1 ዶርሳይ ላፑ ማታፋቱዋፔ ኢቱዋ ዶዪሺን ቤዓዲ፤ ቃሲ ሼምፑዋና ዴዒያ ኦይዱ ሜꬌታቱዋፔ ኢቱ ጉጉንꬃ ጉንꬃ ማላቲያ ኮሻን፥ «ሃ ያ!» ያጊያዋ፥ ታኒ ሲሳዲ። 2 ታኒ ኢቲ ቦꬃ ፓራ ቤዓዲ። ሄ ፓራ ቶጌዳዌ ዎንዳፊያ ኦዪቄዳ፤ ቃሲ ኣው ኣኪሊሊ ኢሜቴዳ። ኦላ ኢ ፆኒዲኔ ቃሲካ ፆናናው ኬሴዳ። ዛክ 1፡8፤ 6፡3፣ 6

3 ዶርሳይ ላዔንꬆ ማታፋ ዶዬዳ ዎዴ፥ ሼምፑዋና ዴዒያ ሜꬌታቱዋ ላዔንꬁ፥ «ሃ ያ!» ያጊያዋ፥ ታኒ ሲሳዲ። 4 ቃሲ ሃራ ዳማ ፓራይ ኬሴዳ። ኣሳይ ኢቱ ኢቱዋና ሹኬታና ማላ፥ ሄ ፓራ ቶጌዳዎ ሳዓን ሳሮቴꬃ ዲጊያ ዎልቃይ ኢሜቴዳ። ዎጋ ማሻይ ኣው ኢሜቴዳ። ዛክ 1፡8፤ 6፡2

5 ዶርሳይ ሄዜንꬆ ማታፋ ዶዬዳ ዎዴ፥ ዴዑዋን ዴዒያ ሜꬌታቱዋ ሄዜንꬁ፥ «ሃ ያ!» ያጊያዋ፥ ታኒ ሲሳዲ። ያታዴ ካሬꬃ ፓራይ ኬሴዳዋ ቤዓዲ፤ ቃሲ ሄ ፓራ ቶጌዳዌ ባሬ ኩሺያን ሚዛኒያ ኦዪቄዳ። ዛክ 6፡2፣ 6 6 ታኒ ዴዑዋን ዴዒያ ኦይዱ ሜꬌታቱዋ ጊዶፔ ኮሻ ማላቲያባ ሲሳዲ። ሄ ኮሻይ፥ «ኢቲ ጋላሳ ኦሶ ዲርጉ ባጋ ኪሉዋ ዛርጋ፤ ቃሲ ኢቲ ጋላሳ ኦሶ ዲርጉ ኢቲ ኪሉዋ ባጋ ባንጋ። ሺን ዛይቲያኔ ዎዪኒያ ኤሳ ቆሆፓ» ያጊያዋ ሲሳዲ።

7 ዶርሳይ ኦይዴንꬆ ማታፋ ዶዬዳ ዎዴ፥ ዴዑዋን ዴዒያ ሜꬌታቱዋ ኦይዴንꬁ፥ «ሃ ያ!» ያጊያዋ፥ ታኒ ሲሳዲ። 8 ታኒ ጊራጬ ፓራይ ኬሴዳዋ ቤዓዲ። ሄ ፓራ ቶጌዳዋ ሱንꬃይ ሃይቁዋ፤ ኣ ጌዱዋ ሲዖሊ ካሌዳ። ሃይቁኔ ሲዖሊ ሳዓፔ ኦይዴንꬆ ኩሺያ ኦላን፥ ኮሻን፥ ሃርጊያን፥ ዶዓን ዎꬊሳና ማላ፥ ኡንቱንቱሲ ማታይ ኢሜቴዳ። ሂዝ 14፡21

9 ዶርሳይ ኢቼሼንꬆ ማታፋ ዶዬዳ ዎዴ፥ ኡንቱንቱ ፆሳ ቃላ ኦዴዳ ዲራዉኔ ባሬንቱ ማርካቴꬃን ኣማኔቴዳ ዲራው፥ ሹኬዳ ኣሳ ሼምፑዋ ያርሹዋ ያርሺያሳፔ ጋርሳን ቤዓዲ። 10 ኡንቱንቱ ባሬንቱ ቃላ ꬎቁ ኡዲዴ፥ «ኡባ ሞዲያ ጎዳው፥ ጌሻው፥ ቱማንቻው፥ ሳዓን ዴዒያ ኣሳ ቦላ ኣዉዴ ፒርዳይ? ቃሲ ኑ ሱꬃ ኣዉዴ ጪጌታይ?» ያጌዲኖ። 11 ኡንቱንቶ ሁጲያን ሁጲያን ቦꬃ ማዩ ኢሜቴዳ። ኡንቱንቱዋዳን ሃይቃናው ቤሲያ ኡንቱንቱ ላጌꬃ ኦሳንቻቱዋ ፓይዱኔ ኡንቱንቱ ኢሻቱዋ ፓይዱ ኩማና ጋካናው፥ ኡንቱንቱ ኣማሬዳ ዎዲያ ታኪሻና ማላ፥ ኡንቱንቱሲ ኦዴቴዳ።

12 ዶርሳይ ኡሱፑንꬃ ማታፋ ዶዬዳ ዎዴ፥ ታኒ ቤዓዲ፤ ቢታይ ሎይꬂ ቃፄዳ። ኣዋይፊ ካሬꬃ ማዩዋዳን ካሬፄዳ፤ ኣጌናይካ ሙሌ ሱꬃ ማላቴዳ። 13 ባላሲያ ጊያ ሚꬃቲ ጋሚዔ ኣይፊ፥ ዎልቃማ ጫርኩ ቃꬂና፥ ሳዓን ቆቆፌቲያዋዳን፥ ፆሊንታቱ ሳሉዋፔ ሳዓን ቆቆፌቴዲኖ። ኢሳ 34፡4 14 ሳሉ ፃፄቶ ማፃፋይ ፃፄቲያዋዳን፥ ፃፄቲዴ ꬋዪ ኣጌዳ፤ ዴሪ ኡባቱኔ ሃꬃን ዶዴቴዳ ሳዓይ ኡባይ ባሬንቱ ዴዒያሳፔ ኪቺ ኣጌዲኖ። 15 ሄዋፔ ጉዪያን፥ ሳዓ ካታቱ፥ ዴሪያ ሞዲያዋንቱ፥ ሻላቃቱ፥ ዱራቱ፥ ዎልቃማቱ፥ ቃሲ ሃራ ኣሳይ ኡባይ፥ ኣይሌቱ፥ ዎማናቱ፥ ዴሪያ ኬሲዴ፥ ጎንጎሉዋ ጊዶኒኔ ዴሪያን ዴዒያ ዛላ ጉዬ ባጋን ቆሴቴዲኖ። ኢሳ 2፡19፣ 21 16 ያቲዴ ዴሬቱዋኔ ሹቻ፥ «ካዉቴꬃ ኦይዲያን ኡቴዳዋ ኣይፊያፔኔ ዶርሳ ሃንቁዋፔ ኑ ቦላ ኩንዲዴ፥ ኑና ጌንꬄርኪቴሻ! ሆስ 10፡8፤ ሉቅ 23፡30 17 ኣዪሲ ጎፔ፥ ኡንቱንቶ ዎልቃማ ሃንቁዋ ጋላሳይ ጋኪኪቼዳ፤ ሄ ሃንቁዋ ዳንዳያናዌ ኦኔ?» ያጌዲኖ። ኢዩ 2፡11፤ ሚል 3፡2