Godigo Nogi Ugwaba Sabo Tęąbi Po Wabo Buku Dabe.
11.
Te Devitgo asęani balia po me deli dao. Eno konealubo po mu dąų wali, Genuai Bidigo ena tonaluaibao. Abagi dede, dage kolesaga isąyu, dagego enabolo te po wali, “Nage bulu duba wi pao, te ba me deli wi ebaso, polo pabo tiwai yao. 
Magi baso meni, dwai bidi dabe augwaligo ene selama, te balibiba tulama, nage enainu, te kegebao. Augwali te hulia sai bulude geme dualama, tama te dwagi yai bidi dabe enainu te ebao. 
Tama tibaso, te we bidi dabe augwaligo te bomai po dologode bidibo kolesaga tagaliyu da, teda dwagi yai kolesaga ebo bidi aga mena tama tegowe?” Dagego enabolo te po wali. 
Genuai Bidi God aga dwagi yai bede bidibo. Tama aga dagalude genuai tuni bidi bidiyu, tama agai gedugo tigidali bidi subo dao. Tama augwaligo tigidali sę ebo agai osola subo dao. 
Genuai Bidigo dwagi yai bidi dali, dwai bidi dali osola subo dao. Agai bomo yai po sela sąbo te bidi agai hagela mu ebo dao. Te bagego gasa we bidi elebo kolesaga ebo dao. 
Agai dwai kolesaga ebo bidibolo posolo yai sia ugwadu aiyaba gelebo dao. Tama te posologo augwali mu dene sabo dao. Te augwaligo dwai sę ebaso, dene somainogo tiwai. 
Genuai Bidi aga dwagi yai dolo mu dao. Tama agai te dwagi yai kolesaga ebo we bidi godolo mu ebo dao. Bidi augwaligo agai po wali pabo bidigo aga gesabidi sueibao.