9
Ama Lamatua hagꞌe nare dhèu Israꞌel sèra
1 Èdhi dhu paꞌèki dènge Kristus, padhai lii dhu lèke. De jaꞌa monya boe miu. Dꞌara iiki jaꞌa kahèi, peka na, Roh Lamatua dhu ator dꞌara jaꞌa. 2-3 Jaꞌa peka sèmi neꞌe ka: dꞌara jaꞌa susa. Jaꞌa rasa bia, lula jaꞌa ngee kèdhi dhèu-dhèu jaꞌa mesa ku. Te jaꞌa neo sèna ka dhèu jaꞌa, dhèu Yahudi* Dhèu Yahudi, èci èèna ka dènge bangsa Israꞌel, nuka dhèu Yahudi dhu pea ètu rai Israꞌel; aa dhu ètu era-era leo kahèi. Te ngaa suku Yahuda sama boe dènge suku Yahudi. Te suku Yahuda, nuka èci nèti canguru dua suku Israꞌel. sèra, paꞌèki dènge Kristus kahèi, te ngaa ae dhu parcaya boe Nèngu. Ladhe sèmi jaꞌa dhu bisa bhoke jꞌara hia rèngu, jaꞌa sadia manèngi ho Lamatua huku jaꞌa, sèna ka gati si. Aa jaꞌa sadia manèngi kahèi, sèna ka Lamatua hagꞌe eele jaꞌa nèti Kristus, ho rèngu bisa paꞌèki dènge Ne. 4 Aa te ngaa, rèngu se dhèu Israꞌel, nuka bangsa èci dhu kalua hua iia titu kèna. Lamatua dhu dedꞌe le rèngu se, jꞌajꞌi ana-ana Na karèi nèti katanga rai ka. Na padꞌelo dadedha Na mi rèngu. Na paꞌèki dènge ra rupa-rupa lii pajaji. Na pangèdꞌu si Atora Na. Rèngu ka dhu reꞌa mèu pahaha iisi mi Lamatua, aa sabꞌa hia Ne. Lamatua dhu pamoa le, neo padꞌelo dꞌara hua iia Na mi rèngu.✡ Kalua nèti Masir 4:21, 14:22 5 Dhèu Yahudi jꞌajꞌajꞌi ra nèti bèi-baki jiꞌi, nuka: Abraham, Isak dènge Yakob (dhèu rare ngara ‘Israꞌel’ nèti Yakob). Aa Kristus, dhu Lamatua pajaji mema karèi nèti uru-uru ka ho pua mai èèna, jꞌajꞌajꞌi Na nèti bèi-baki jiꞌi dhèu Yahudi kahèi. Kristus neꞌe ka, Ama Lamatua kahèi dhu nèdꞌu paredha mi aaꞌi-aaꞌi se. De lèke, ladhe dhèu dedꞌe koa-kio hia Ne toke dꞌai mia-mia. Lèke tareꞌa!✡ Lii Lolo dhu Uru Tèka 32:22-32
6 Masi ka abhu dhèu Israꞌel ae ka dhu sèmi mèka Kristus, te ngaa dhèu bisa boe peka, na, lii pajaji Lamatua èèna jꞌajꞌi boe. Baku ngee, na, dhèu aaꞌi-aaꞌi dhu jꞌajꞌi nèti bèi-baki Israꞌel sèra, jꞌajꞌi bangsa Israꞌel dhu Ama Lamatua hagꞌe nare ho jꞌajꞌi dhèu unu Na. 7 Nuka sèmi, dhèu ae-ae jꞌajꞌajꞌi ra nèti bèi-baki jiꞌi, Abraham. Te ngaa rèngu aaꞌi-aaꞌi jꞌajꞌi boe ana-èpu dꞌèlu Abraham dhu Ama Lamatua hagꞌe nare. Te Lamatua dhu peka le dènge Abraham, aku Nèngu na, “Ana-èpu èu dhu Jaꞌa tadhe, dhoka rèngu dhu jꞌajꞌi nèti ana mu Isak di.”✡ Lii Lolo dhu Uru Tèka 21:12
8 Sasoa na, karèi nèti uru dꞌai sange neꞌe, ana-èpu aaꞌi-aaꞌi boe nèti baki jiꞌi Abraham, dhu jꞌajꞌi ana-ana Ama Lamatua. Dhodhoka ana-èpu dhu jꞌajꞌi nèti lii pajaji Lamatua dènge Abraham di, dhu Lamatua tadhe. Rèngu ka di dhu jꞌajꞌi ana-ana Lamatua dhu lèke. 9 Te Lamatua paꞌèki lii pajaji dènge Abraham, peka na, “Pe dꞌai tèu mai nèi, Jaꞌa lèpa hari mai. Lodꞌo èèna dhèu èmu èu Sara nara iisi le ana mone ca dhèu.”✡ Lii Lolo dhu Uru Tèka 18:10
10 Mesa boe èèna di. Te Isak dènge dhèu èmu na Ribka, nara iisi ana kajari dua. 11-12 Lodꞌo Ribka nara iisi mèka ana na si, rèngu se dhae tao mèka jꞌara dhu mola, do dhu bhelu. Masi ka sèmi èèna, te ngaa Lamatua peka uuru le dènge Ribka lula-nèti ana kajari dhu kalua uuru, peka na, “Bèli-camèdꞌa aꞌa ne sabꞌa hia ari na.” Lamatua peka sèmi èèna ho padꞌelo, na, ladhe Nèngu hagꞌe nare le dhèu èci, Nèngu dhu neꞌa le, neo pake dhèu ne sèna ka tao tasa mera mia. Hèia Lamatua pili ari na, jꞌajꞌi dhèu unu Na. Lamatua parluu heka pamata, ho laladhe ari ne neo tao ngaa, lula Lamatua dhu neꞌa mema le.✡ Lii Lolo dhu Uru Tèka 25:23 13 Te Lamatua dhu peka le ètu dꞌara Sasuri Mola-Mèci Na, aku Nèngu na,
“Jaꞌa pili kore le Yakob,
te ngaa Jaꞌa tule eele Esau.”✡ Meliaki 1:2-3
14 De èdhi peka tasamia? Ele boe cahagꞌe peka na, “Lamatua pamaꞌète lii langu, bia cabèka, do?” Bisa boe! 15 Te uru èèna, Ama Lamatua dhu peka le dènge Musa, na,
“Ladhe abhu dhèu dhu paraga dènge sasusa,
Jaꞌa ka dhu pili neo padꞌelo rasa kasia mi cee, aa Jaꞌa ka dhu pili neo bhoke dꞌara Jaꞌa mi dhèu dhu Jaꞌa pajꞌujꞌu unu Ku.”✡ Kalua nèti Masir 33:19
16 De dhèu neꞌe rasa boe dꞌara taleo Lamatua, lula dadꞌèi nèngu unu na, do, lula tatao unu na. Te ngaa lula Lamatua mesa Na ka dhu neo padꞌelo dꞌara taleo Na mi dhèu neꞌe. 17 Te ètu dꞌara Sasuri Mola-Mèci, Lamatua padhai lii dènge dhèu aae Masir, peka na, “Jaꞌa dedꞌe kore èu jꞌajꞌi dhèu aae, lula Jaꞌa neo pake èu ho padꞌelo koasa Jaꞌa mi dhèu ae-ae. Dènge sèmi èèna, dhèu dhu pale-lème rai-haha ne, bisa koa-kio kolongara Jaꞌa.”✡ Kalua nèti Masir 9:16
18 De ladhe Lamatua neo padꞌelo rasa kasia Na mi dhèu èci, na, Nèngu tao. Aa ladhe Na neo tao dꞌara ca dhèu adhu sèmi hadhu, na, Nèngu tao sèmi èèna kahèi.✡ Lole Hari Jꞌara-jꞌara Mamuri 7:7-9
Lamatua bisa padꞌelo rasa kasia Na, te ngaa Na sèmi nare boe bhabhelu
19 Ladhe sèmi abhu dhèu dhu sisu jaꞌa, peka na, “Kèri sèmi èèna, ladhe Lamatua neo adꞌu jꞌara èci, cee ka dhu bisa labꞌa Ne? Aadꞌo, sina ma? De nga tao ka Nèngu neo pèci sasala mi dedha èdhi? Èèna adil boe!”
20 Ladhe abhu dhu pangee sèmi èèna, jaꞌa dhaa sèmi neꞌe ka: “Èu pangee na, èu ne cee?! Èu neo padhai lii labꞌa Lamatua, do?” Baku sèmi èèna! Te ètu dꞌara Sasuri Mola-Mèci, abhu dhu suri, peka na, “Ladhe dhèu tao mèdha èci, abhu ètu mia mèdha ne karèi hari dhèu dhu tao ne peka na, ‘Nga tao ka èu tao jaꞌa sèmi neꞌe!?’ ”✡ Yesaya 29:16, 45:9 21 Nuka sèmi dhèu tao èru rai. Nèti rai mea ca kahore, nèngu dènge hak tao gꞌala dhu kaleꞌe cue, sèna ka dhèu koa ne. Dhèu ne dènge hak kahèi, pake rai mea ca kahore ne tao era kaboko maruru èci, madhutu dadꞌèi na.
22 Sèmi èèna kahèi dènge Ama Lamatua. Nèngu dènge hak ho tao madhutu dadꞌèi Na. Nèngu neo padꞌelo mi dhèu aaꞌi-aaꞌi, na, Nèngu nasa, aa tule eele bhabhelu-katubꞌa dhu dhèu tao. Nèngu neo ho dhèu reꞌa kahèi, na, Nèngu unu koasa ae-ae. Sèna ka dhèu bisa reꞌa, Nèngu taha dꞌara dènge dhèu dhu tao rupa-rupa bhabhelu-katubꞌa. Te ngaa mi dhèu bhelu-katubꞌa, dhoka mate lodꞌo di, ho ra ele iie aaꞌi. 23 Lamatua adꞌu-ue jꞌara ne, ho pajꞌujꞌu mi dhèu ae, na, Nèngu neo padꞌelo rasa kasia Na mi dhèu cahagꞌe. Rèngu seꞌe ka dhu Na hagꞌe nare mema le, sèna ka dedꞌe si padedha-dedha. Aa Na neo sèna ka dhèu reꞌa, na, Nèngu mesa Na ka dhu dedha risi aaꞌi. 24 Te èdhi se dhu Na pili nare le, ho jꞌajꞌi dhèu unu Na. Èdhi se, cahagꞌe nèti dhèu Yahudi, aa cahagꞌe hari nèti dhèu leo rai kara. 25 Uru èèna, Lamatua pake dhèu nèti lii padhai Na, ngara na Hosea, ho suri dhèu leo rai kara sèra, peka na,
“Abhu dhèu dhu uru èèna, unu boe Jaꞌa,
te ngaa Jaꞌa neo paroa kore si, na,
‘Miu se, dhèu Jaꞌa.’
Aa abhu suku dhu uru èèna, Jaꞌa sue boe,
te ngaa Jaꞌa neo paroa kore si, na,
‘Miu se, suku dhu Jaꞌa sue.’ ”✡ Hosea 2:23
26 Hosea suri kahèi, na,
“Ètu èèna,
ètu era dhu Lamatua peka dènge si, na,
‘Miu se, jꞌajꞌi boe dhèu Jaꞌa!’
Pe Lamatua dhu Mamuri èèna, neo peka dènge si, aku Nèngu na,
‘Limuri ne, miu jꞌajꞌi le ana-ana Jaꞌa!’ ”✡ Hosea 1:10
Na peka sèmi èèna, lula Na kasia mi dhèu Yahudi boe sèra.
27 Dhèu nèti lii padhai Lamatua èci hari, nuka Yesaya, peka nèdhi le lula-nèti suku Israꞌel, na,
“Masi ka dhèu Israꞌel ca nau-ca nadha,
nuka sèmi salae dhasi,
te ngaa bèli-camèdꞌa Ama Lamatua patabuli rèngu nèti koasa sasala-sasigo ra,
dhoka dhèu ciki di.
28 Te èèna dꞌai lodꞌo na,
ho Ama Lamatua pamaꞌète lii langu nèti dhèu aaꞌi-aaꞌi ètu rai-haha ne,
sama sèmi dhu Na peka mema le.
Te ngaa Na pamata heka,
te Na pamèci nare lai-lai!”✡ Yesaya 10:22-23
29 Lodꞌo uru èèna, Yesaya peka le lula-nèti dhèu Yahudi sèra, aku nèngu na,
“Èdhi oto,
lula Ama Lamatua dhu Koasa Risi Aaꞌi èèna,
soro tèke sèna ka ana-èpu èdhi cahagꞌe abhu sodꞌa.
Te ladhe aadꞌo sèmi èèna,
na, èdhi se aadꞌo heka le,
nuka sèmi dhèu kota Sodom dènge kota Gomora sèra.”✡ Yesaya 1:9
Lii Lolo Beꞌa hia suku Israꞌel dhu roꞌo boe nanene Lamatua
30 De èdhi neo peka ngaa? Èdhi neo peka, na, “Dhèu dhu Yahudi boe sèra mai nèti mia-mia. Uru èèna rèngu tenge boe jꞌara ho pabeꞌa rèngu dènge Lamatua. Te ngaa limuri ne, ra pabeꞌa le dènge Ne, lula parcaya Yesus Kristus. 31 Te ngaa dhèu Israꞌel sèra, neo ae le tenge jꞌara sèna ka tao madhutu atora Musa, ho pabeꞌa rèngu dènge Lamatua, te ngaa jꞌajꞌi boe.”
32-33 Nga tao ka rèngu bisa boe pabeꞌa dènge Lamatua? Lula rèngu dhodhoka neo tao madhutu atora di, sèna ka Na sèmi nare si nuka sèmi dhèu dhu dꞌara mola, te ngaa rèngu parcaya boe Yesus Kristus. Hèia rèngu oe sèmi kadhunu sa, lèke “hadhu kadhunu” cue. Neꞌe ne ka naneo nèti Sasuri Mola-Mèci Lamatua, dhu peka na,
“Ladhe ku sa neꞌe!
Te Jaꞌa pamadhèdi le ca Dhèu
ètu ledhe Sion, nuka kota Yerusalem.
Dhèu ne nuka sèmi hadhu cue,
dhu dhèu kadhunu lèke Ne.
Te ngaa cee dhu parcaya Ne,
nèngu parluu boe makae.”
Hadhu ne, nuka Yesus. Te ngaa dhèu Israꞌel tule eele Ne. Èèna na sama sèmi rèngu kadhunu, ka bèbha lula hadhu deo na.✡ Yesaya 28:16
*9:2-3 Dhèu Yahudi, èci èèna ka dènge bangsa Israꞌel, nuka dhèu Yahudi dhu pea ètu rai Israꞌel; aa dhu ètu era-era leo kahèi. Te ngaa suku Yahuda sama boe dènge suku Yahudi. Te suku Yahuda, nuka èci nèti canguru dua suku Israꞌel.
✡9:4 Kalua nèti Masir 4:21, 14:22
✡9:5 Lii Lolo dhu Uru Tèka 32:22-32
✡9:7 Lii Lolo dhu Uru Tèka 21:12
✡9:9 Lii Lolo dhu Uru Tèka 18:10
✡9:11-12 Lii Lolo dhu Uru Tèka 25:23
✡9:13 Meliaki 1:2-3
✡9:15 Kalua nèti Masir 33:19
✡9:17 Kalua nèti Masir 9:16
✡9:18 Lole Hari Jꞌara-jꞌara Mamuri 7:7-9
✡9:20 Yesaya 29:16, 45:9
✡9:25 Hosea 2:23
✡9:26 Hosea 1:10
✡9:28 Yesaya 10:22-23
✡9:29 Yesaya 1:9
✡9:32-33 Yesaya 28:16