1 ታኒ ኣሳ ቃላኒኔ ኪታንቻ ቃላን ሃሳዮፔካ ታው ሲቁ ꬋዮፔ፥ ታ ሃሳያይ ጮ ዋሲያ ዳዋላ ማላ፤ ዎይ ቆልጫካቲያ ፂናፂሊያ ማላ። 2 ናቤቴꬃ ኢሞታይ ታው ዴዖፔካ፥ ታኒ ጌሜዳ ዬዉዋ ኡባኔ ኤራቴꬃ ኡባ ኤሪንቶካ፥ ቃሲ ዴሪያ ዴንꬂ ዲጊያ ኣማኑ ታው ዴዖፔካ፥ ሲቁ ꬋዮፔ፥ ታኒ ኣያኔ ጊዲኬ። ማት 17፡20፤ 21፡21፤ ማር 11፡23 3 ታው ዴዒያዋ ኡባ ሂዬሳቱዋ ሚዛናው ኢሚንቶካ ሃራይ ኣቶ፥ ታ ቦላ ታማን ጉዳናው ኣꬃ ኢሚንቶካ ሲቁ ꬋዮፔ፥ ታና ኣይኔ ማዴና።

4 ሲቁ ዳንዳያንቻ። ሲቁ ኬኬ። ሲቁ ቃናቴና። ጬቄቴና፤ ቃሲ ኦቶሬቴና። 5 ሲቁ ባሬው ቤሴናዋ ኦꬄና፤ ኡዜቴና፤ ዪሎቴና፤ ሲቁ ናቄቴዳዋካ ፓይዴና። 6 ሲቁ ቱማቴꬃን ናሼቲያዋፔ ኣቲን፥ ዎርዱዋን ናሼቴና። 7 ሲቁ ኡባባ ዳንዳዬ። ኡባባይካ ሃናናዋ ጊዴ፥ ናሼቻን ናጌ። ኡባባኒ ጌንጬ።

8 ሲቁ ሙሌካ ꬋዬና። ሺን ናቤቴꬃይካ ኣታና። ዱማ ዱማ ቃላን ሃሳዪያዌካ ኣታና። ኤራቴꬃይካ ꬋያና። 9 ኣዪሲ ጎፔ፥ ኑኒ ኤራቴꬃፔ ፓጫ ኤሬቶ፤ ቲምቢቲያፔካ ፓጫ ኦዴቶ። 10 ሺን ኩሜንꬃ ጊዴዳዌ ዪያ ዎዴ፥ ፓጫይ ꬋያና።

11 ታኒ ናዓቴꬃን ዴዒያ ዎዴ፥ ናዓዳን ሃሳያይ። ናዓዳን ቆፓይ። ቃሲ ናዓዳንካ ኣኬካይ። ዎዳላ ጊዴዳ ዎዴ፥ ናዓቴꬃ ሃኑዋ ኣጋዲ። 12 ኑኒ ሃዒ ቤዒያዌ ማስቶቲያን ቤዒያ ሌምዒ ሌምዒያ ማላ ማላ፤ ሺን ሄ ዎዴ ኑኒ ኑ ኣይፊያን ቆንጪያን ቤዓና። ሃዒ ታኒ ኤራቴꬃፔ ፓጫ ኤራይ፤ ሺን ፆሳይ ታና ዉርሲዴ ኤሪያዋዳን፥ ሄ ዎዴ ታኒካ ዉርሳ ኤራና።

13 ሺን ሄዋ ጊዶፔ፥ ኣማኑ፥ ሃናናዋ ጊዴ ናሼቻን ናጊያዌኔ ሲቁ፥ ሃዋንቱ ሄዛቱ ሚኒዴ ዴዒኖ። ሃዋንቱፔ ኣꬊያዌ ሲቁዋ።