Jop.
14.
Te Jopgo po ma olama, te po wai, “Da we bidi e tǫde pęwadage sogo bidibo dao. Tama idago ame nanidu gagalasa, haniani dwai kolesaga dade pedalobo dao. 
Da te plauwa tiwai kigamu pedalama, pio ma sasia pabo tiwai dao. Tama me e tiwai dao. Giliga noma pedalobo tiwai, tama pǫgo giliga polo halua sabo tiwai dao. 
Tama tiali goli, nago magi baso dago kolesaga osabo dawe? God, ena olo dao. Tama magi baso nago ena po tų ela mobawe? 
Da we bidi nago gedude meda mu yali. Tama dego da hasegelama, da tigi wiegi yai nago gedude ilaibawe? Mu meni. 
Da e tǫde bidabo bubuga dali, kibu be dali si polo bodolu muai dao. Bidi mego aga bidabo bubuga bobobage ma ilabo usu egobeo. 
Tama tibaso, ena nago tagala palao. Ena bididu, ena homu dwagi yai emainao, te sę bidi dabego dwagi yai homu aga sę pio silibaso ebo tiwai gilama,” wali. 
“Eno koneani, bidigo ni geliyu da, teda pedalide sele elaluyu, gasa honu ma pedalobo dao. 
Tagala, aga page sele polobadu holai ma sasia pai me. 
Ma, tǫde wę elaluyu da, te gelai ni tanede kulubi ma pedalaibao. Aga holama, gesi ni holoyu, nologo pedebo tiwai yaibao. 
Ma, da bidi dabe, da te tiwai ebo menio. Te da isibo sogo, te da mu tama sia sabo dao. Tama me badugo da ma subo menio. 
Me sogo genuai wę dali, sigi ge dali si mu tama sula sabo dao. 
Te tiwai me, we bidi dabe da isilama, ma hodalobo menio, te tǫ dali, dagalu dali si silibo sogoba usu naibao. Tama augwali pila mubadi, magi nai mego augwali me hodologobeo,” wali. 
“Eno homugo nago ena te isila pali bidi dabego buluba geme dualigi sogo dao, te usigi da, ena tede bidiyu, te nago sębę homu kilabo sogoba usu nigi pigi dao. Tama eno homugo nago te enade homu ma kone palabo sogo bodolu muao. Ma, bidi me deli isibaso da, aga ma bidigowe? Mu meni. Tiali goli ena tonalu da goli, te nago ena ma bidimainu bodolu muani usu nagasabo si. 
Tama te sogo naga koneaiba, naga digi ena nigai da homu yaibao. Tama nago ena nage pąde bidao homu yaibao. Tama tibaso, ena nago i wabo si nage pąba asaiba, nago i wabo dei. 
Tama te sogo ena bilibode nago bugagia tonaluaibao. Tiali goli, nago eno dwai sęgę nedegobeo. 
Teda nago eno sęgę sela sąnama, te sęge kone me egobe, te bidigo nai begide bulama, po dąų walama, susiąbo tiwai yaibao,” Jopgo te po wali. 
“Tiali goli, eno homugo te nai dabe pedalogobe yali ąǫ ebo. Eno subo tigidali nai dabe dolobo subo dao. Te bomai bulu du dabe alua pelama, olo tǫ tiwai pedalobo dao. Te moni masigi me aga bidali pesage taga pelama, ibaba kilasai subo dao. Te bomai wę dabego te masigi ibaba kidilibo dao, tama tǫ sela sąnama, gasa buluba sela pabo dao. Tama tiali goli, God, te we bidi dabego homugo augwali bugagia bidigowe homu ebadi, nago haniani sę elama, augwaligo te ebo homu silibo dao. 
Nago bomogo augwali aiyaba elaluama, tama augwali isibo dao. Tama augwali isila pali sogo, augwaligo gesabidi gasagi yai pedalobo dao. Tama nago augwali te isila pali bidi dabego buluba taga palobo dao. 
Tama nosali da, te we bidi dabe augwaligo augwa ogomanibolo genuai nogi mabode, o ma augwaligo nogi aiyaba elaluama, augwali hale ilibo si da, teda te isila pali bidi dabego te sę koneyu, suyu me egobeo. Mu meni. 
Augwa tigide dene ebo deli naga konebo dao. Tama augwali tigide elalubo sęgęde gela wabo dao,” Jopgo te po wali.