Aisaia.
31.
Dage te Isip buluba pelama, tama augwaligo dage tau somainu hanalugi pabo bage, hobede ya, dage dene saibao. Dage te Isip dabego hwįbo hos kibu hauwa elaluyu, me karis dabe me hauwa, me te ami bidi dabe hosde dualama hwįbo ami bidi dabe hauwa elalubo sulama, tama dagego homugo Isip dabego dage tau somaina homu ebao. Tiali goli, dagego Israel dabego Genuai Bidiba tonalubeo. Aga te Wiegi Yai Doloba Pai Kolesaga Naga Ebo God dao. Tama dagego agai tau sao po hanalubeo 
Tiali goli, agai me wiegi yai homu kolesaga elalubao. Tama agai dwai dene te dwai we bidibolo me dene ilaibao. Tigidali sogo Genuai Bidigo aga wali po wali naga pabo dao, hasegelegobeo. Agai te dwai bidi dabe dali, me te bidi dabe te dwai kolesaga ebo bidi dabe wali bilibo dabe dali, hwįaibao. 
Tiali goli, te Isip dabe, augwali te god menio. Augwali te olo bidi dabe dao. Me augwaligo hos dabe me te hos mu naga dao, te tigi mi dali, dili dali elalubao. Tama te Genuai Bidi agai bomo ola mabo si da, teda te bomai bulu tulaluaibao, tama me te agai tau sali da, te bulu dabe me tulaluaibao. Tama si dali si tama, mu tama dolaibao. 
Genuai Bidigo enabolo e tama po wali, “Te bulu yowi laiongo sipsip kibu me elama, tudubadi da, teda aga wi elama, tama te sipsip taga peyu, wi me pogobeo. Te sipsip kibu tonalubo bidi hauwa aselama, aga tonaluyu, hae mobadi goli, aga wi me egobeo. Menio. Agai augwali dali wado elama, tama te sipsip kibu bugagia tonaluaibao. Te tama tiali goli, ena Tigidali Bomo Elalubo Genuai Bidi, te eno te bulu du Saionba hwįagasaibao, te Jerusalem bulude. Tama magi nai dabe mego ena togolobo usu me egobeo. 
Te ba dabe augwali ugwadu bola biliyu, augwa wai dabe bugagia tonalubo dao. Te tama tiali goli, ena Tigidali Bomo Elalubo Genuai Bidigo da, teda eno Jerusalem bugagia tonaluaibao. Te tigidali sogo ena augwali pagede bidiyu, tama eno augwali ma oda selama, tama eno aga bugagia tonaluaibao.” Te po wali. 
O dage Israel dabe, dagego Genuai Bidigo po sela sąbo dao. Tiali goli, dage mu begelama, tama agaba ma asiąo. 
Te Genuai Bidigo bodolu pąba yagasobo si da, teda te sogo dagego te dwagi yai silva de gol sigo nigali tibo god piksa dabe sąwaibao. Te nai dabe duga nogogo digi nigai dao. Tama te kolesaga yaligo dage sęgę sai dao. 
Genuai Bidigo te po wali, “Te hwįbo hwą bainat mego te bulu Asiria dolaibao. Tama te Asiria dabe mu silaibao. Te bainat hwą ena Genuai Bidi ena digi tagala palaibao, te bidi dabe mego menio. Te Asiria dabe te bainatde wi paibao, tama te Asiria dabe gesi bidi dabe da kalabus sę yaibao. 
Te Asiria dabede genuai wi mu pedalaibao. Tama augwaligo bomai genuai hanu tulaluaibao. Tama te augwaligo ami ofisa dabego eno hwįbo plak ugwa walai subaso, augwali noma selama, augwaligo dili nagamea pelama, tama augwali wi paibao.” Te da te Godigo po dao. Te agai bomai isi te bulu du Saion te Jerusalem bulude elalubao.