1 Kɛ̀ ti Yiɛ̀ nKuyie nyíɛ́ kɛ́ m bɛ́innɛ̀ kɛ dɔ̀: 2 Yɛkotinɔ̀ ɔ̃̀nyɛ nyɛ di nɑ́ɑ́mmɛ̀ Isidɑyɛɛribɛ tenkɛ̀ miɛkɛ? Kɛ tú:

3 Mí ndi Yiɛ̀ nKuyie m bomu kɛ̀ míì bɛ́i. Di tɛ̃́nkɛ í yó nsɔkɛ́ kɛ́nɑ́ɑ́ ndɛ kó dikotinùù Isidɑyɛɛribɛ tenkɛ̀ miɛkɛ. 4 Bɑ́ wè o fòmmu bo n nɔu miɛkɛ nkɛ, cicɛ fòmmu nɛ̀ dɛbirɛ kɔ̃mu. Wèè cɑ̀ɑ̀rɛ̀ weè yóó kú.

5 Kɛ̀ wèè wetí kɛ dɔɔri n dɔ́mɛ̀, 6 wèè í kɑrì yɛtɑ̃rɛ̀ ĩ́nkɛ̀ kɛ yo ntibɔɔdiitì, ò mɛ nyí feu iwũɔ̃ Isidɑyɛɛribɛ bɔɔtenkɑɑnìi, kɛ í sɑ̃ũ omɑ́ɑ̀ nɛ̀ otɔù pokù, kɛ í duɔ́nɛ̀ onitipòkù o yɔ́ntì mɔ̀nnì. 7 Wèè í cií mbɛtɔbɛ̀ kɛ yo mbɛ kpɛrɛ, kɛ ɔ̃ɔ̃ tɛ̃́nnɛ́ wèè ò mɔ̀kɛnɛ̀ dibɑ̀nnì ò wè dɔúnnɛ̀ dɛ̀, kɛ í yuuku, kɛ pɑ̃ɑ̃ ndikònnì bo bɛ̀ tidiitì, kɛ dɑɑti tiyɑ̀ɑ̀tì bɛ̀ɛ̀ bo yɛfɔ̃̀kperɛ̀. 8 Kɛ ɔ̃ɔ̃ í mpèntɛ kɛ́ndɔ́ bɛ̀ɛ ò yietí kɛ́nɔ́ɔ́, nkɛ yóu mɛyɛi, kɛ bekù timɔ́mmɔnti, 9 Kɛ tũ n tɑnnɔ̀ kɛ dɔɔri n kuɔ́ yɛ̃ mmù kɛ tɔ timɔ́mmɔnti. Ò tú onìtì wèè wetí wènwe, dɛ yiɛ̀ nyó nfòùmu, míì bɛ́i.

10 Kɛ̀ dɛ yiɛ̀ mmɛ mpɛitɛ́ dɛbirɛ kɛ̀ dɛ̀ tu oyɛiwe kɛ kɔù bɛnìtìbɛ̀, kɛ̀ dɛ̀ dɔ̀ɔ̀ dɛndɛ kó dɛ̀mɑrɛ̀. 11 Kɛ̀ dɛ cicɛ yie í dɔ̀ɔ̀ dɛ̀mɑrɛ̀ kɛ̀ dɛ̀ kɑ̀ri yɛtɑ̃rɛ̀ ĩ́nkɛ̀ kɛ di tibɔɔdiitì kɛ sɑ̃ũ dɛmɑ́ɑ̀ nɛ̀ otɔù pokù. 12 Kɛ̀ dɛ̀ í tɛ̃̀ńnɛ́ wèè dɛ̀ mɔ̀kɛnɛ̀ dibɑ̀nnì ò dɛ̀ duɔ́ ndɛ̀. Kɛ̀ dɛ̀ cií mbɛcĩ̀rìbɛ̀ nɛ̀ bɛsénnìbɛ̀ kɛ yo mbɛ kpɛrɛ, kɛ̀ dɛ̀ fìé Isidɑyɛɛribɛ bɔɔtenkɑɑnìi kɛ dɔ̀ɔ̀ isɔkɛ kpɛrɛ. 13 Kɛ níí pentɛ kɛ́ndɔ́ kɛ́cɔ̃ntɛ, wenwe kó kubotí ò nfòùɑ̀? Ò bo kú, ò dɔ̀ɔ̀ ìì sɔkɛ doti o yuu ĩ́nkɛ̀ nkɛ, kòò yóó kú.

14 Kòo nìtì mɛ mpɛitɛ́ dɛbirɛ kɛ̀ dɛ̀ wùó ndɛ cicɛ dɔɔri mɛ̀ɛ̀ yɛi nkó dimɑ̀ɑ̀ kɛ í mɛ̀ tũ̀nnɛ. 15 Kɛ í kɑtì yɛtɑ̃rɛ̀ ĩ́nkɛ̀ kɛ yo ntibɔɔdiitì kɛ í feu iwũɔ̃ Isidɑyɛɛribɛ bɔɔtenkɑɑnìi kɛ í sɑ̃ũ nhomɑ́ɑ̀ nɛ̀ otɔù kóo pokù. 16 Kɛ í cií mbɛnìtìbɛ̀ kɛ yo mbɛ kpɛrɛ, kɛ í yuuku kɛ pɑ̃ɑ̃ mmudiì dikònnì bo bɛ̀, kɛ dɑɑti tiyɑ̀ɑ̀tì bɛ̀ɛ̀ bo yɛfɔ̃̀kperɛ̀. 17 Kòò í dɔ̀ɔ̀ dɛ̀ɛ̀ í síɛ́, kɛ ɔ̃ɔ̃ í mpèntɛ kɛ́ndɔ́ kɛ́cɔ̃ntɛ, yoo bɛ̀ɛ ò yietí kɛ́nɔ́ɔ́ kɛ tũ n tɑnnɔ̀ nɛ̀ n kuɔ́. Dɛ yiɛ̀ mbɑ́ɑ́ kú o cicɛ yɛi nkpɛ́í, nhò yó nfòùmu. 18 O cicɛ wèè fèkù bɛtɔbɛ̀ kpɛrɛ, kɛ yuuku bɑ́ ò í dɔɔri mɛsɑ̀ɑ̀ nho kɔbɛ cuokɛ̀, weè yóó kú o yɛi nkpɛ́í.

19 Kɛ̀ díndi tú: Bɑ nkpɛ́í nte kɛ̀ dɛbirɛ ɔ̃ɔ̃ í ntɔ dɛ cicɛ yɛi.

21 Kɛ̀ ti Yiɛ̀ Kuyie nyíɛ́ kɛ́bɛ́i nkɛ dɔ̀: Kòo yɛiwe weè mɛ ncèètɛ kɛ yóu mɛyɛi nhò do dɔɔri mɛ̀, kɛ tũ n kuɔ́ imɔu, kɛ dɔɔri dɛ̀ɛ̀ wetí, n dɔ́ dɛ̀, ò yó nfòùmu, ò bɑ́ɑ́ kú. 22 N tɛ̃́nkɛ bɑ́ɑ́ dentɛní ò do dɔ̀ɔ̀ mɛ̀ɛ̀ yɛi. Ò yó nfòùmu ò dɔ̀ɔ̀ mɛ̀ɛ̀ sɑ̀ɑ̀ nkpɛ́í. 23 Mí di Yiɛ̀ nKuyie n dɔ́ oyɛiwee kúmɑ́ɑ̀? N dɔ́ wèe yóu mɛyɛi nhò dɔ̀ɔ̀ri mɛ̀mmɛ kɛ́nfòù. 24 Wèè do dɔɔri mɛsɑ̀ɑ̀ nkɛ̀ weè mɛ nyóu mɛsɑ̀ɑ̀ nhò do dɔɔrimɛ̀, kɛ kɔ̀ù bɛnìtìbɛ̀ kɛ tũ̀nnɛ bɛyɛibɛ dɔɔri mɛ̀ɛ̀ yɛi ò nɛ́ nfòùɑ̀? N tɛ̃́nkɛ bɑ́ɑ́ dentɛní mɛsɑ̀ɑ̀ nhò do dɔ̀ɔ̀ mɛ̀. Ò yóó kúmu ò yetɛ mɛ̀ɛ̀ kpɛ́í n kpɛti kɛ dɔ̀ɔ̀ mɛyɛi. 25 Kɛ̀ díndi tú mí ndi Yiɛ̀ nKuyie ndɔɔri dɛ̀ í wenni: Kéntɛ́nɛ̀ díndi Isidɑyɛɛribɛ n tú mù: Míì kó mɛdɔɔ̀rìmɛ̀ í wennɑɑ̀? Dɛ̀ í dò ndíì kɔ̃mɛ sĩ̀nɑ̀ɑ̀? 26 Kɛ̀ nsɑ̀ wèè do dɔɔri mɛsɑ̀ɑ̀ nkòò mɛ̀ yóu kɛ dɔɔri mɛyɛi nkɛ ku, o kó mɛyɛi nhò do dɔɔri mɛ̀ mɛɛ̀ kpɛ́í nte. 27 Wèè do dɔɔri mɛyɛi nkɛ̀ weè mɛ nyóu mɛyɛi nhò do dɔɔri mɛ̀ kɛ dɔɔri dɛ̀ɛ̀ wetí, n dɔ́ dɛ̀, ò yó nfòùmu. 28 Ò tɑ̃ɑ̃tɛ́ mɛ̀ɛ̀ kpɛ́í nkɛ yóu mɛyɛi nkɛ dɔɔri mɛsɑ̀ɑ̀ ndɛɛ̀ te kòò yó nfòù ò bɑ́ɑ́ kú, 29 Bɑ́ nɛ̀ mɛmmɛ díndi Isidɑyɛɛribɛ kɛ̀ di tú n dɔɔ̀rìmɛ̀ í wenni, míì dɔɔ̀rìmɛ̀ í wennɑɑ̀ kɛ̀ di kɔ̃mɛ? Dɛ̀ í tú díì kɔ̃mɛ sĩ̀nɑ̀ɑ̀? 30 Dɛɛ̀ te kɛ̀ n yóó di bekɛ́nɛ̀ díndi Isidɑyɛɛribɛ bɑ́ wè o dɔɔ̀rìmɛ̀ dòmmɛ̀. Mí ndi Yiɛ̀ nKuyie mmíì bɛ́i. Ceetɛnɛ̀ kɛ́yóu mɛyɛi nkɛ tɛ̃́nkɛ bɑ́ ndɔɔri dɛ̀ɛ̀ bo di bɔ. 31 Yóunɛ̀ mɛyɛi ndi dɔɔrimɛ̀ kɛ́mɔɔtɛ mɛyɛmpɑ̀mmɛ̀, di dɔ́ kɛ́kúmɑɑ̀ Isidɑyɛɛribɛ yɑ́ɑ bɑ nte? 32 Mí ndi Yiɛ̀ nKuyie n yí dɔ́ òmɔù bo kúmɛ̀, ceetɛnɛ̀ tũnkɛ́ kɛ́nfòù.