Godigo sęgę yali si hasegelama, wiegi yai homu pemene ebo si pedelemainu ilaibao
7
(Dąį 7–8)
Godigo te nai gisilainu tibo po olama habu selebo pode wado po wali
1 Te Darius king bidibadi te kibu be me si me si wabo, te kibu bede te namba 9 poluago namba 4 deide, te polua Kislev wabo, Genuai Bidigo po me deli enabolo mani.
2 Tama te Betel we bidigo te Sareser me Regemelek me bidi meba ebadi augwaligo Tigidali Bomo Elalubo Genuai Bidigo beba tagala palali. Augwali pali da, Genuai Bidigo augwali dali wiegi yai sę emainu gedu haluasa po wagi pomai tagala palali. 3 Tama augwaligo te pris dabe me profet bidi dabebolo e tama tiwai po hanalu wainu pali, “Genuai Bidigo be dolai elalubadi kibu be hauwa mu pali dao. Tama dago agaba me gela udubao. Tama dago tigidali a naga poluade nai habu selama gisilabo po bodolu muyu yalio. Tialima dago me tama tiduaiba, agawe?”
4 Tialima, Tigidali Bomo Elalubo Genuai Bidigo enabolo te po walali, 5 “Nago te kantri we bidi dabe me augwaligo pris bidi dabebolo e tama po walao, ‘Mu tamao, te kibu be 70 edubadi te tigidali 5 poluade me te 7 poluade dagego nai dabe habu selama, hobedai gela weyu yai dao. Tiali goli dagego te enade homu kone paliyu, te eno nogi ugwaba sabo kolesaga me yai menio. Mu menio. 6 Tama me ma, dagego nai tubo sogo da, teda dagego duga tabi pągąnabo nai naga tuyu ebo dao,’ te po augwalibolo wao,” Genuai Bidigo te po walali.
7 Polobadu Genuai Bidigo te deli tiwai po naga te profet sibigo pedauwalidu pusai dao, te we bidi dabebolo. Agai te po te Jerusalem wiegi yai elaluyu, wiegi yai nai dabe hauwa elalubadi agai te po mawai dao. Tama te sogo te we bidi hauwa te Jerusalem pągąna peyu, me te Jerusalem bogo badu elaluali taun dabede, me te saut badu taun dabede me we bidi pągąyu, me giliga dega sabo badu te dwasianu bulu du dabede me te we bidi hauwa pągąyu yai dao.
Genuai Bidigo Sekaraiabolo Juda dabego kalabus sę yali po page pusa mani
8 Te Genuai Bidigo Sekaraiabolo po me pusa mayu, e tama tiwai po wali, 9 “Polobadu eno te po ena we bidibolo mawai dao, ‘Te po tų ebo sogo te dagego tigidali wiegi yai doloba pai kolesaga naga iyąo. Tama dagego duga deli hani dabe dali hobede homu iyąo, tama augwali tau sabo sę yao. 10 Dagego bidi isai wilawe we dabe dali dwai sę me elamo dao. Me dagego wai puluba augwa aya isai wai dabe dali me dwai sę me elamo dao, te digibulu bidi dage dali bidagasali te we bidi dabe dali me dagego dwai sę me elamo dao, me te nai dabe habuge yai we bidi dali me dwai kolesaga elamo dao. Tama dagego duga deli hani bidi dabe dolainu homu elamo dao,’ eno te po mawai dao,” Genuai Bidigo enabolo wali.
11 “Tiali goli te we bidi augwali tobolu gagea pelama, augwaligo po odabo homu hagela yali. Augwaligo augwa homu kolesaga dąų ola selama, 12 tama augwaligo homu masigi dila pabo tiwai yalio. Augwaligo Genuai Bidi ena Tigidali Bomo Elalubo Bidigo bomai po dali haniani po odobo hagela yalio. Eno Spirit Mobo Bidigo te profet sibigo pedauwalidu eno te po augwalibolo polobadu tolai dao. Tiali goli te we bidigo te po wali pabeo. Tama tibaso, eno sębę dwai mu yalio. 13 Tama eno augwaligo gedu haluasa po wabo odai menio. Magi baso meni, augwaligo eno po odisąma ebaso. 14 Tialima eno augwali te genuai waligo te nai dabe sela sąbo tiwai elama, tama eno augwali gasa kantri dabeba sela sąyu, tedela palai dao. Tama augwaligo dwai kolesaga ebogo te wiegi yai tǫ te dwai tǫ tiwai pedelali. Tama tede bidi me deli tede bidibeo,” Genuai Bidigo te po wali.