Hosea.
6.
Te Israel we bidi dabe augwaligo te e tama po wai, “Iya, tegoba, da te Genuai Bidiba ma pinao. Agai da dolali, tiali goli, te agai da bugagia wiegi yai ma ilaibao. Agai da elama, te keni pedelali, tiali goli, te keni agai ma pedela somainu yaibao. 
Nosali te si sogo, ma sela sogo bidama, tama te agai da hodolama, tama te aga dali bugagia bidaibao. 
Dago te Genuai Bidi koneabo sę bomo inao. Dago koneani, tigidali sogo kigamu te giliga pedalubao. Tama dago koneani, te tigidali sogo tulubage tulubo, tulubage te tǫba tulubao. Tama te tiwai naga dago koneao, Genuai Bidi te aselama, te da wiegi yai bugagia ma ilaibao,” augwaligo te po wai. 
Tialima, Genuai Bidigo te tiwai po wei ponani, “Dage Israel, me dage Juda, te eno mena sę dageba yagawe? Te dagego ena godolo homu ebadi, tiali goli dagego sesabi gana elama, te ena godolo homu ebeo. Menio. Te dagego godolo ebo homu te polo tama mu sia siyu yali, te kigamu dagalude te pǫ me hawa pedelama silibo tiwai ebao. Tama te hulide tulali tulubage segeni te nosade elaluali, te giliga nanu te polo wa pabo tiwai ebo dao. 
Tama tibaso, te eno profet bidi dabe tagala palama, te dage po tų yabo po augwaligo dageba bomonama weyu, tama te dage dwai dene mu saibao. Dagego odalio, te mena sę eno dageba yabo te dagego koneai. Te hania mu elalubao. Tama te sę dabe e tama telalubao. 
Dagego te hasa elama, tama enabolo olo mabo kolesaga, te tobage ofa sę ebo te eno godolo homu mu egobeo. Menio. Te dagego gasa we bidide homu dene eyu, tau sabo kolesaga ebo, te eno godolo mu ebo dao. Eno godolo ebo homu te dagego homu kolesaga te enaba sesemane momainu homu ebao, tama tiyu, te dagego ena bugagia konemainu homu ebo dao,” wali. 
“Te we bidi dabe augwaligo te bulu Adam pesagede te wę Jordan nogelama, tama eno augwaliba te mani tǫba sabolali. Tama polo tama te eno augwali dali polobadu dąų walali po augwaligo togolama, bolai dao. 
Te dwai sę ebo bidi dabe, me te gasa bidi dabe ela mubo bidi dabe, augwali te moni taun Gileatde pągąnalubao. 
Te pris dabe te nai wi sabo bidi dabe tiwai elama, te sunumide geme dualaluyu, te bidi dabe dolama, te augwaligo doado bage wi sainu ebo dao. Tama te augwaligo te bidi dabe te Sekemba pabo sunumi tunu magede ela muyu yali, te lotu wagi pabo pesage dao. Augwali te bidi dwai dabe mu dao. 
Eno te Israel dabego te dwai kolesaga mu me deli ebo suai. Te eno we bidi augwaligo te tibo godiba lotu weyu, tama augwali eno gedude dwai meda yai mu pedelalio.” 
“Tama dage Juda me, te eno dagego yali sęde te dwai dene maiabo sogo bodolu muai dao,” Genuai Bidigo te po wai.