1 Jaola morlalu jatai, miljaru ngadalani palpa morlalu ngundranandru purila nganai, ngangau tanali karkarkanietjaia jaola ja kutjia ngujangujara patala nganai;

2 Jedikaukaubanietja jeljujeljundru, tanali turumalka tanani ngara ngaialani ngamalkai;

3 Tanali daudauai noa patala, ja jirijiribai wata buka tajila, nina Godali pantjimana wonti jurakokanali tajila tanangu, tanali morlalu ngundrai ja morlaluta matja ngujamai.

4 Ngangau Godaia pantjimani pratjana ngumu nganai, ja panila murumuru, tanali jurakokanali ninaia tajinani;

5 Ngangau nauja kulikiri pantjiai Godaia jaurali ja ngatjinali.

6 Jundru jenia ngatatani kuranani, jeruja jidni Jesuni Christuni mili talku nganala nganai, ja pirnarila nganai morlalu ngundranaia jaurani ja ngujangujara ngumuni, nunkangu jidni karipaterinala.

7 Jaola pania ja widlapirnaia jaura baku jinkangundru woraramai, ja jigleri wontjau Godani wodatarana ngamanaia.

8 Ngangau palkujeli wontjani ngumu nganai ngaljengaljeni; ja Godani wodatarana ngamani poto warupotuni ngumu nganai, ja talpadakani ngamalkai tepini karari ja nunkangu nau wokarananto.

9 Morlalu naupini jaura nganai, ja ngumu ninaia patala.

10 Jendrania ngaiani jigleri ngankai, ja tanali ngaianina jupai, ngangau ngaiani tepia Godani kalkani ngaianini kurala wapaia, Naupini kana warupotuja Kulkanipirna nganai, ja morla pirna tanangu, tanali morlalu ngundrai.

11 Jenia jirijiribau ja ngujangujara jinkiau!

12 Wata kulnujeli jidna teri waka ngundraiatimai, a‐ai, mudlamalka pantjiau tanangu, tana morlalu ngundrai, jaurani, ja wirarinani, ja ngantjanani, ja Jaolani, ja morlalu ngundranani, ja ninta pirnani.

13 Warapamai, kurukurubamai, ngujangujara jinkiamai ngani wokaranantulu.

14 Murlaia poto, jinkangu ngananani, wata waka ngundramai, ninaia jinkangu talpadakanali ja kana kaparaia mara kuraterinali jinkinala.

15 Ninapini manujeli ngundrau, nunkangupini ngamamai, jinkani punkana tinkari pantjinanto warupotuni.

16 Ngamalkaterianimai, ja ngujangujara ngamalkamai, nunkangupini ngamamai! Jundru jenia ngankanani, jidni kulkaterila nganai, ja bakana tanana, tanali jidna ngarai, kulkala nganai.