Godigo Nogi Ugwaba Sabo Tęąbi Po Wabo Buku Dabe.
21.
Te Devitgo asęani balia po me deli dao. Genuai Bidi, nago te kingba bomo mobaso, te agai wiegi yai homu pemene yai. Te nago agai te hwįbode augwali aiyaba elalumainu yali sęde te agai homu pemene wiegi yai mu ebao. 
Te agai wei eyu sainu yali nai, nago agaba manio. Awe, agai nageba hanalu wali nai, nago te agaba mani. 
Nage agaba asiyu, te wiegi yai homu ilabo nai dali sela asai. Tama nago te wiegi yai kapa gol elalubo kingo madi aga toboluba muai. 
Agai nageba te bidibo ula mao po hanalu obaso, tama nago aga mawai. Mu tama, nago aga bidibo ula te sesabi mu elama, bidimainu yai. 
Nago aga tau selama, tama aga genuai nogi mu elalubao. Nago nogi me bomo digi nago aga mani. 
Mu tama, te nago wiegi yai sę ebo kolesaga agade sesemane elaluaibao. Nage aga pąde bidiyu, tama tebogo aga wiegi yai homu pemene mu ilibo dao. 
Te Ugwade Mu Bidibo Boma Pai God, kingo nageba konealubo homu dąų mu wali. Nago olo tau sabo wiegi yai kolesaga sesemane sogo te kingba ebaso, tama tiyu, te aga bomo elama, dolalu iduaibao. 
Te kingo aga boi bidi tigidali nogogo touwaibao. Tama aga digi te aga wei homu isiąbo bidi dabe te kalabus yaibao. 
Te aga hania te pepeli diliba pedalubo sogo da, teda agai te boi bidi dabe ela silibo da, te genuai siago te nai dabe ulubo tiwai gilama yaibao. Mu tama, te Godigo wado po weyu, tama augwali aiyaba elaluama, tama te siago augwali tigidali dela silaibao. 
Te kingo augwaligo wai tigidali ela silaibao. Tama te augwali hanigo wai dabe te tǫde munu me bidigobeo. 
Te boi bidi dabe augwa homude koneama, tama agaba dwai sę yabo miani. Tiali goli, augwaligo aga aiyaba elaluainu ebo usu me ebeo. 
Magi baso meni, te agai ene te augwaliba eneyu, wi ilibaso te augwali wi paibao. 
God, nage te naga bomo dali asao. Tama dago te nago naga bomogo yali genuai sę dabede balia po waibao.