8
Ama Lamatua pake Kristus sèna ka paꞌèki lii pajaji hiu dhu beꞌa risi nèti lii pajaji dhui
1 De lii padhai jaꞌa dhu kabꞌua, sèmi neꞌe ka: limuri ne, èdhi dènge le kètu kapai risi agama dhu beꞌa risi nèti uru sèra. Nèngu neꞌe, nuka Yesus. Nèngu dhu madhèdi nèdꞌu paredha ètu sorga, ètu baboa gꞌana Ama Lamatua dhu Dedha Risi Eele.✡ Lii Sodꞌa Koa-Kio 110:1 2 Aa Na pakako sasabꞌa Na ètu era sabajꞌa dhu asli ètu sorga. Era neꞌe ne, paꞌue-ai Ama Lamatua mesa Na, nèti boe dhèu rai-haha.
3 Kètu kapai risi agama tema nèti mèdha persembahan dènge korban hia Ama Lamatua. Nèti èèna ka, Yesus hudꞌi nèti korban kahèi. 4 Te ngaa Yesus pakako boe sasabꞌa Na ètu rai-haha. Lula ètu rai-haha ne, abhu le ama agama dhu hia mèdha persembahan dènge korban asa Ama Lamatua madhutu atora Musa. 5 Ra pakako sasabꞌa ra ètu dꞌara Paleo Manèngi-Mangajꞌi, dhu ca ropa dènge era sabajꞌa dhu asli ètu sorga. Te lodꞌo Musa neo tao Paleo ne, Ama Lamatua pasanèdꞌe ne, peka na, “Sanèdꞌe paie-iie! Èu hudꞌi tao ku palèke mola-mola dènge rupa dhu Jaꞌa padꞌelo dènge èu ètu kolo ledhe nèi!”✡ Kalua nèti Masir 25:40 6 Te ngaa sasabꞌa Yesus ne, kapai risi nèti ama agama rupa dhui aaꞌi-aaꞌi ra. Te limuri ne, Ama Lamatua paꞌèki le lii pajaji dhu beꞌa risi, lula Na pake Yesus jꞌajꞌi kalete kahèi, sèna ka dhèu rai-haha bisa padame dènge Ama Lamatua.
7 Uru èèna, Na paꞌèki lii pajaji dènge Musa, ropa Na papuru atora sèra. Masi ka sèmi èèna, te ngaa dhèu rai-haha bisa boe mamuri mola-mèci madhutu atora ne. Nèti èèna ka, rèngu bisa boe pabeꞌa dènge Ama Lamatua. Nèti èèna ka, limuri ne, parluu abhu lii pajaji dhu beꞌa risi hari. 8 Te lodꞌo uru sèra, Ama Lamatua dhu kai le dhèu unu Na, lula rèngu sisu pahari-pahari atora Na. Ropa Na taha nare heka dꞌara, hèia Na nasa, ka peka, aku Nèngu na,
“Nanene paie-iie, te Jaꞌa ne Lamatua!
Tatu Jaꞌa neo paꞌèki hari lii pajaji hiu
dènge dhèu Israꞌel sèra,
aa dènge suku Yahuda.
9 Lii pajaji dhu Jaꞌa neo paꞌèki dènge rèngu èèna,
sama boe dènge lii pajaji uru èèna
dhu hia mi bèi-baki ra.
Te uru èèna, Jaꞌa kadhèi kacui-aai ra,
ho lere si kalua nèti rai Masir.
Te ngaa rèngu tao boe
madhutu ngaa dhu ra pajaji dènge Jaꞌa.
Nèti èèna ka, Jaꞌa pusi-pahae heka si.
10 Lii pajaji dhu èèna na Jaꞌa paꞌèki dènge suku Israꞌel,
isi na sèmi neꞌe ka:
Pe Jaꞌa tao atora Jaꞌa ètu dꞌara ngangee ra.
Pe Jaꞌa suri paredha Jaꞌa, ètu dꞌara rèngu.
Hèia Jaꞌa jꞌajꞌi Lamatua ra,
aa rèngu jꞌajꞌi dhèu unu Jaꞌa.
11 Bèli-camèdꞌa rèngu parluu heka ajꞌa-nori angalai ra,
dènge aꞌari ra, peka na,
‘Miu hudꞌi tadhe ku Lamatua!’
te rèngu aaꞌi-aaꞌi ra tadhe mèu Jaꞌa,
mulai nèti ana iiki-iiki toke dꞌai kapai aae.
12 Lula Jaꞌa neo padꞌelo rasa kasia Jaꞌa mi rèngu,
nèti èèna ka Jaꞌa pabhèlu eele sasala-sasigo ra aaꞌi-aaꞌi.”✡ Yermia 31:31-34
13 Lodꞌo Lamatua padhai lii nare, Na neo paꞌèki lii pajaji hiu dènge ra, sasoa na, lii pajaji dhui pake heka. Nèbhu heka, na ele.