ɑ bɑ́ɑ́ yɛ̃̀ n yɛ̃ nhɑ ndɔɔri dɛ̀,

2 kéntɛ́ mɛsɑ̀ɑ̀ mɛciì nkó tinɑ́ɑǹtì,

kɛ́duɔ́ nhɑ yɛ̀mmɛ̀ kɛ́ tì bɑntɛ́.

3 Yú mɛciì nnɛ̀ mɛyɛ̀mmɛ̀ kɛ̀ dɛ̀ ndɑ teénnɛ̀.

4 Wɑmmú dɛ bɛ̀ wɑɑ̀mmɛ̀ idíítí,

kɛ́ ndɛ̀ bɛ̀tì tikpɑ̀tì kɔ̃mɛ.

5 Dɛ mɔ̀nnì ndi ɑ yóó depɛmɛ̀ Kuyie nkɛ́nɑ kɛ́ kù yĩ̀ɛ̃́tɛ́,

6 kɛ yɛ̃́ Kuyie nkuù duɔ̀mmɛ̀ mɛciì,

kuù ɔ̃ nte kòo nìtìi ciitɛ́ kɛ́bɑntɛ́ dɛ̀mɑrɛ̀.

7 Kuù dɔ̀ɔ̀ri mɛsɑ̀ɑ̀ mbɛ̀ɛ̀ borimɛ wenni,

kɛ kɑ̃nkɛ́ bɛ̀ɛ̀ dɔ̀ɔ̀ri kù dɔ́mɛ̀.

8 Kuù kɑ̃nkɛ́ bɛ̀ɛ̀ dɔɔ̀rìmɛ̀ wenni,

kɛ bɑɑ bɛ̀ɛ̀ kù duɔ́ mbɛmɑ́ɑ̀.

9 Kɑ̀ɑ kèḿmú n kpɛti ɑ bo bɑntɛ́ kucɛ sɑ̀ɑ̀kù

kɛ́nɑ kɛ́dɔɔ̀ dɛ̀ɛ̀ sìɛ́.

10 Dɛ mɔ̀nnì ndi ɑ bo nciìmɛ̀,

kɑ̀ɑ ciì ndɑ duɔ́ ndiwɛ̀ì.

11 Kɛ̀ mɛciì nni ndɑ kɑ̃nkɛ́,

kɛ̀ mɛyɛ̀mmɛ̀ dɑ bɑɑ.

12 Dɛɛ̀ yó nte kɑ̀ɑ bɑ́ɑ́ dɔɔ̀ mɛyɛi,

dɛɛ̀ yó ndɑ kɑ̃nkɛ́ siyɑ́ɑ̀bìsí yɛmbɛ̀,

13 nɛ̀ bɛ̀ɛ̀ yóu kucɛ sɑ̀ɑ̀kù kɛ tũ ndibiìnnì kɔku,

14 bɛ̀ɛ̀ kpɛ̀itinɛ̀ mɛyɛi,

kɛ̀ dɛ̀ bɛ̀ nɑɑtinɛ̀ mɛyɛi,

15 kɛ̀ bɛ̀ tũ̀ nyicɛ ìì í wenni.

16 Mɛm̀mɛ ɑ bo nɑmɛ̀ kɛ́yentɛ́nɛ̀ onitipòkù

wèè dɔuti dɔutinɛ̀ bɛnitidɑɑbɛ̀ o nùnɑɑtí,

17 wèè yetɛ o dɔù,

kɛ bùtínnɛ́ ò dɔúnnɛ̀ dìì nùù Kuyie.

18 Wèè tũ̀ nho cĩ́ɛ̃̀tɛ̀ kó kucɛ

ò kɔ̀ri mukṹṹ mborɛ̀ ndɛ.

19 Wèè kɔ̀tɛ o borɛ̀ ò ɔ̃ɔ̃ í nwɛ̃̀tɛní,

ò tɛ̃́nkɛ ɔ̃ɔ̃ í mpɛ̀tɛ́ mufòmmu kó kucɛ.

20 Tɑ̃ɑ̃tɛ́ bɛnitisɑ̀ɑ̀bɛ̀ kó kucɛ,

kɛ́ntũ mbɛ̀ɛ̀ borimɛ wenni bɛ dɔɔ̀rìmɛ̀.

21 Kɛ yɛ̃́ bɛ̀ɛ̀ borimɛ wenni,

bɛɛ̀ yó mbo dihɛì miɛkɛ.

22 Bɛ̀ nɛ́ yóó dennɛmu bɛnitiyonkubɛ dihɛì miɛkɛ,

bɛ̀ yóó dɛitɛmu bɛ̀ɛ̀ borimɛ í wenni.