2 N wɛ̃̀tɛ kɛ tùùtɛnɛ̀ Kuyie nku kɛ dɔ́ kɛ́yíɛ́ kɛ́bɛ́i,

n yĩkú n nùù kɛ̀ n dɑbònnì bɑ́ɑ́ yɛ̀nní kɛ yĩɛ̃kɛmu.

3 Kɛ̀ ǹ do nyɛ̃́ m bo kù yɑ̀ dɛ̀,

kɛ̀ n do bo nɑ kɛ́kɔtɛ ku cĩ́ɛ̃̀tɛ̀,

4 N nɑ nkù beé n kpɛti,

N nɑ nkù tìútɛ́ nh u tì.

5 N nɑ nkèè kù bo n tɛ̃́nnɛ́ tì,

kɛ́bɑntɛ́ kù m̀ mɔ̀kɛnɛ̀ tì.

6 Ku sɑ̀ɑ̀ nɑ nni mbɑ̀ɑ̀omɑɑ̀?

Ɔ́ɔ̀, kù yó n kéntɛ́mu mɛyɔɔ̀mmɛ̀.

7 Kɛ̀ nní nkù nɑ̀ɑ́nnɛ̀ kɛ tú onìtì wèè wetí,

dɛ mɔ̀nnì kunku n kóo beéntì yó n fĩ́ĩnkomu sɑ̃́ɑ̃̀.

8 Kɛ̀ n kɔ̀tɛ diyiè yìɛ̀ní kɛ̀ɛ̀ bíɛ́kɛ̀ kù í kɛ̀ bo,

kɛ̀ ǹ kɔ̀tɛ diyiè tɑɑ̀ kɛ̀ m bɑ́ kù yɑ̀.

9 Kù sɑ̀ɑ̀ nɛ́ bo mpĩ́ mmùmɑmù mmu kubɑkù yoú bíɛ́kɛ̀ nkɑɑ̀? Ɔ́ɔ̀,

yɑ́ɑ̀ kù sɔ̀ri kucɑ̃̀nku bíɛ́kɑ̀ɑ̀? N yí nɑ kɛ kù yɑ̀.

10 Kù mɛ nyɛ̃́mu n tũ nkùù cɛ,

kɛ̀ kù ǹ yɑ̀ɑ́kɛ́ n yɛtìmu pɑ́íí mɛsɔɔ nsɑ̀ɑ̀mɛ̀ kɔ̃mɛ.

11 N nɑɑ̀cɛ̀tɛ̀ tũ nku nɑcɛ̀fɔ̃̀tɛ̀ nyɛ,

n tũ nku kó kucɛ nku weti weti n yí dɑutɛ́.

12 Ku tɑnnɔ̀ nyɛ n tũmmɛ̀,

n dɔɔrimu ku nɑ́ɑǹtì yɛ̃mmɛ̀ kɛ̀ dɛ̀ pɛ̃ɛ̃tɛ́ n yɛ̀mmɛ̀ dɔ́ tì.

13 Kɛ̀ kuù tɑ̃ɑ̃tɛ́ tìmɑtì òmɔù í bo wèè bo kù pɑ̀ɑ?

Kù dɔ́ tì, kù ɔ̃ɔ̃ ti ndɔɔ̀.

14 Kù yóó dɔɔ̀mu kù tɑ̃ɑ̃tɛ́ kɛ bo dɔɔ̀ tì n kpɛ́í

kù wùó nkɛ bo dɔɔ̀ tì n kpɛ́í tì sũmu.

15 Dɛɛ̀ te kɛ̀ n kɔ̃m̀bùɔ̀tì duò ku ììkɛ̀,

kɛ̀ ǹ totí n yɛ̀mmɛ̀ kufɔ̃wɑɑ́ nhɔ̃ɔ̃ kù nni mpĩ́nnɛ̀mu.

16 Kuyie nkuù dɛ̀itɛ n kɔ̃m̀bùɔ̀,

muwɛ̃rímú mumɔu yiɛ̀ nweè donnɛ́ n kɔ̃m̀bùɔ̀tì.

17 Bɑ́ nɛ̀ Kuyie mmɛ nni ndɑ̀tínnɛ́mɛ̀ dibiìnnì n yí cĩ́ɛ̃́kɛ́.

Kɛyensɔ̀ùkɛ̀ kù n dɑ̀tínnɛ́ kɛ̀ kɛɛ̀ í te.