3
Dhèu roꞌo boe madhutu lii Ama Lamatua
1 Nèti badha aaꞌi-aaꞌi dhu Ama LAMATUA pajꞌajꞌi ètu rai-haha ne, mege ka dhu mèu risi kapodꞌe-kabèli. Ca lodꞌo, mege karèi bhèni na, aku nèngu na, “Tareꞌa, do? Ama Lamatua kai miu baku miꞌa hua aajꞌu aaꞌi-aaꞌi ètu dꞌara oka neꞌe.”
2-3 Ka bhèni na bꞌala, “Aadꞌo! Jiꞌi bisa ngaꞌa! Dhodhoka ajꞌu ca kapua ètu talora oka ne, Ama Lamatua kai, baku ngaꞌa hua na. Na peka na, jiꞌi baku ngaꞌa, aa baku gꞌagꞌe hua èèna kahèi, te aadꞌo na, jiꞌi madhe!”
4 Te ngaa mege na dhaa, aku nèngu na, “Waa! Sèmi boe èèna! Miu se madhe boe! 5 Ama Lamatua mema kai tareꞌa sèmi èèna, lula dhu neꞌa le, ladhe miꞌe hua aajꞌu èèna, miu jꞌajꞌi dꞌèlu-mèu sèmi Nèngu. Ho èèna na meꞌa mia dhu beꞌa, aa mia dhu karehe.”
6 Aa bhèni ne ladhe na ajꞌu ne beꞌa titu kèna, dènge hua na ele boe kee. Na ngee, “Ladhe jaꞌa kuꞌa hua ajꞌu neꞌe, jaꞌa dꞌèlu-mèu.” Hèia puu nare ka hua ajꞌu èèna, ka naꞌe. Naꞌe nare, nèti hia dhèu èmu na, ka naꞌa kahèi. 7 Raꞌa rare ka, heka reꞌa na rèngu dhu pake boe mèdha dhu hutu ua rèngu. Nèti èèna ka, ra lui rèu ajꞌu ho paꞌabhe era makae rèngu.
8 Dꞌai lodꞌo nihia, dua ra tadèngi lii core haga Ama LAMATUA ètu dꞌara oka èèna. Ka dua ra rai lasi luꞌu asa ca bèka ajꞌu, sèna ka LAMATUA baku nèdhi si. 9 Te ngaa Ama LAMATUA paroa mi dhèu mone èèna, aku Nèngu na, “Adam! Èu ètu mia?”
10 Hèia mone na dhaa, “Jaꞌa tadèngi lii Lamatua ètu neꞌe. Te ngaa jaꞌa makae, lula jaꞌa pake boe mèdha ètu ua. Nèti èèna ka, jaꞌa rai pahuni iisi.”
11 Ka Lamatua peka na, “Cee ka dhu peka, na èu dhu pake boe mèdha-papake? De tasamia? Tatu èu muꞌa le hua ajꞌu dhu Jaꞌa kai na, sina ma?”
12 Ka na bꞌala, peka na, “Bhèni dhu Èu hia ho paꞌanga dènge jaꞌa èèna, ka dhu hia jaꞌa kuꞌa!”
13 Hèia Ama LAMATUA peka dènge bhèni na, aku Nèngu na, “Nga tao ka, èu adꞌu madha jꞌara èèna?”
Ka bhèni ne dhaa, peka na, “Te mege ne ka dhu agꞌo jaꞌa! Nèti èèna ka, jaꞌa kuꞌa.”
Ama Lamatua dhoo si
14 Èle èèna ka, Ama LAMATUA dhoo mege èèna, aku Nèngu na,
“Jaꞌa huku èu, lula tatao èu. Nèti badha aaꞌi-aaꞌi, dhoka èu di dhu abhu huku sèmi neꞌe. Mulai nèti deo neꞌe toke èu madhe, èu dhoka rodꞌo dènge kakara, aa muꞌa ètu rai di. 15 Jaꞌa tao sèna ka, èu loe boe pamusu dènge bhèni ne. Aa ana-èpu miu dua mi sèmi èèna kahèi. Ana-èpu èu, èèna na kadhi hui tèdhu dhèu. Te ngaa ca dhèu nèti ana-èpu bhèni ne, èèna na dhedhe palaho kètu èu.”
16 Èle èèna ka, Ama Lamatua peka dènge bhèni ne,
“Èèna na, Jaꞌa pasusa tabha èu, ropa èu dènge babia; lodꞌo mora iisi, èu asa tabha jꞌèra. Masi ka sèmi èèna, dꞌara èu dꞌèi taruu dhèu èmu èu, aa nèngu ka dhu ator èu.”
17 Ka Ama Lamatua peka dènge mone ne,
“Èu madhutu boe lii paredha Jaꞌa, te ngaa èu nanene dhoka lii dhèu èmu èu di, ka èu muꞌa hua ajꞌu dhu Jaꞌa kai èèna. Nèti èèna ka, èu abhu huku kahèi. Aa rai lèke huku kahèi. Nèti deo neꞌe, toke dꞌai èu madhe, hudꞌi èu kabèli rai, heka èu abhu ngangaꞌa kèna. Dènge sabꞌa bia sèmi neꞌe ka, èu heka mamuri kèna. 18 Masi ka èu sèle rupa-rupa hini èèna ka, te ngaa dhu muri mai dhodhoka dhudhu-sete di. 19 Hudꞌi èu èi kabhèsu haa ku, heka rai hia èu ngangaꞌa kèna. Èu hudꞌi sabꞌa bia sèmi èèna ku, toke dꞌai lodꞌo èu madhe. Èu ne, Jaꞌa pajꞌajꞌi nèti rai. De ladhe èu madhe, èu jꞌajꞌi hari rai.”
20 Èle èèna ka, Adam pangare dhèu èmu na ‘Hawa’ (dhu sasoa na ‘dhu mamuri’), te nèngu ka jꞌajꞌi ina nèti dhèu dhu mamuri aaꞌi-aaꞌi.* Madhutu lii Ibrani, ‘adam’ sasoa na ‘dhèu rai-haha’.
21 Hèia Ama LAMATUA tao mèdha-papake nèti kaꞌuri badha, ka papake dua ra.
Ama Lamatua babège eele Adam dènge Hawa
22 Ka Ama LAMATUA peka, “Limuri ne, dhèu reꞌa le, mia dhu beꞌa dènge mia dhu karehe, sèmi Èdhi kahèi. De mage dhoka, rèngu raꞌa hua ajꞌu dhu èci hari na, dhu hia mamuri taa-taa.” 23 Èle èèna ka, Na babèga eele si nèti dꞌara oka Eden èèna, ho lasi asa era leo, sèna ka ra mamuri dènge sabꞌe oka-tedhe. Lula dhèu jꞌajꞌi nèti rai, de mamuri kahèi nèti rai. 24 Babège nare si, ka Lamatua paredha ana pajuu Na nèti sorga, dhu dènge èla,† Madhutu lii Ibrani, peka na, ana pajuu Lamatua nèti sorga sèra ètu neꞌe, ngara ra ‘kerubim’. ho lasi jꞌaga oka èèna re ca bèka dhimu. Rèngu dènge samala dhu heo haꞌa-haꞌa, dhu seru laꞌe-mai. Lamatua pua si bèdho eele jꞌara laꞌe sa dꞌara, te Nèngu dꞌèi boe dhèu puu rare hua ajꞌu dhu hia ra mamuri taa-taa èèna.