Godigo Nogi Ugwaba Sabo Tęąbi Po Wabo Buku Dabe.
52.
Devitgo te balia po asęani, te dago homu konemainogo yai. Hasia bolo te Idom bidi Doek te Solba pelama, tama agabolo te tama po walali, “Devit te Abimelekgo bede bidibao,” po wai. Tama tede Devitgo homugo ma kone palama, te balia po asęani. 1 Samuel 21:7, 22:9-10 tede elalubo po suao. Nage te bomai bidi, te magi baso nago te genuai po dągą weyu, tama nago te Godigo we bidi augwaliba dwai kolesaga elama, tama tede nago odolali te wiegi yai homu pemene ebo dawe? Te sesemane sogo Godigo te olo tau sabo wiegi yai kolesaga augwaliba ebo dao. 
Nage te tibo po wabo bidi da, te nago po te resa te mu poa pai tiwai elalu, tama nago po wabogo te gasa bidi dolobo dao. Tigidali side nago te gasa bidi dolabo homu elalubo dao. 
Nago te wiegi yai kolesaga wei me isiąyu, nago te dwai kolesaga naga wei ebo dao. Nago te mu po wabo kolesaga wei meni yai. Nago te tibo po wabo kolesaga naga wei ebo dao. 
Nage te tibo po wabo bidi dao. Nago te gasa bidi dolabo homu ebo po wei mu ebo dao. 
Tiali goli, odao. Godigo te nage mu doloyu, tama nage te tiwai elalua paibao. Agai te nage pageabi elama, tama naga bede te nage sela sąwaibao. Tama nage mu sia somainu ilama, tama nage te tǫde ma bidimainogo me elalugobeo. 
Te doloba pai bidi dabego te tiwai pedalubo sulama, te augwali wi yaibao. Te augwaligo nage gisugu mayu, te tama po waibao, 
“Suao. Te bidi te Godigo aga tau sabo homu wei isiąyu, te aga dąų me walobeo. Agai te aga mone, me doado bage hauwade teba homu munama, tama aga homugo te dwai kolesagago aga bugagia bidimainu ilaibao, te homu yali,” te po waibao. 
Tiali goli, eno te tiwai me ebeo. Ena te Godigo be pąde elalubo ni oliv tiwai dao. Eno konealubo homu Godiba munama, te Godigo olo tau sabo wiegi yai kolesaga te sesemane bidada peyu, bidada pabo sogo te enaba te kolesaga emainu ebo dao. 
God, nago ena tau sali, tama tiyu, eno sesemane sogo nageba usu da weyu, gedu haluasa po wabo dao. Tama te nago we bidi dabego gedude te eno nago nogi ugwaba siyu, tama eno te po waibao, “Godigo te wiegi yai kolesaga enaba ebo da,” po waibao.