10
Noh no Yafet tititi-nonosi nara
1 Oe mandali monaeꞌ a basa ma, Noh ana nara hambu tititi-nonosiꞌ. Ia, Sem, Yafet no Ham tititi-nonosi nara.
2-5 Yafet tititi-nonosi nara, Gomer, Magog, Madai, Yawan, Tubal, Mesek ma Tiras. Esa-esaꞌ no dedꞌea na, leo na, ma rae heheli na.
Gomer tititi-nonosi nara, Askenas, Rifat ma Togarma.
Yawan tititi-nonosi nara, Elisa, Tarsis, atahori Kitim ra, ma atahori Dodanim* Susura Ibrani lasiꞌ ruma rae, ‘Rodanimꞌ’. mana leo sia tasi suu nara.
Ham tititi-nonosi nara
6 Ham tititi-nonosi nara, Kus, Misraim, Put, ma Kanaꞌan.† Kus naa, nara feaꞌ na, ‘Etiopia’. Misraim, nara feaꞌ na, ‘Masir’.
7 Kus tititi-nonosi nara, Seba, Hawila, Sabta, Raema ma Sabteka.
Raema tititi-nonosi nara, Syeba ma Dedan.
8 Kus ana tou na, naran Nimrod. Nimrod, atahori manaseliꞌ, mana dadꞌi malangga matati fefeu na. 9 Nesiꞌet na laoꞌ mia LAMATUALAIN, losa ana o dadꞌi mana sombu banda masiꞌet seliꞌ. Naa de, atahori ra olaꞌ rae, “Hule-huleꞌ fo ho dadꞌi mana sombu banda masiꞌet, onaꞌ Nimrod, fo mana hambu nesiꞌet na mia LAMATUALAIN.” 10 Fefeu na, Nimrod rae na mia Babel, Erek Akad, no Kalne. Basa mamanaꞌ naa ra, sia Sinear.‡ Sinear naa, Babel nara feaꞌ na. Aleꞌ ia, mamanaꞌ naa, sia Iran no Iraq. 11 Mia naa, ana koasa Asyur boe. Basa ma, nafefela kamboꞌ Niniwe, Rehobot-Ir, Kala, 12 ma Resen, mana sia Niniwe no Kala taladꞌa na. Basa naa ra, kambo monaeꞌ.
13 Misraim tititi-nonosi nara, atahori Ludim, atahori Anamim, atahori Lehabim, atahori Naftuhim, 14 atahori Patrisium, atahori Kasluhim, ma atahori Kaftorim. Atahori Kasluhim naa, atahori Filistin bei-baꞌi nara.
15 Kanaꞌan ana ulu na, naran Sidꞌon. Kanaꞌan o dadꞌi bei-baꞌi mia atahori Het, 16 atahori Yebusi, atahori Amori, atahori Girgasi, 17 atahori Hiwi, atahori Arki, atahori Sini, 18 atahori Arwadi, atahori Semari, ma atahori Hamati.
Kanaꞌan tititi-nonosi nara sea-saranggaa raꞌadodꞌooꞌ. 19 Sira rae na, mia Sidꞌon nakandoo nisiꞌ Gerar, losa Gasa. Ma mia Gasa, nisiꞌ Sodꞌom, Gomora, Adma, ma Seboim, losa Lasa.
20 Basa se, Ham tititi-nonosi nara. Esa-esaꞌ no dedꞌea na, leo na, ma rae heheli na.
Sem tititi-nonosi nara
21 Yafet aꞌa na Sem, dadꞌi atahori Eber ra bei-baꞌi nara.§ Atahori mahineꞌ ruma oi Eber naa, ‘Ibrani’.
22 Sem tititi-nonosi nara, Elam, Asyur, Arpaksad, Lud ma Aram.
23 Aram tititi-nonosi nara, atahori Us, atahori Hul, atahori Geter ma atahori Mas.* Mas nara feaꞌ na, ‘Mesek’.
24 Arpaksad ana na, naran Sela. Ma Sela ana na, naran Eber.
25 Eber hambu ana touꞌ rua. Ulu ka, naran Pelek (sosoa na ‘banggi-bꞌanggi’), huu leleꞌ naa, atahori ra leo banggi-bꞌanggi sia raefafoꞌ. Muri ka, naran Yoktan.
26 Yoktan tititi-nonosi nara, Almodad, Selef, Hasar-Mawet, Yera, 27 Hadoram, Usal, Dikla, 28 Obal, Abimael, Syeba, 29 Ofir, Hawila, ma Yobab. Basa se, Yoktan tititi-nonosi nara.
30 Mamana leleo nara, mia Mesa, nakandoo losa Sefar, fo mamana mbuku-leteꞌ seriꞌ rulu.
31 Basa se, Sem tititi-nonosi nara. Esa-esaꞌ no dedꞌea na, leo na, ma rae heheli na.
32 Basa naa ra, Noh tititi-nonosi nara, esa-esaꞌ no leo na. Oe mandali monaeꞌ basa ma, ara mana leo sea-saranggaa rasofe raefafoꞌ ia.