Ibraawe.
1.
Xoossay beni wode, nu aawotuu nabatuwaa bagganna dumma dumma ogiyaaninne daro wodiyaan haasayeedda. 
Shin ha wurssetha wodiyaan, ubbabaa A laatissiide, yeletaa A bagganna medhdheedda bare Na7aa bagganna nuussi haasayeedda. 
Na7ay Xoossaa bonchcho poo7uwaa phoolee; qassi kumentha Xoossaa eeshshaa akkiide, bare wolqqaama qaalaan ha sa7aa naagee; yaatiide asaa nagaraappe geeshshiide, Ubbaappe Bolla Xoossaappe ushechcha bagganna saluwan utteedda. 
Xoossay aw immeedda sunthatethay kiitanchchatuwaappe dhoqqa gidiyaawadankka, unttunttuppe A loythi dhoqqu ootheedda. 
Ayissi gooppe, Xoossay bare kiitanchchatuwappe oona, “Neeni ta Na7aa; taani hachche new aawuwaa gidaaddi” geeddee? Woy qassi oona, “Taani aw aawuwaa gidana; ikka taw na7a gidana” geeddee? 
Qassi Xoossay bare bayra Na7aa ha sa7aa yeddana haniidde, “Ta kiitanchchatuwaa ubbatuukka aw goyinnino” yaageedda. 
Xoossay kiitanchchatuwaabaa haasayiidde, “Taani ta kiitanchchatuwaa carkkuwaa kessay; qassi ta oosanchchatuwaakka tamaa lacuwaa kessay” yaagee. 
Shin bare Na7aawaa haasayiidde, “Xoossaw, ne kawutethaa oydii medhi medhinaw de7ee. Ne kawutethaa xillotethaan ahasaa. 
Neeni xillotethaa siiqaade; naaquwaa ixxaadda. Xoossay, ne Xoossay neena ne laggetuwaappe aathiide, nashechchaan ililissiyaa zaytiyaa okkeeddawe hawaassa” yaagee. 
Xoossay hawaadan yaagee; “Godaw, koyro neeni sa7aa medhdhaadda; saluwaakka ne kushiyan medhdhaadda. 
Hewanttu ubbay dhayana; shin neeni de7ana. Unttunttu ubbaykka afilaadan wurana. 
Neeni unttuntta gaabiyaadan dakkoyana; qassi unttunttu afilaadan laamettanawantta. Shin neeni neenakka; ne laythay ubbaakka wurenna” yaagee. 
Shin Xoossay bare kiitanchchatuwappe ittuwaanne, “Taani ne morkketuwaa neeni gediyan yedhdhiyaawaa oothana gakkanaw, hawaan taappe ushechcha baggan utta” gibeenna. 
Kiitanchchatuu ubbay Xoossaw oothanawunne atotethaa demmana asatuwaa maaddanaw Xoossay kiitteedda ayyaanatuwa gidikkinooyee?