Aisaia.
59.
Genuai Bidigo te dage ma sabo bomo meni da, dagego te homu me igio. Dagego te homu eyu, te aga olo degelama, te dago gedu haluasa po wabo odobeo homu egobeo. Menio. 
Te duga sęgęgo naga tama tiyu, te God aga gesabidi seselasa elalu, te dagego gedu haluasa po wabo odobeo. Te duga dwai sęgęgo te duga tomode te duga God dali te obogo dąį elalubo tiwai ebao. 
Magi baso meni. Te dagego haniani tibo po weyu, te wado po, me po dwai wali. Te dagego dwai kolesaga eyu, te bidi dabe ela munama, te augwa kaneme dagego nogode dagana sai elalubao. 
Dagego te doloba pai po tų me ebeo. Menio. Dagego te tibo po dabe weyu, te po tų odoboba gasa bage dabe kekasa pali. Te dagego tibo po haniani weyu, te po tų ebo dagego po naga odomainu elama, te gasa bage aiyaba elaluai. Te dagego homu kolesagade te dwai sę ebo kolesaga hauwa mu pągąnalu, te dagego dwai sę haniani ebo dao. 
Te dagego dwai homu kolesaga elalubo, te dwai nabi elalubo hasamanigo ge tiwai elalubao. Te bidi me deligo te hasamani ge tubaso da, hobede yao, te aga isaibao. Te tama tiwai dagego dwai homu kolesagade dagego te haniani dwai sę pedalumainu elama, te gasa bagego bidibo ula dolobao. Te ababua dabego be sę ebo da, te augwa te dwasianu nai dabe tola sabode te augwa tueinu ebao. Te bidi dabego te ababua be selama, te ugwa nigilama gudugobeo. Te tama tiwai naga dagego te ebo sęgo te gasa bage tau me sogobeo. Menio. Augwa te gasa bage tola selama, te augwali elaluama, te augwaliba dwai sę ebo dao. 
Sesemane sogo dagego te dwai kolesaga yabo homu godolo mu ebao. Te sesemane sogo dagego te magi dwai sę me isąwai bidi dabe ela muabo homu hogodali. Dagego te dwai sę dabe yabo homu naga ebao. Te dage udayu, te gasa we bidi dabego bidibo ula dolabo sę ebo dao. 
Dagego te haliga nagame elama, dua digi bidibo kolesaga konesiąma, te dagego te Genuai Bidigo godolo ebo doloba pai kolesaga me ebeo. Menio. Te dagego kolesaga dabe dolo me isąwai, te bidi dabego dage te bilibo sunumi wali pobaso da, teda augwali te bugagia haliga nagame elama, bidabo pesage me gegelama, bidabo usu me egobeo. 
Tialima, te we bidi dabego te tama po wali, “Genuai Bidi, nago naga doloba pai kolesaga ola mayu, te tau selama da ma sabeo. Megi da, te kolesaga page dago koneani. Da te be hulia saide bidibo we bidi tiwai elalu, tama dago homugo te wiegi yai sogo daba pedelama, te giliga bomonama nanobo tiwai elama, te be hulia sai silimainu homu godolo mu yali. Tiali goli, menio. Da te genuai be hulia saide bilibo tiwai eyu, te da haniani sęgęgo gegebo dao. 
Te sęgę dabego da te gedu widai tiwai biliyu bidibao, te da pabo sunumi gege gege bilibo dao. Te genuai giliga nanalubode digi, da te be hulia saide bilibo bidi dabe tiwai bilalubo, te dago sągą dani te masigiba tųą palobaso, da tula mubo dao. Dago homugo te da bugagia bidaiba homu yali, tiali goli menio. Da te isai bidi bidibo tiwai yai dao. 
Te sęgę dabego da dwai dene mu ebaso, te dago te genuai hasa bea dabego gani gani wabo tiwai weyu, te dago gela wali te ba higo po wabo tiwai yali. Tama dago te nageba tonalu, te nago doloba pai kolesaga ola mayu, te da tau selama, ma sabo tonalubo dao. Tiali goli, menio. Te nago doloba pai kolesaga dade digibulu elalubo dao,” wali. 
“Genuai Bidi, te dago dwai sęgę nago gedude hauwa mu elama, te sęgę dabego da po tų ilali. Tama dena digi dena yali te dwai sę tigidali bugagia koneai dao. Mu tama, dago dago dwai sę hauwa yali dao. 
Dago te dena Genuai Bidi, God, nageba dwai sę yali, te dago nage tudiba munama, nago po sela sąwani. Dago nage dologode bidibo te hagela homu yai dao. Dago te gasa bage elaluama, te haniani hagoma kolesaga yali. Dago te gasa bage dabe tibo po ola mayu, po geagano bilama, haniani sunumi nigibo po wali. 
Tama tibaso, dago te kolesaga dabego te nago doloba pai kolesaga te dade digibulu elaluai, tama tiyu, te nago da tau selama, ma sabeo. Te dago te doloba pai kolesaga me mu po wabo, te da tomoba aselama, elalumainu ebeo. Te da sisinibo side me, te augwali si me bidagasobeo. 
Te doloba pai kolesaga deli dade me elalubeo. Te bidi me deligo aga dwai kolesaga tagalobaso da, teda te gasa bage dabego te aga dolabo haniani sunumi gegebo dao,” wali. Genuai Bidigo te we bidi dabego doloba pai kolesaga ebo me susiąbaso, te agai augwaliba dwai haliga yalio. 
Te aga dwai midigi siyu, te tiwai suali, te gasa bagego dolali bidi dabe te tau sabo bidi elalubo subeo. Tama tibaso, te aga bomogo digi, te aga doloba pai kolesagago digi, te Genuai Bidigo augwali ma selama, te augwali bugagia bidimainogo ilai dao. 
Agai te doloba pai kolesaga te kapa holobo ugwa mubo tiwai eyu, te aga hagawiade mesega sabo tiwai yali. Te aga te we bidi ma sabo bomo te hwįbo madi kapa tiwai muani. Te aga ugwa gudubo tiwai bomonama dąų ola selama, te dwai sę ebo bidi dabeba dene mawainu tiaibao. Te aga haliga sębę ebo te bobobage ugwa aiyaba tagalalubo tiwai yaibao. 
Te agai haliga sębęde, te aga boi bidi dabeba dwai dene mayu, te augwa yali dwai sę dolo usu wei ponaibao. Te agai te pąde elalubo bulu tǫ kantri we bidi dabeba, me te digibulu tǫ kantri dabe, te dwai dene mabo sę mu yaibao wai dao. 
Genuai Bidi te genuai wę asobo tiwai eyu, te Genuai Bidigo ponobo sogo te dąų walali wę gisigilama, te wę asesa mu pomainu yaibao. Te tigidali tǫ asesa mu pomainu yaibao. Te tigidali tǫ habu we bidi dabe, te giliga pedalubo badu gagalasa pelama, te giliga degegi paboba usu nigi paibao, te augwaligo Genuai Bidigo bomo me genuai nogi koneama, te aga nogide wi elama, te augwali aga dologoba aselama, bidimainogo yaibao. 
Genuai Bidigo te po wai, “Ena te dage posolalu, te dage tau sabo God, ena te Jerusalemba aselama, te tigidali we bidi te Jekopgo hani te augwa dwai kolesaga ebo tagalali bage ma sagasaibao. 
Te ena da, eno bomai po augwali dali dąų walama, te augwaliba eno te tiwai po waibao, ‘Te eno mobo noma bidi me, te eno dagebolo mani po me, te dagede bidiyu, te dagego pedauwaligo eno po pusaibao. Dagego sesemane sogo tama tiaibao, te nosali dagego wai dabego me te duga bulabo wąį dabego me te tama tiyu, te sesemane sogo augwaligo me eno po elalua peyu, pusaibao,’” te po wai dao.