1 ሄዋ ዲራው፥ ሂንቴፔ ኢታቴꬃ ኡባ፥ ጪሚያዋ ኡባ፥ ሎዓ ማላቲያ ኢታቴꬃ፥ ቃናቲያኔ ዚጊርሳ ኡባ ዲጊቴ። 2-3 ጎዳይ ኬካ ጊዴዳዋ ሂንቴ ዴዑዋን ቤዔዳዋ ጊዶፔ፥ ሃዒ ዬሌቴዳ ጋጪኖ ናናቱዋዳን፥ ኡሺዴ ዲጫናዉኔ ኣታናው ፂሎ ጊዴዳ ኣያና ማꬃ ላሞቲቴ። ማዝ 34፡8

4 ጎዳኮ ዴዖ ሹቻኮ ሺቂቴ። ኣሳይ ኣ ኢፄዳ፤ ሺን ፆሳ ማታን ኢ ዶሬቴዳ ኣልዖ። 5 ሂንቴካ ቃሲ ዴዖ ሹቻዳን፥ ጌሻ ቄሳ ጊዲዴ፥ ዬሱሲ ኪሪስቶሳ ባጋና ፆሳ ናሼቺያ ኣያና ያርሹዋ ፆሳው ያርሻናው፥ ሂንቴ ሂንቴ ሁጴው ኣያና ኬꬃዳን ኬፄቲቴ። 6 ኣዪሲ ጎፔ፥ ፆሳ ማፃፋይ፥ «ቤዒቴ፥ ታኒ ፂዮኔ ጊያ ካታማን ጎሊያ ጎዳ ፃጱዋ ሚኒሲያ፥ ዶሬቴዳ፥ ኣልዖ ሹቻ ዎꬃይ፤ ኣኒ ኣማኒያ ኦኒኔ ዬላቴና» ያጌ። ኢሳ 28፡16 7 ሄዋ ዲራው፥ ሃ ሹቻይ ሂንቴንቶ ኣማኒያዋንቶ ዳሮ ኣልዓ፤ ሺን ኣማኔናዋንቶ፥ «ጊምቢያዋንቱ ካꬌዳ ሹቻይ ጎዳ ፃጱዋ ሚኒሲያ፥ ኡባፔ ኣꬊያ ሹቻ ጊዴዳ» ያጌ። 8 ቃሲካ፥ «ሃ ሹቻይ ኣሳ ꬉቢያ ሹቻኔ ኣሳ ኩንዲሲያ ዛላ» ያጌ፤ ኡንቱንቱ ፆሳ ቃላ ኣማኔና ዲራው፥ ኡንቱንቶ ካሴና ቆፌቴዳዋዳን ꬉቤቴዲኖ። ኢሳ 8፡14-15

9 ሺን ፆሳይ ꬉማፔ ማላሊሲያ ባሬ ፖዖ ሂንቴና ፄሴዳ፤ ሂንቴ ኣ ኦራꬃ ኦሱዋ ኦዳናው ዶሬቴዳ ዛሬ፤ ሂንቴ ካቲያ ቄሳቱዋ፤ ጌሻ ኣሳኔ ፆሳሲ ቡዞ ኣሳ። ኬስ 19፡5-6፤ ኢሳ 43፡20፣ 21፤ ዛር 4፡20፤ 7፡6፤ 14፡2፤ ቲት 2፡14፤ ኢሳ 9፡2 10 ሂንቴ ካሴ ፆሳ ኣሳ ጊዲኪታ፤ ሺን ሃዒ ሂንቴ ኣ ኣሳ፤ ሂንቴ ካሴ ማሮቴꬃ ኣኪቤይኪታ፤ ሺን ሃዒ ማሮቴꬃ ኣኬዲታ። ሆስ 2፡23

11 ታ ዳባቶ፥ ሂንቴ ሃ ሳዓን ኢማꬃኔ ቤቴ ጊዲዴ ዴዒያዋንታ ጊዴዳዋዳን፥ ኡባ ዎዴ ሂንቴ ሼምፑዋና ኦሌቲያ ኣሳቴꬃ ኣሙዋፔ ሂንቴ ሃካና ማላ፥ ታኒ ሂንቴና ዎሳይ። 12 ኣሜኔና ኣሳይ ሂንቴና ኢታባ ኦꬂያዋንቱዳን ዚጊሪያ ዎዴ፥ ኪሪስቶሲ ዪያ ጋላሲ ሂንቴ ሎዖ ኦሱዋ ኡንቱንቱ ኣኬኪዴ፥ ፆሳ ጋላታና ማላ፥ ሂንቴ ዴዑዋ ኡንቱንቱ ጊዶን ሎይꬂ ናጊቴ።

13 ጎዳ ዲራው፥ ኣሳ ሂጊያ ኡባው ሞዴቲቴ፤ ካቲካ ኡባፔ ቦላ ጊዲያ ዲራው፥ ኣው ሞዴቲቴ። 14 ቃሲ ጋዲያ ሞዲያዋንቶካ ሞዴቲቴ። ኣዪሲ ጎፔ፥ ኡንቱንቱ ኢታባ ኦꬂያዋንታ ሙራናዉኔ ሎዖባ ኦꬂያዋንታ ጋላታናው ካቲያፔ ኪቴቴዲኖ። 15 ኣዪሲ ጎፔ፥ ፆሳይ ሂንቴ ሂንቴ ሎዖ ኦሱዋን ካꬊያ ኤያ ኣሳቱዋ ሃሳያ ጮዑ ኡዳናዋ ኮዬ። 16 ኣይሌቴꬃፔ ኬሲዴ፥ ፆሳ ኣዪሊያዳን ዴዒቴፔ ኣቲን፥ ሄ ኣዪሌቴꬃፔ ኬሴዳዋ ኢታቴꬃ ጌንꬂያዋ ኦꬆፒቴ። 17 ኣሳ ኡባ ቦንቺቴ። ሂንቴ ኢሻቱዋ ሲቂቴ። ፆሳው ያዪቴ። ካቲያ ቦንቺቴ።

18 ኣይላቶ፥ ሂንቴ ሎዖ ጎዳቱዋ ፃላላዉኔ ኣሺኬ ጎዳቱዋ ፃላላው ጊዴናን፥ ኢታቶካ ዳሮ ያዪዴ ሞዴቲቴ። 19 ኣዪሲ ጎፔ፥ ኣሳይ ናቂያ ዎዴ ዋዬቲያ ኡራይ ፆሳ ቆፒዴ፥ ኦጌ ባይናን ናቄቶፔ ፆሳይ ኣ ኣንጃና። 20 ኣዪሲ ጎፔ፥ ሂንቴ ናጋራ ኦꬂና፥ ሂንቴና ዴቺያ ዎዴ፥ ሂንቴ ዳንዳዮፔ፥ ሂንቴንቶ ኣይ ጋላታይ ዴዒ? ሺን ሎዖባ ኦꬂዴ ዋዪያ ሂንቴ ዳንዳዮፔ፥ ፆሳይ ሂንቴና ሄዎ ኣንጃና። 21 ፆሳይ ሂንቴና ፄሴዳዌ ሄዋ ዲራሳ፤ ኣዪሲ ጎፔ፥ ኪሪስቶሲ ሂንቴንቶ ዋዬቴ፤ ሂንቴ ኣ ቃታማ ካላና ማላ፥ ሂንቴንቶ ሌሚሱዋ ጊዴዳ። 22 ናጋራ ኢ ኦꬂቤና፤ ባሬ ዶናፔ ዎርዱዋ ሃሳዪቤና። ኢሳ 53፡9 23 ኣሳይ ባሬና ቦሪያ ዎዴ፥ ዛሪዴ ቦሪቤና፤ ዋዬቲያ ዎዴካ ማንዲቤና። ሺን ፂሉዋ ፒርዲያ ፆሳው ባሬና ኣꬂዴ ኢሜዳ። ኢሳ 53፡7 24 ኑኒ ናጋራው ሃዪቂዴ፥ ፂሎቴꬃው ዴዓና ማላ፥ ኪሪስቶሲ ባሬ ሁጴው ባሬ ኣሹዋን ኑ ናጋራ ማስቃሊያን ቶኬዳ፤ ሂንቴ ኣ ማይꬃን ፓፄዲታ። ኢሳ 53፡5 25 ኣዪሲ ጎፔ፥ ሂንቴ ኦጊ ባሌዳ ዶርሳ ማላ፤ ሺን ሃዒ ሂንቴ ሼምፑዋ ሄሚያዋኮኔ ናጊያዋኮ ሲሜዲታ። ኢሳ 53፡6