1 Nɑomii dɔù Edimɛdɛki nɑɑ̀mùnkù kou mɔù weè do bo kɛ mɔkɛ o kpɛrɛ kòo yètìrì feí, kɛ̀ bɛ̀ ò tu Boɑsi. 2 Diyiè mɑrì kɛ̀ Odutii nɑ́kɛ́ Nɑomii kɛ dɔ̀: N dɔ́ kɛ́kɔ̃tɛ́ òmɔù pɑku nku, kòo yie n dɛ́rí tidiitì. Kɛ̀ Nɑomii dɔ̀: Kɔ̃tɛ́ m birɛ.

3 Kòo kɔ̃tɛ́ kupɑku mɑkù kɛ̀ bɛtɔ̃mbɛ̀ nni kòò tũ̀ nkɛ dɛ́ɛ́ntɛ. O yuu yó nnɑɑti dɛ̀ kɛ sɔ̃́ nku pɑku tú Boɑsi kɔku nku.

4 Kɛ̀ Boɑsii ítɛ́ Bɛtideɛmmu kɛ́kɔ̃tóo kɛ́dɔu mbɛtɔ̃mbɛ̀ kɛ dɔ̀: Ti Yiɛ̀ nKuyie nni ndi bonɛ̀. Kɛ̀ bɛ̀ɛ ò tɛ̃̀ńnɛ́ kɛ dɔ̀: Kù dɑ dɔɔ̀ mɛsɑ̀ɑ̀.

5 Kɛ̀ Boɑsii bekɛ wèè bɑ̀ɑ bɛtɔ̃mbɛ̀ kɛ dɔ̀: We ntu onitipòkù yie?

6 Kòò dɔ̀: Nɑomii nɛínɛ̀ní wènwe Mɔɑbu, 7 ò mɔɔmu dinùù kɛ bo dɛ́rí, nɛ̀ dikṹnweńnì ndi ò dɛ̀ɛ́mmɛ̀, ò yĩ́ cɔ́kɛ̀ sɑ́m̀pɔ́ nwe.

8 Kɛ̀ Boɑsii nɑ́kɛ́ Oduti kɛ dɔ̀: N kóo sɑpɑ̀ɑ̀ nhɑ bɑ́ɑ́ kɔtɛ òmɔù pɑku, ḿbo diɛ nnɛ̀ n nitipotɔ̃mbɛ̀ kɛ dɛ́ɛ́. 9  N nɑ̀kɛ́mu bɛtɔ̃mbɛ̀ kɛ tú bɛ̀ bɑ́ɑ́ dɑ bɛ́innɛ̀, kɛ̀ sinɛ́yɛ̃ĩ dɑ pĩ nhɑ́ kɔtɛ kɛ́yɑ̃̀ bɛ̀ dòní mɛ̀ɛ̀ niɛ.

10 Kɛ̀ Odutii nínkú Boɑsi ììkɛ̀ kóò nɑ̀kɛ́ kɛ dɔ̀: Dɛ̀ yĩmɛ kɑ̀ɑ n dɔ̀ɔ̀ mɛsɑ̀ɑ̀ nkɛ m pɛ́nsìrì, mí nwèè tu opɔ̀ɔ̀?

11 Kɛ̀ Boɑsi dɔ̀: Bɛ̀ ǹ nɑ̀kɛ́mu ɑ dɔ̀ɔ̀mɛ̀ ɑ cɔ̀kù nɛ̀ ɑ dɔù kumɛ̀ nɛ̀ ɑ yóumɛ̀ ɑ cicɛ nɛ̀ ɑ yɔ̃ nɛ̀ ɑ ɛì kɛ kɔ̀tɛní kɛ bonɛ̀ kubotí tɛkù, ɑ do í yɛ̃́ kù. 12 Ti Yiɛ̀ nKuyie ndɑ yietí mɛsɑ̀ɑ̀ nhɑ dɔ̀ɔ̀ mɛ̀. Ti Yiɛ̀ nKuyie tínti nyIsidɑyɛɛribɛ tũ nkù dɑ dɔɔ̀ mɛsɑ̀ɑ̀ nkɛ̀ mɛ̀ ndɛu, kɛ́ n dɑ kɑ̃nkɛ́.

13 Kɛ̀ Oduti dɔ̀: N yiɛ̀ ɑ nni ndɔɔri mɛsɑ̀ɑ̀ nhɑ n dɔ̀ɔ̀mɛ̀ kɛ nɑ́ríkùnnɛ n yɛ̀mmɛ̀, kɛ n nɑ́ɑ́nɛ̀ diwɛ̀ì kɛ dò nhɑ kó bɛtɔ̃mbɛ̀ m mɛ nyí bɛ̀ tùɔ̀kɛ.

14 Bɛ̀ yóó di dìì mɔ̀nnì kɛ̀ Boɑsii nɑ́kɛ́ Oduti kɛ dɔ̀: Kɔtɛní kɛ́di, pɔɔ̀tɛ̀ ɑ pɛ̃́ɛ̃̀ tikṹntì. Kòo ò duɔ́ ntidiitì bɛ̀ pũ̀ńnɛ́ tì, kòò cɑ̀ɑ́kɛ́ kɛ́nsɑ̀nnɛ̀ kɛ́súɔ́. 15 Ò wɛ̃̀tɛ dìì mɔ̀nnì kɛ bo dɛ́rí kɛ̀ Boɑsii nɑ́kɛ́ bɛtɔ̃mbɛ̀ kɛ dɔ̀: Yóunɛ̀ we kòo ndɛ́ɛ́, di bɑ́ɑ́ ò kɔkɛ́nɛ̀. 16 Di yóu kɛ̀ tidiitì nduò kòò dɛ̀ɛ́, di bɑ́ɑ́ ò kpɑnnɛ̀.

17 Kɛ̀ Oduti ntṹṹ nkɛ dɛ́ɛ́ nkɛ́tuɔkɛnɛ̀ kuyuoku, kɛ́puotí kɛ́píɛ ntɛyɑ̀ɑ̀tɛ̀, 18 kɛ́tɔ kɛ́kònnɛ̀ kɛ́bɛnkɛ o cɔ̀kù, kóò duɔ́nnɛ̀ tidiitì ò do di kɛ́súɔ́ ntì. 19 Kòo cɔ̀kùu ò bekɛ kɛ dɔ̀: A dɛ̀rí we mpɑku yíe? A pĩ ndɛ mutɔ̃mmú? Ti Yiɛ̀ nKuyie ndɔɔ̀ mɛsɑ̀ɑ̀ nwèè dɑ cɔutɛ́.

Kɛ̀ Odutii ò nɑ̀kɛ́ dɛ̀ɛ̀ dɔ̀ɔ̀, kɛ dɔ̀ ò dɛ̀rí wèè pɑku o yètìrì tu Boɑsi. 20 Kɛ̀ Nɑomii dɔ̀: M bɑntɛ́ kɛ dò nti Yiɛ̀ nKuyie nkuù ti dɔ̀ɔ̀ mɛsɑ̀ɑ̀ nkù do mɛ dɔ̀ɔ̀mɛ̀ bɛ̀ɛ̀ ku, kùu dɔɔ̀ mɛsɑ̀ɑ̀ ndɛ kóo nìtì. Kɛ yíɛ́ bɛ́i nkɛ dɔ̀: Boɑsi tu tinɑɑ̀mùnkù kɔbɛ kóò mɔù nwe wèè dò nkɛ́ndɑkɛ ti kpɛ́í.

21 Kɛ̀ Oduti dɔ̀: Ò bɛ́immu kɛ tú nní mbonɛ̀ o tɔ̃mbɛ̀ kɛ dɛ́ɛ́ nkɛ bɛ̀ yɑ̀ɑ deènɛ̀ mudidɛ̀ì.

22 Kɛ̀ Nɑomii dɔ̀: Mbonɛ̀ Boɑsi tɔ̃mbɛ̀, ɑ bɑ́ɑ́ kɔtɛ kupɑku tɛkù mɑkù, bɛ̀ yɑ̀ɑ̀ bo dɑ kpɑnnɛ̀.

23 Kɛ̀ Oduti nkũɔ̃tìnɛ̀ Boɑsi nitipotɔ̃mbɛ̀ kɛ dɛ́ɛ́ nkɛ yɑ̀ɑ deènɛ̀ tidiitì ketitì nɛ̀ tidɛ́rítì, kɛ bɑɑ bonɛ̀ o cɔ̀kù.