1 ኑኒ ጳዉሎሲ፥ ሲላሴኔ ፂሞቶሲ፥ ቴሴሎንቄን ዴዒያ ኣማኒያ ኣሳቶ ሃ ዳቢዳቢያ ፃፌቶ። ሄዋንቱ ፆሳ ኑ ኣቡዋንታኔ ጎዳ ዬሱሲ ኪሪስቶሳዋንታ።

2 ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣꬎ ኬካቴꬃይኔ ሳሮቴꬃይ ሂንቴንቶ ጊዶ።

3 ኑናዳን ፆሳ ካሊያዋንቶ፥ ሂንቴንቱ ኣማኑ ሎይꬂ ዲጪያ ዲራዉኔ፥ ሂንቴንቱ ኢቱ ኢቱዋ ሲቂያ ሲቁ ዳሪያ ዲራው፥ ኑኒ ሂንቴንቶ ቤሲያዋዳን፥ ፆሳ ኡባ ዎዴ ጋላታናው ቤሴ። 4 ሄዋ ዲራው፥ ሂንቴንታ ዬዴሳይኔ ዋዪያ ኡባይ ጋኪናካ ሂንቴንቱ ጌንጪያዋኔ ኣማኒያዋ ኑኒ ኑ ሁጴው ፆሳ ኣማኒያዋንቶ ኦዲዴ፥ ሂንቴዋን ጬቄቴቶ።

5 ሂንቴንቱ ዋዬቲያ ፆሳ ካዉቴꬃው ቤሲያዋንታ ጊዲዴ ፓይዴታና ማላ፥ ፆሳይ ፒርዲያ ፂሎ ፒርዳ ቤሲያ ማላ። 6-7 ፆሳይ ቱሙ ፒርዳ ፒርዳና። ጎዳይ ዬሱሲ ባሬ ዎልቃማ ኪታንቻቱዋና ታማ ላጩዋ ጊዶን ሳሉዋፔ ዪያ ዎዴ፥ ፆሳይ ሂንቴንታ ዋዪሲያዋንቱ ቦላ ዋዪያ ኣሃና። ቃሲ ዋዬቲያ ሂንቴናኔ ኑና ሼምፒሳና። 8 ቃሲ ፆሳይ ባሬና ኤሬናዋንታኔ ኑ ጎዳ ዬሱሲ ኪሪስቶሳ ዎንጋላ ሚሺራቾ ኣዛዜቴናዋንታ ሙራና። 9-10 ሄ ጋላሲ ኢ ባሬ ጌሻቱዋን ቦንቼታናዉኔ ቃሲ ባሬና ኣማኒያ ኡባቱዋን ሳቤታናው ዪያ ዎዴ፥ ኡንቱንቱ ጎዳ ሲንꬃፔኔ ኣ ዎልቃ ቦንቹዋፔ ሻኬቲዴ፥ ሜꬊና ባሻን ሙሬታና። ጋሱኔካ፥ ኑኒ ሂንቴንቶ ኦዴዳ ኪታይ ኣማኔቴዳ። ኢሳ 2፡10

11 ኑኒ ሂንቴንቶ ኡባ ዎዴ ፆሳ ዎሲያዌ ሄዋሳ። ኑ ፆሳይ ፄሴዳ ዴዖ ሂንቴንታ ቤሲያዋንታ ጊዴ ፓይዳናዳን፥ ኑኒ ኣ ዎሴቶ፤ ሂንቴንቱ ሎዖባ ኡባ ኣሞቲያዋኔ ሂንቴንቱ ኣማኑዋ ኦሱዋ ኢ ባሬ ዎልቃን ፖሎ። 12 ሄዋን ኑ ፆሳ ኣꬎ ኬካቴꬃኒኔ ቃሲ ኑ ጎዳ ዬሱሲ ኪሪስቶሳ ኣꬎ ኬካቴꬃን፥ ጎዳ ዬሱሳ ሱንꬃ ሂንቴንቱ ቦንቻና፤ ሂንቴናካ ኢ ቦንቻና።