1 ታናዳን ኣማኒያዋንቶ፥ ሂንቴንቱ ኡባይ ሂጊያ ኤሪያ ዲራው፥ ታኒ ጊያዋ ሎይꬂ ኤሪታ፤ ሂጊ ኢቲ ኣሳይ ፓፃ ዴዔዳ ዎዴ ፃላላን ኣ ሞዴ። 2 ኣዪሲ ጎፔ፥ ኣሲና ጌሌዳ ሚሺራታ ኢዚ ኣሲናይ ፓፃ ዴዔዳ ኬናን፥ ሂጊያን ኣናና ቃሼታ ኡታዱ፤ ሺን ኢዚ ኣሲናይ ሃይቆፔ፥ ኣናና ጫቄዳ ሂጊ ኢዞ ሞዴና። 3 ሄዋ ዲራው፥ ኢዛ ባሬ ኣሲናይ ፓፃ ዴዒሺን፥ ሃራ ኣቱማዋ ጌሎፔ፥ ኣሳይ ኢዞ፥ «ዎሹሜዉኖ» ጋና። ሺን ኢዚ ኣሲናይ ሃይቆፔ፥ ሂጊ ኢዞ ሞዴና፤ ኢዛ ሃራ ኣሲና ጌሎፔኔ ኢዞ ኦኒኔ፥ «ዎሹሜዉኖ» ጌና።

4 ታናዳን ኣማኒያዋንቶ፥ ሄዋዳን ሂንቴንቱ ቃሲ ኪሪስቶሳ ኣሳቴꬃፔ ኢቲ ባጋ ጊዲያ ዲራው፥ ሂንቴንቱ ኣባጋና ሃይቄዲታ። ቃሲ ኑኒ ፆሳ ማዲያ ኦሱዋ ኦꬃና ማላ፥ ሂንቴንቱ ፆሳይ ሃይቁዋፔ ዴንꬄዳ ኪሪስቶሳዋንታ። 5 ኣዪሲ ጎፔ፥ ኑኒ ኑ ኣሳቴꬃይ ኮዬዳዋዳን ዴዒያ ዎዴ፥ ሂጊ ኑኒ ናጋራ ኦꬃናዳን፥ ኑና ዴንꬄꬄ፤ ኑ ኣሳቴꬃ ጊዶን ኢታ ኣሙ ዴዒያ ዲራው፥ ኑኒ ሃይቆ ኣይፊያ ኣይፌዶ። 6 ሺን ሃዒ ኑኒ ኑና ቃቼዳዎ ሃይቄዳ ዲራው፥ ፆሳይ ኑና ሂጊያ ቃሹዋፔ ቢሌዳ። ሄዋ ዲራው፥ ኑኒ ጌሻ ኣያናይ ጊጊሴዳ ኦራꬃ ኦጊያን ፆሳው ኤኖ ጋናዋፔ ኣቲን፥ ፃፌቴዳ ሂጊ ኑሲ ጊጊሴዳ ኤጫ ኦጊያን ኤኖ ጎኮ።

7 ያቲና፥ ኑኒ ዋጋኔ? ሂጊ ባሬ ሁጴው ናጋሬ? ሄዋ ጊዴና፤ ሺን ሂጊ ናጋራይ ኣዬንቶ ታና ኤሪሴዳ። ኣዪሲ ጎፔ፥ ታኒ ሂጊ፥ «ኣሳባ ኣሞቶፓ» ጊቤኔንቶ፥ ኣሳባ ኣሞቲያዌ ኣዬንቶ ኤሪኬ። ኬስ 20፡17 8 ሺን ናጋራይ ታኒ ኡባባ ኣሞታና ማላ፥ ኣዛዙዋ ባጋና ታ ቦላ ኦጊያ ዴሜዳ፤ ኣዪሲ ጎፔ፥ ሂጊ ባዌንቶ፥ ናጋራው ዎልቃይ ባዋ።

9 ካሴ ሂጊ ባይና ዎዴ ታኒ ፓፃ፤ ሺን ኣዛዙ ዬዳ ዎዴ ናጋራይ ዴዖ ሲሚና፥ 10 ታኒ ቃሲ ሃይቃዲ፤ ታና ፓፃ ዎꬃናው ፆሳይ ቆፔዳ ኣዛዙ፥ ታው ሃይቁዋ ኣሄዳ። 11 ኣዪሲ ጎፔ፥ ናጋራይ ኣዛዙዋ ባጋና ታና ጪሚያ ኦጊያ ዴሚዴ፥ ሄ ኣዛዙዋን ታና ዎꬌዳ። ዶም 3፡13

12 ሄዋ ዲራው፥ ሂጊ ጌሻ፤ ኣዛዙካ ጌሻ፥ ፂላኔ ሎዓ።

13 ያቲና፥ ሎዖባይ ታው ሃይቁዋ ኣሄዴ? ሄዋ ጊዴና፤ ሺን ታው ሄዋ ናጋራይ ኣሄዳ፤ ኣሳይ ናጋራይ ኣዬንቶ ሻኪዴ ኤራና ማላ፥ ናጋራይ ሎዖባ ባጋና፥ ታው ሃይቁዋ ኣሄዳ። ቃሲ ኣዛዙ፥ «ኦኒኔ ናጋራ ኦꬃናው ቤሴና» ያጊያ ዲራው፥ ናጋራይ ካሴዋፔ ኣꬊ ኢቴዳ።

14 ኑኒ ሂጊ ፆሳዋ ጊዲያዋ ኤሬቶ፤ ሺን ታኒ ታና ናጋራው ዛሊዔዳ ሃይቂያ ኣሳ፤ 15 ታኒ ኦꬂያዋ ዎዛና ኣꬂኬ፤ ኣዪሲ ጎፔ፥ ታኒ ኢፂያዋ ኦꬃይፔ ኣቲን፥ ታኒ ኦꬃናው ዶሲያዋ ኦꬂኬ። ጋል 5፡17 16 ታኒ ኢፂያዋ ኦꬂያዋ ጊዶፔ፥ ሂጊ ሎዓ ጊዲያዋ ማርካታይ። 17 ሄዋ ጊዶፔ፥ ሄ ዬዉዋ ታ ቦላ ዴዒያ ናጋራይ ኦꬂያዋፔ ኣቲን፥ ሃዒ ታኒ ኦꬂኬ።

18 ታናን፥ ሄዌኔ ታ ኣሳቴꬃን ሎዖባይ ዴዔናዋ ታኒ ኤራይ፤ ኣዪሲ ጎፔ፥ ሎዖባ ኦꬂያ ኣሙ ታ ቦላ ዴዖፔካ፥ ታኒ ሄ ሎዖባ ኦꬃናናው ዳንዳዪኬ። 19 ታኒ ኢፂያ ኢታባ ኦꬃይፔ ኣቲን፥ ታኒ ዶሲያ ሎዖባ ኦꬂኬ። 20 ሺን ታኒ ኢፂያዋ ኦꬂያዋ ጊዶፔ፥ ሄዋ ታ ቦላ ዴዒያ ናጋራይ ኦꬂያዋፔ ኣቲን፥ ሃዒ ሄዋ ኦꬂያዌ ታና ጊዲኬ።

21 ሲሚ ታኒ ሎዖባ ኦꬃናው ዶሲሺን፥ ኢታባ ኦꬂያዌ ታው ሂጌ ጊዲያዋ ዴማዲ። 22 ኣዪሲ ጎፔ፥ ታኒ ታ ዎዛና ጊዶን ፆሳ ሂጊያን ናሼታይ፤ 23 ሺን ታ ቦላ ጊዶን ዴዒያ ታ ዎዛና ቆፋ ሂጊያና ዋꬌቲያ ዱማ ሂጊያ ቤዓይ። ሄ ሂጊ ታ ቦላ ጊዶን ዴዒያ ናጋራ ኦሲሲያ ሂጊያን ታና ቃሺሴ። 24 ታኒ ኣይባ ናሼቺ ባይና ኣሴ! ታና ሃይቆ ኣፊያ ሃ ኣሳቴꬃፔ ኣሻናዌ ኦኔ? 25 ኑ ጎዳ ዬሱሲ ኪሪስቶሳ ባጋና ፆሳው ጋላታይ ጊዶ።

ሲሚ ታኒ ታ ዎዛና ቆፋን ፆሳ ሂጌው ኤኖ ጋይ። ሺን ታ ኣሳቴꬃን ታና ናጋራ ኦሲሲያ ሂጌው ኤኖ ጋይ።