Saxaa.
5.
Itti xaaxetto maxaafay kawutethaa oydiyan utteeddawaa ushechcha kushiyan de7iyaawaa be7aaddi; he xaaxetto maxaafay laa77u baggannakka xaafetti utteedda; qassi laappu maatafay A bolla attametteedda. 
Taani itti wolqqaama kiitanchchay bare qaalaa dhoqqu udiide, “Maatafaa dooyyiide, xaaxetto maxaafaa billanaw bessiyaa uray oonee?” yaagiide, awaajjiyaawaa be7aaddi. 
Saluwan gidina woy sa7an gidina, woy sa7aappe garssan gidina, he xaaxetto maxaafaa billanaw woy A gidduwaa xeellanaw ooninne bessiyaawe baawa. 
Xaatha maxaafaa billanaw woy A gidduwaa xeellanaw bessiyaa uray baynna diraw, taani daro yeekkaaddi. 
Cimatuwaappe ittu taana, “Yeekkoppa; be7a, Yihudaa zariyaa gideedda Gaammuu, Daawite zarii xooneedda. I maatafaa dooyyanawunne xaaxetto maxaafaa billanaw bessee” yaageedda. 
Taani kawutethaa oydiyaappe, de7uwan de7iya oyddu medhetatuwaappenne qassi cimatuwappe gidduwan, shuketteedda Dorssaa malatiide eqqeeddaawaa be7aaddi; aw laappu kacetuunne laappu ayfetuu de7iino. Hewanttu alamiyaa ubbaa kiitetteedda Xoossaa laappu ayyaanatuwa. 
He Dorssay biide, kawutethaa oydiyaa bolla utteeddaawaa ushechcha kushiyaappe xaaxetto maxaafaa akeedda. 
I he xaaxetto maxaafaa akeedda wode, de7uwan de7iyaa oyddu medhetatuunne laatamanne oyddu cimatuu A sinthan kunddeeddino. Unttunttu huuphiyaan huuphiyaan diithaanne ixaanay kumeedda worqqaa miishshaa oyqqeeddino. He ixaanay geeshshatuu Xoossaa woossiyaawaa. 
Unttunttu, “Xaatha maxaafaa akkanawunne maatafaa dooyyaade xeellanaw new bessee. Ayissi gooppe, neeni shukettaadda. Neeni qommuwaa ubbaappe, dumma dumma gadiyaa qaalaa ubbaappe, yaraa ubbaappenne zariyaa ubbaappe ne suuthan Xoossaw asaa wozaadda. 
Nu Xoossaw oothana mala, unttuntta neeni kaatatuwaanne qeesatuwaa oothaadda. Qassi unttunttu sa7an mooddana” yaagiide ooratha mazimuriyaa yexxiino. 
Hewaappe guyyiyan, taani xeellaade, kawutethaa oydiyaa, de7uwan de7iya oyddu medhetatuwaanne cimatuwaa yuuyyi aadhdhiide eqqeedda daro kiitanchchatuwaa kooshshaa sisaaddi; unttunttu sha77aaninne miilooniyan paydetteeddino. 
He kiitanchchatuu barenttu qaalaa dhoqqu udiide, “Shuketteedda Dorssay wolqqaa, duretethaa, aadhdheedda eraa, minotethaa, bonchchuwaa, sabaa, galataa akkanaw bessee!” yaageeddino. 
Hewaappe guyyiyan, sa7an, saluwan, sa7aappe garssaaninne abbaa gidduwan de7iya medhetaa ubbaynne qassi hewaanttun de7iya medhetaa ubbay, “Kawutethaa oydiyaa bolla utteeddawoonne Dorssaw galatay, bonchchuu, sabaynne wolqqay medhi medhinaw gido!” yaagiide yexxishshin sisaaddi. 
De7uwan de7iya oyddu medhetatuu, “Amen77i” yaagina, cimatuu guufanniide goyinneeddino.