni bidi bomo te dwai hudigi ebo hasa dali selama, tama augwali aga dali te dwasianu sogo naga we bidi tonalubo sę yaibao. * Dan 7:24 13 Tama te tuni bidi nogo si augwaligo homu deli naga elaluyu, tama augwaligo augwa genuai nogi me, te bomo me, te tigidali te hudigi ebo hasabolo mawaibao. 14 Tama menama, augwaligo te Kibu Sipsip Wai dali hwįaibao. Tiali goli, te Sipsip Waigo augwali aiyaba mu elaluaibao. Magi baso meni. Aga da te genuai bidi dabe tigidaligo Genuai Bidi dao, tama aga te tigidali tuni bidigo genuai tuni bidi aga dao. Tama aga dali bidibo we bidi te augwali agai i olama, tama augwali agai gasa we bidi tomodu dią selama, tama augwaligo homu agade mu kęą peyu bidibo we bidi hani dao.”

15 Tama te ensel mobo bidigo enabolo te po wali, “Nago te genuai ąį dabe, te ąį daide ugwadu te penani we dulalubo suali. Tama te ąįde po digi po begelama wali te po page e dao: te ąį wali da, te haniani genuai tǫde bidibo we bidi me, te tigidali hani we bidi me, tama te tigidali haniani tigi yai me, te tigidali haniani po wabo bidi hani me, augwali te genuai ąį dabe elalubo tiwai dao. 16 Tama te nogo si gąų nago suali, te dali te dwai hudigi ebo hasa dali augwaligo te penani we dali boi bidi yaibao. Te penani we augwaligo aga mu dolama, tama agai ugwa dabe me tigidali doado bage dolaibao. Tama augwaligo agai tigi mi tuyu, tama aga tigi tigidali siago domainogo ulaibao. 17 Magi baso meni. Godigo augwali homu kolesaga mawai, tama augwaligo te sę emainogo eyu te polobadu agai te po wai. Te augwaligo homu deli naga eyu, tama augwali tuni bidi bidainogo te bomo sai, augwaligo te bomo tigidali te dwai hudigi ebo hasabolo mawainogo yai. Te augwaligo tama tede pidubadi, te Godigo te penani wede wali poba te usu nainogo tiaibao.”

18 “Tama nago te suali we, agade te po digi po begelama wali te po page e dao, te we da te genuai hanu, te tigidali tǫde bidibo tuni bidi dabe tonalubo tobolu hanu dao,” te ensel mobo bidigo te po enabolo wai.