Jop.
27.
Tama Jopgo po ma wadoluyu, e tama wali. 
“God Tigidali Bomo Elalubo Bidigo enade dolo yai sę isąma yai digi, megi da, ena dolama mu bidibao. Agai odisąma, eno po tų bugagia sulama dodolobeo. Tama tibaso, ena haliga tigi sębę agai te kolesaga ebode ebao. 
Tiali goli, eno te sesemane sogo bidibo Godigo nogi weyu, nogo guni sisu, eno mu po naga obao. Te Godigo ena me bidimainu eyu da, 
te eno dwai po me pusulama, tama eno tibo po eno pedauwalidu me wagobeo,” wali. 
“Tama tibaso, dagego bugagia mu odao. Te po dagego enabolo wali po dabe mu tama menio. Eno te homu ebo dao, tama te homu hasegelegobeo. Magi baso meni. Eno haliga dali, homu kolesaga dali si dolo mu Godigo gedude elalubo. Tama eno po bomo elama, e tama wali. Eno dwai kolesaga dabe, magi sę dabe me, te dwai dwai nai dabede me ebeo. Tama eno te deli po naga ola pidubadi, ena isibo sogoba siligi paibao.” 
“Eno homugo bidi dabe ena dali boi bidi homu ebo bidi dabe dene momaina homu ebao. Agai deli kolesaga naga augwali tigide emainao, te dwai kolesaga ebo bidi dabede ebo tiwai. 
Te bidi dabe augwali Godigo po wali pabo menio. Godigo augwaligo bidibo ula silibo sogo augwali dwagi yai nai me saibawe? Meni. 
Te sęgę yai sę augwalide pedalobo sogo da, tama augwaligo Godigo augwali tau somainu i wabo dao. Teda Godigo augwaligo i wabo odaibawe? Mu meni. 
Tama te tobage bidi dabego dwagi yai homu elama, God Tigidali Bomo Elalubo Bidiba gedu haluasa po tigidali sogo waibawe? Mu meni,” wali. 
“Tama megi da, eno dage ola menama, tama dagego Godigo bomo bugagia koneagameo. Tama eno God Tigidali Bomo Elalubo Bidigo homu kolesagade yainu ebo sę po hanilama pusaibao. 
Tiali goli, duga polo suali, te Godigo ebo kolesaga dabe. Tama tiali goli, dagego magi baso po geda mubawe?” wali. 
“God Tigidali Bomo Page Bidigo polo dąį ilai dao, te haniani sęgę te dwai sę ebo bidi dabego pei yali gilama, tama gasa bidi dabe dali dwai kolesaga ebo bidi dabebolo me. 
Te bidi dabego wai puluba hauwa elalubaso me tagalao, te boi bidi dabego augwaligo wai bǫų elama, isilagasaibao. Tama augwaligo hani da, tigidali sogo nai menia siduaibao. 
Tama te dwai sę ebo bidi dabe isila pai madi da, te augwa hani bidibo bageba me moni gasi mu aselama, augwali me isaibao. Tama augwa we dabego me augwalide hobede isąma, diligi me egobeo. 
Te dwai bidi dabego silva mone hauwa, me ugwa hauwa mu pesage augwa bede holai baso, tama te dwagi yai nai dabe da, augwaligo homude olo nai tiwai elaluaibao. 
Tiali goli, nosali da, te doloba pai bidi dabego te dwagi yai nai dabe selama, augwa hasi dobola saibao. Awe, te dwai sę isąwai bagego te dwai bidi dabego silva augwa hasi tomode dobawaibao. 
Te dwai bidi dabego sawi yai be sę ebo dao. Tiali goli, augwaligo be sesabi elama dolalugobeo. Te be dabe deli sogo mu degasa paibao, te hologabe be, me bidigo gi tonaluainu sę ebo be tiwai yali gilama yaibao. 
Awe, augwali hulide piainogo da, augwaligo suali, augwa tigidali nai dolo elalubo suali. Tiali goli, kigamu hodaluyu suali, augwa dwagi yai nai dabe menia suali, dolo elalubo sube. Tama augwali nai meni yai bidi mu bidali,” wali. 
“Te dwai wi ilibo nai dabe te dwai bidi dabeba hulide te wę aselama, bulu mesega sabo tiwai yaibao. Tama augwali wi mu yaibao. Te nai dabe te bomai wali tiwai elama, augwali sela sąwaibao, tama augwa pesagede munu me bidigobeo. 
Te bomai wali te giliga asobo badu aselama, augwali sese sela sąbo tiwai dao. 
Tama te waligo augwali tigide diluai sę mu ebaso, augwali wi peyu, geme duala sainu yaibao. 
Tiali goli, augwaligo te waligo bomo sela sągobeo. Waligo augwali gisugu mabo tiwai elama, tama augwali sela sąwaibao,” Jopgo te po wai.