3
ኣዪሁዳቱ ኣማኔናን ኣጉሳን ባዪዜዲኖ
1 ያቲና፥ ኣዪሁዳ ኣሳቱ ኣያኒ ኣዪሁዳ ጊዴና ኣሳፔ ኣꬊኖ? ዎይ ቃፃሬቲያዋን ኣይ ማዱ ዴዒ? 2 ሃዌ ኣዪሁዳቱዋ ኡባባኒ ሎይꬂ ማዴ፤ ኡባባፔ ካሴ ፆሳይ ባሬ ኪታ ሃዳራ ኣዪሁዳቶ ኢሜዳ።
3 ያቲና ኡንቱንቱፔ ኢቱ ኢቱ ኣማኔቴናዋ ጊዶፔ፥ ዋኒ? ሄዋ ዲራው፥ ፆሳይ ኣማኔቴና ያጊያዌ? 4 ሄዋ ጊዴና፤ ኣሳይ ኡባይ ዎርዳንቻ ጊዶፔካ፥ ፆሳይ ጊያዌ ቱማ ጊዳናው ቤሴ። ፆሳ ማፃፋይ፥ «ኔኒ ሃሳዪያ ዎዴ፥ ኔኒ ፂሎ ጊዲያዋ ኤሪሳናው ኮሼ፤ ኔኒ ሞቴቲያ ዎዴ፥ ሻቲማናው ቤሴ» ያጌ። ማዝ 51፡4
5 ሺን ኑ ባዪዙ ፆሳ ፂሎ ኦሱዋ ኤሪሲንቶ፥ ኑኒ ዋጋኔ? ኑ ቦላ ሃንቁዋ ኣሂያ ፆሳይ ባዪዛንቼ? ታኒ ኣሳይ ጊያዋዳን ጋይ። 6 ሄዌ ዋዪ ሃናና። ኣዪሲ ጎፔ፥ ሄዋዳን ጊዶፔ፥ ፆሳይ ሃ ኣላሚያ ቦላ ዎቲ ፒርዳኔ?
7 ሺን ታ ዎርዱዋን ፆሳ ቱማቴꬃይ ኣ ቦንቾ ዳሮፔ፥ ያቲና፥ ሃዋ ጋካናው ኣዪሲ ታ ቦላ ናጋራንቻዳን ፒርዲ? 8 ያቲና ኑኒ፥ «ሎዑ ያናዳን፥ ኣኔ ኢታባ ኦꬆይቴ» ኣዪሲ ጎኮ? ኢቲ ኢቲ ኣሳይ ሃዋ ታና ሞቲዴ ቦሬዲኖ፤ ኡንቱንቱ ፆሳፔ ቤሲያ ፒርዳ ኣካና።
ኣሳይ ኡባይ ናጋራንቻ
9 ሄዋ ዲራው፥ ኑኒ ዋጋኔ? ኑኒ ኣዪሁዳቱ፥ ኣዪሁዳ ጊዴና ኣሳፔ ዳሬቶ? ሄዋ ጊዴና፤ ኣዪሲ ጎፔ፥ ኣዪሁዳቱካ ኣዪሁዳ ጊዴና ኣሳቱካ ኡባይ ኢቲፔ ናጋራፔ ጋርሳን ዴዒያዋ ታኒ ካሴ ሂንቴንቶ ኦዳዲ።
10 ፆሳ ማፃፋይ ሃዋዳን ያጌ፤ ማዝ 14፡1-3
«ፂሎ ኣሳይ ኢቱኔ ባዋ።
11 ኣኬኪያ ኣሳይካ ባዋ፤
ዎይ ፆሳ ኮዪያዌካ ባዋ።
12 ኣሳይ ኡባይ ኦጊያፔ ካሬ ኬሴዲኖ፤
ኡባይ ሙሌካ ማዴናዋ ጊዴዳ።
ሎዖባ ኦꬂያ ኦኒኔ ባዋ፤
ሃራይ ኣቶ ኢቱኔ ባዋ።
13 ኡንቱንቱ ዶናይ ዶያ ዴዒያ ዱፉዋ ማላ።
ባሬንቱ ኢንፃርሳን ዎርዶቴዲኖ።
ኡንቱንቱ ዶናፔ ኣሳ ዎꬊያ ሾሻ
ዪሻ ማላ ሃሳያይ ኬሴ። ማዝ 5፡9
14 ኡንቱንቱ ዶናን ሼቃይኔ ጫሞባይ ኩሜዳ። ማዝ 10፡7
15 ኡንቱንቱ ሱꬃ ጉሳናው
ዳሪ ኤሌሊኖ። ኢሳ 59፡7-8
16 ባይዙኔ ኮሌꬃይ
ኡንቱንቱ ቤዳሳን ሃቃኒኔ ꬋዬና።
17 ኡንቱንቱ ሳሮቴꬃ ኦጊያካ ኤሪኪኖ።
18 ቃሲ ፆሳው ያዪያባይ
ኡንቱንቱ ቆፋን ባዋ»
ያጌ። ማዝ 36፡1
19 ኣሳ ኡባ ሃሳያ ዲጋና ማላኔ ኩሜንꬃ ሳዓ ፆሳ ፒርዳፔ ጋርሳው ኣꬃና ማላ፥ ሂጊያ ጊዶን ኦዴቴዳ ኡባባይ ሂጊያፔ ጋርሳን ዴዒያ ኣሳው ሃሳዪያዋ ኑኒ ኤሬቶ። 20 ፆሳ ሲንꬃን ኦኒኔ ሂጊ ኣዛዚያዋ ኦꬂያዋን ፂሌና፤ ሂጊ ኢቲ ኣሳይ ናጋራ ኦꬄዳዋ ኤራናዳን ኡዴ። ማዝ 143፡2፤ ጋል 2፡16
ኣሳይ ፂሊያዌ ኣማኑዋና
21 ሺን ፆሳይ ኣሳ ፂሊሲያ ኦጊ ሂጊ ባይናን ሃዒ ቆንጬዳ፤ ሂጊኔ ናባቱ ሄ ፂሎቴꬃባ ማርካቴዲኖ። 22 ፆሳይ ኣሳ ዬሱሲ ኪሪስቶሳ ኣማኒያዋን ፂሊሴ፤ ፆሳይ ሄዋ ኣ ኣማኒያ ኡባው ኦꬄ፤ ኣይ ሻኮቴꬃይኔ ባዋ።
23 ኣዪሲ ጎፔ፥ ኣሳይ ኡባይ ናጋራ ኦꬄዳ፤ ፆሳ ቦንቹካ ኡንቱንቶ ጉፄዳ። 24 ሺን ኡንቱንቱ ፆሳይ ኢሚያ ኣ ኣꬎ ኬካቴꬃን፥ ባሬንታ ዎዚያ ኪሪስቶሲ ዬሱሳ ባጋና ጮ ፂሌዲኖ። 25 ዬሱሳ ሱꬃን ኣሳይ ኣ ኣማኒዴ፥ ባሬ ናጋራው ማሮቴꬃ ዴማናው፥ ፆሳይ ኣ ኢሜዳ፤ ፆሳይ ሄዋ ባሬ ፂሎቴꬃ ቤሳናው ኦꬄዳ፤ ኢ ቤኒ ዎዲያን ኣሳ ናጋራ ዳንዳዪዴ፥ ካꬊ ባሺ ኣጌዳ፤ ሺን 26 ሃ ዎዲያን ባሬ ፂሎቴꬃ ቤሳናው ኣሳ ናጋራ ኣጌና፤ ፆሳይ ሄዋ ኦꬂያዋን ኢ ባሬ ሁጴው ፂሎ ጊዲያዋኔ ዬሱሳ ኣማኒያ ኡባ ፂሊሲያዋ ቤሴ።
27 ያቲና፥ ኑኒ ኣያው ጬቄታኔ? ኣይኔ ባዋ። ኣያ ጋሱዋኔ? ኑኒ ሂጌው ኤኖ ጊያዋኔ? ጊዴና፤ ኣማኑዋ ሂጊያናፔ ኣቲን። 28 ኣዪሲ ጎፔ፥ ኣሳይ ኣማኑዋን ፂላናፔ ኣቲን፥ ሂጊ ኣዛዚያዋ ኦꬂያዋና ጊዴና ያጊዴ ቆፔቶ።
29 ዎይ ፆሳይ ኣዪሁዳቱዋ ፃላላው ፆሴ? ኣዪሁዳ ጊዴና ኣሳው ፆሳ ጊዴኔ? ቱማ፥ ኣዪሁዳ ጊዴናዋንቶካ ኢ ቃሲ ፆሳ። 30 ኢቲ ፆሳ ፃላላይ ዴዔ፤ ኣዪሁዳቱዋ ኡንቱንቱ ኣማኑዋን ኢ ፂሊሳና፤ ቃሲ ኣዪሁዳ ጊዴናዋንታካ ኡንቱንቱ ኣማኑዋን ፂሊሳና። ዛር 6፡4፤ ጋል 3፡20 31 ያቲና፥ ኑኒ ሂጊያ ኣማኑዋን ጋፃ ሱጋኔ? ጊዴና፤ ሂጊያ ሚኒሶይቴፔ ኣቲን።