N Yiɛ̀ nKuyie n dɑ yumu, cɑ̃rikɛní kɛ́ n teennɛ̀,

kéntɛ́ kɛ́keè n dɑ kuɔ̀nnɛ̀mɛ̀.

2 Yóu kɛ̀ m bɑ́ɑmmuu tuɔkoo ɑ borɛ̀,

kɛ́ndò ntihúúntì fɔ̃ɔ̃ti,

cɔutɛ́ m bɑ́ɑmmìi kɛ̀ ì ndò nkuyuoku kó dipɑ̃nnì.

3 N Yiɛ̀ nKuyie nhɑ́ ndò n nùù kóo bɑ̀rì,

mbɑɑ n nùù dibòrì kɔ̃mɛ.

4 Bɑ́ɑ́ yóu kɛ̀ n duɔ́ n yɛ̀mmɛ̀ dɛyɛirɛ,

bɑ́ɑ́ yóu kɛ̀ n tũnnɛ bɛnitiyonkubɛ kó mɛdɔɔ̀rìmɛ̀,

kɛ́dɔɔ̀ mɛyɛi, bɑ́ɑ́ yóu kɛ̀ n di bɛ kó tibɑndiitì.

5 Wèè wetí kòò bo m potɛ́ ò n dɔ́mu,

kɛ̀ Kuyie nkóo nìtì n tiè ndɛ̀ dò nhò yɔ́ɔ̀rì tùdɑ̀ɑ̀rí nwe n yuu,

m bɑ́ɑ́ ò yetɛnɛ̀ n yuu,

m bɑ́ɑ́ yóu m bo m bɑ́ɑ́mmɛ̀ Kuyie nkɛ tú kùu cónnɛ́ bɛyɛibɛ yɛi.

6 Bɛ̀ bo ntemmùní dìì mɔ̀nnì bɛ kó bɛbɑɑtíbɛ̀ yɛtɑ̃́rɛ̀ ĩ́nkɛ̀,

bɛ̀ bo bɑntɛ́ ɑ nɑ́ɑǹtì do nɑɑtimɛ̀.

7 Bɛ̀ ɔ̃ nduɔ̀ kɛtenkɛ̀ kɛ̀ kɛ̀ yɑúmɛ̀,

kudɔnkù yóó mɛ nhɑɑtɛ,

kɛ̀ bɛ kṹɔ̃̀ yɛ̀ɛ̀ yɑɑ́ yɑɑ́ kɛ̀ yɛ̀ɛ tɑɑ́ kudɔnkù.

8 N Yiɛ̀ nKuyie m búɔ́ fɔ̃́ nwe,

n sɔri fɔ̃́ɔ̃̀ borɛ̀ ɑ bɑ́ɑ́ yóu kɛ̀ n kú.

9 A nni nkɑ̃nkɛ́ bɛ̀ n dii tìì cùɔ̀tì,

n dɛ́tinnɛ mɛyɛi ndɔɔ̀rìbɛ̀ kó yɛdíìntɑ̃́rɛ̀.

10 Yóu kɛ̀ bɛyɛibɛɛ duó bɛ̀ dii tìì cùɔ̀tì miɛkɛ

kɛ̀ mí n yentɛ́.