Godigo Nogi Ugwaba Sabo Tęąbi Po Wabo Buku Dabe.
74.
God, magi baso nago da tudiba mubawe? Te nago wado po sesemane te naga we bidi daba ududa, agawe? 
Nago te naga hani bage dabolo te homu kone ma palao. Polobadu mu nago te naga we bidi da sa muai. Nago da ma abelama, tama da naga hani bidimainu yai. Nago te Saion bulu duba homu kone ma paliyu, te polobadu tede nage bidai dao. 
Te dago boi bidi dabego te dago moni lotu be tempelde doado bage tigidali dolalio. Te doado bage dolali elalubo, te nage aselama, suagasao. 
Te nago boi bidi dabego te tempel be selama, tama augwali te nago tedali te wiegi yai pesage elalubo madi tomode dolalu, tama augwaligo win yai da olama, i wali. 
Augwaligo te nago bede ni name togwali, te bidi dabego te buside ni togobo tiwai yalio. 
Te ni name dabe augwa nigilama, tama te wiegi yai nai dabego au ilai, te boi bidi dabego te sigi hwą me sęgę yai hamago aluai dao. 
Augwaligo te nago tedali wiegi yai be te siago ulali. Augwaligo te tedali wiegi yai pesage elaluali dolali, te nago we bidi dabego nageba lotu wabo madi, te dolai. Augwaligo aluama, tigidali mu dolai dao. 
Augwaligo te da mu dolabo homu yalio. Tama tialima, augwaligo te Godigo lotu be tigidali dago tǫde elalubo, te siago ulai. 
Te nago dabolo mani te tigidali sa muani nai, te augwaligo sela sąwanio. Tama dago profet megi me bidibeo. Te da me deligo te sęgę te mena sogo silabo, te dago me konebeo. 
God, nisu sogo naga te boi bidi dabego dabolo te posobo po udumainu yaibawe? Te augwaligo naga nogide te sesemane sogo po dwai omainu yaibawe? 
Magi baso nago da tau sisąma ebawe? Magi baso nage odolali naga dulalubo dawe? 
Tiali goli God, polobadu mu nage dago king bidali, tama megi me nage dago king bidibao. Tama hauwa sogo nago da tau selama, tama da te hwįani digi da me dolobeo. 
Te nago bomode naga, nago te genuai tamu ąį togolama, tama me badu buga siyu, meba buga siyu elama, dolaluali. Tama nago te Isip we bidi dabe dolali. Augwali te tamu ąįde moni sųgų tiwai yalio. 
Tama nago te genuai pukpuk dabego tobolu aluali, te Isip tobolu bidi dabe da, tama nago agai tigi te augwali te kemi tǫ wa pai bulude bidibo uni hasa dabeba menama, tama augwa tuai dao. 
Nago te wę dabe te tǫde pedalumainu elama, tama te wę dabe tedu palio. Tama nago te genuai wę dabe tigidali mu sula somainu ilai dao. 
Nago te be posobo me be hulibo nigali, tama nago te giliga me polua te ugwadu muai elalubao. 
Tama nago te tigidali tǫgo dąį muanio. Tama nago te tigidali kibu bede giliga nanobo sogo muyu, te tulubage tulubo sogo muyu yai elalubo dao. 
Genuai Bidi, nago homu kone ebo me tagaligio. Te nago boi bidi dabego te posobo po nageba obao. Augwali te esela pabo kolesaga meni yai bidi tiwai eyu, tama augwa homugo nage te olo bage me tiwai da homu ebo dao. 
Te nago hani bage te augwali bomo meni yai. Tama tiyu, nago da tagalubaso, tama te boi bidi dabego daba te dwai sę mu elama mu dolaibao. Te boi bidi dabego te naga we bidi dabolo te dwai dene mabo sę ebao. Iya, nago da homu kone me gegeda paligio. 
Te tigidali tǫ pedaide, te dago tǫde me te bidi dabego wabi hwį hwį pai. Tama tialima, nago da dali te dąų walali bomai po te homu kone ma palao. 
Nago te dwai bidi dabego te gasa bidi dabe agalama, tama augwali aiyaba mu elalumainu me sula tagaligio. Nago te magi doado meni yai te nai dabe sǫą pabo bidi dabe tau sobaso da, teda augwaligo te nago nogi ugwaba somainao. 
God, nage aselama, te boi bidi dabe dali po bomo elama wagasao. Nago te hagoma ebo bidi dabego te tigidali sogo posobo po nageba wabo, te nago homugo koneao. 
Te nago boi bidi dabego te genuai po dągą ola biliyu, nageba po dwai weyu ebao. Augwaligo te sesemane genuai i naga wabo dao. God, nago te augwaligo kolesagade homu kone me gegeda paligio.