1 ኦኒኔ ዎሳ ጎሊያ ካሌꬂያዋ ጊዳናው ኮዮፔ፥ ሎዖባ ኣሞቴዳ ጊያ ሃሳያይ ቱማ። 2 ዎሳ ጎሊያ ካሌꬂያ ኡራይ ቦሪሴናዋ፥ ኢቲ ማቻቲ ፃላላይ ዴዒያዋ፥ ባሬና ሞዲያዋ፥ ባሬና ናጊያዋ፥ ባሬው ቤሲያዋ ኦꬂያዋ፥ ኢማꬃ ሞኪያዋ፥ ታማሪሳናው ዳንዳዪያዋ፥ ቲት 1፡6-9 3 ማꬆቴናዋ፥ ኣሺኬቴꬃፔ ኣቲን ዋላቄቴናዋ፥ ፓሉሜቴናዋ፥ ሻሉዋ ሲቄናዋ፥ 4 ናናይ ኣው ኣዛዜቲያዋኔ ቦንቺያዋ፥ ቃሲ ባሬ ጎሊያ ኣዪሳናው ዳንዳዪያዋ ጊዳናው ቤሴ። 5 ኣዪሲ ጎፔ፥ ኢቲ ኡራይ ባሬ ጎሊያ ኣዪሳናው ዳንዳዬናዋ ጊዶፔ፥ ፆሳ ኣማኒያዋንታ ዎቲ ኣዪሳናው ዳንዳዪ?

6 ኦቶሩዋን ሱጌቲዲ፥ ፃላሂያ ካፑ ፆሳ ፒርዳን ኩንዴዳዋዳን ኩንዴና ማላ፥ ኦራꬃ ኣማኔዳ ኣሳ ጊዳናው ቤሴና። 7 ፃላሂያ ካፑዋ ቦሪያኒኔ ጲሪያን ጌሌና ማላ፥ ሄ ኡራይ ዎሳ ጎሊያፔ ካሬና ዴዒያ ኣሳን ናሼቲያዋ ጊዳናው ቤሴ።

8 ሄዋዳን ቃሲ ዎሳ ጎሊያ ማዲያዋንቱ ኣሳይ ቦንቺያዋንታ፥ ላዑ ዶና ሃሳዬናዋንታ፥ ዳሮ ዎዪኒያ ኤሳ ኡሼናዋንታ፥ ሚሻው ያሬቴናዋንታ፥ 9 ኣማኑዋ ፁራ ጌሻ ዎዛና ቆፋን ናጊያዋንታ ጊዳናው ቤሴ። 10 ሄዋንቱ ካሴቲዴ ፓጬታናው ኮሼ። ፓጪያ ኣꬎዋፔ ጉዪያን፥ ዎሳ ጎሌን ኦꬂያዋንታ ጊዲዴ ኦꬂኖ።

11 ሄዋዳንካ ቃሲ ኡንቱንቱ ማቻቱ ኣሳይ ቦንቺያዋንታ፥ ዚጊሬናዋንታ፥ ባሬና ሞዲያዋንታ፥ ኡባባኒ ኣማኔቲያዋንታ ጊዳናው ቤሴ።

12 ዎሳ ጎሊያ ማዲያዌ ኢቲ ማቻቲ ፃላላይ ዴዒያዋኔ ቃሲ ባሬ ናናኔ ባሬ ጎሊያ ሎይꬂ ኣዪሲያዋ ጊዳናው ቤሴ። 13 ኣዪሲ ጎፔ፥ ዎሳ ጎሊያ ማዲያዋንታ ጊዲዴ፥ ሎዖ ኦሱዋ ኦꬂያዋንቱ ባሬንቱ ሁጴው ዎልቃማ ቦንቹዋ ዴሚኖ፤ ቃሲ ኪሪስቶሳ ዬሱሳን ባሬንቶ ዴዒያ ኣማኑዋ ሎይꬂ ፃሊዴ ሃሳያናው ዳንዳዪኖ።

14 ታኒ ኔኮ ኤሌካ ባና ጋዴ ሃዋ ኔው ፃፋይ። 15 ሺን ታኒ ቤናን ጋሚዖፔ፥ ፆሳ ጎሌን ኔኒ ዎታ ዴዓናው ቤሲንቶ ኤራና ማላ ፃፋይ። ሄ ጎሊ ቱማቴꬃው ቱሳኔ ባሶ ጊዲያ ዴዑዋ ፆሳ ዎሳ ጎሊያ። 16 ኑ ኣማኑዋ ፁራይ ዎልቃማ ጊዲያዋ ኦኒኔ ሲꬋናው ዳንዳዬና።