Maktumne taat ŋu siirtu ɗo gee ku Hebru.
1.
Awalle, iŋ biŋka ku nabiinnar, Buŋ deesco kaawe ɗo aginiyte iŋ botilay dakina. 
Diŋ gay, ɗo wiktin ta ba aaro, ŋa kaawte lote iŋ biy ka Roŋji. Iŋ ŋaar ko, Buŋ kilgiyiit duniine iŋ gamin okin̰co kuuk goy kuwa ho keɗer, ho ŋa rasiijig okin̰co-aŋ ɗo pisin̰ji. 
Iŋ Roŋ ŋaar-ak ko, gee taliy portikaw ta *darjin ta Buŋdi, ho iŋ ŋaar ko, gee yaa ibinin̰ Buŋ, ŋaar maman, asaan Roŋ-ak ara ko ŋaar di tak. Gamin okin̰co kuuk kuwa ho keɗer-ak goy iŋ gudurre ta kaawoy. Min ŋa piltu botol a gee yaa gine *cawar ɗo uŋji ka Buŋdi, ŋa daktu goy ka samaaner ɗo meeday ta ŋaar kaak gin gudurre pakgig gamin okin̰co. 
Ampaa ko, Buŋ gaartu kadar Roŋ-ak pakgig *ɗubal ku Buŋdi serek. Ɗo bi ŋaar-ak ko, ŋa diyiiji oki siŋ kuuk pakgig kun̰co. 
Ka seener, ƴiriy rakki, Buŋ bal kaawe ɗo rakki min ɗubilji aman : « Kiŋke-aŋ ko Roŋdu, min ƴiriyta-aŋ, ŋuu ibine kadar nun ko takko. » Ho ŋa bal kaawe tak-tak ɗo bi ka rakki minninco aman : « Nun, naa gine Tacco kan̰ji ho ŋaar gay yaa gine Roŋdu kanto. » 
Kar gay, Roŋ ka Buŋdi, ŋaar di kaaco ka gamin okin̰co. Wiktin taat Buŋ rakiy n̰aamin̰ Roŋji ɗo duniiner, ŋa kaawtu aman : « Ɗubal ku Buŋdi okin̰co yaa abdiyin̰ji. » 
Ɗo bi ka ɗubilji-ak, Buŋ kaawtu aman : « Ɗubal kunto, ŋuur ar usu ho gay riyor kunto, ŋuur ar lesas ku aki. » 
Kar ɗo Roŋji gay, ŋa kaawji aman : « Kiŋ kaak Buŋ, ki goy doo ka sees ka sultan. Ki hokumiyaag gee iŋ botol. 
Ki el gamin kuuk iŋ botilco ho kuuk jookum gay, ki ƴilaagu. Ampaa ko, kiŋ kaak Buŋ, Takko Buŋ doɓin̰ciŋ a ki pakgig een̰ji ho iŋ sewe kaak ŋa etiliijiŋ ɗo kaan̰-ak, adin̰ gintu portiko. » 
Buŋ kaawtu pey aman : « *Rabbine, ɗo teesindi, ŋa kiŋken di kilgiyig kiɗa ho samaan sa, ŋa kiŋken di siyig iŋ pisin̰jiŋ. 
Gamin okin̰co kuuk ki kilgiytu-aŋ yaa bire, kar kiŋ gay goy doo. Gamin kuuk ki kilgiytu-ak yaa zooɗe ar kesuun zooɗiyo. 
Ar batik taat ŋu maliyiita, kii maliyin̰ gamin-aku. Ŋu asiy makin̰co ar kaak gee makiy kesuune. Kar kiŋ gay makaaɗo, ki goy uudinen̰ di ho menuwin̰ gaasaaɗo tak-tak. » 
Ƴiriy rakki, Buŋ bal kaawe ɗo rakki min ɗubilji aman : « As goy ɗo meedar nam wiktin taat naaco gedire ɗo adinen̰, ŋuu gine wer ka lee asin̰jiŋ. » 
Ka seener, *ɗubal ku Buŋdi okin̰co, ŋuur ruwwinnay kuuk gina riy ɗo Buŋdi. Buŋ n̰aamiig a ŋuu gaayin̰ gee kuuk yaa gase jile.