YƐSÃÃ.
10.
Dɛ̀ yĩ́mɛ n Yiɛ̀ nKuyie nkɑ̀ɑ dɛ́tɛ́? Dɛ̀ dòmmɛ kɑ̀ɑ sɔ̀ri mɛyɛǹcɑɑ̀rìmɛ̀ mɔ̀nnì? 
Bɛnitidɔnnibɛ̀ mɔ̀kɛ sipɔɔ nsi, kɛ fɛ̃́ũnko bɛcĩ̀rìbɛ̀, kɛ̀ bɛ dɔɔ̀rìmɛ̀ bɛ̀ pĩĩ. 
Dɛ̀ ɔ̃ nnɑɑtimu onitiyɛiwe ò dɔ́ kɛ́dɔɔ̀ tì kpɛ́í, kòò fìètɛ otɔù kpɛrɛ dɛ̀ nhò nɑɑti, kòò sɑ̃̀ɑ̃́ nKuyie. 
Onitiyɛiwe ɔ̃ nnɑ́ɑ́nnɛ̀ tɛpɔ̀tɛ̀ ntɛ kɛ tú: Kuyie nyí kpetì òmɔù, kù ketɛ́ kɛ́ í bo. Tiì bo o yɛ̀mmɛ̀ sɑ̃́ɑ̃̀. 
Ò dɔ̀ɔ̀ri dɛ̀ yíémmu sɑ̃́ɑ̃̀, ò í bɑnní Kuyie mbeéntì, ò ɑúmmu o dootitɔbɛ̀ bɛmɔu. 
Kòò nɑ̀ɑ́ nho yɛ̀mmɛ̀ miɛkɛ kɛ tú: N yí doti bìtì, mɛyɛi nyí yó n yɑ̀ bìtì bìtì! 
Kòo nùù mɔ̀kɛ tinɑ́ɑǹsĩ̀ntì, siyɑ́ɑ̀bìsí nɛ̀ mɛciìmmɛ̀, kòo nɑ́ɑǹtì tu tiyɛiti ò í nɑ́ɑ́ ntimɔ́mmɔnti. 
Ò ɔ̃ɔ̃ okɛ dihɛì tɑkɛ́ nkɛ, kɛ́kuɔ wèè í cɑ̀ɑ̀rɛ̀ mùmɑmù disɔ̀rì kɛ ɔ̃ ntṹṹ nkɛ pɑkɛ́ ocĩ̀rì. 
Ò ɔ̃ nhokɛ kutúúkù nku, mɛdɛ́timɛ̀ dicìrícìrì kɔ̃mɛ, kɛ pɑkɛ́ ocĩ̀rì, kóò kpɑ̀ɑ̀kɛ kɛ́tɑnnɛ́ ticùɔ̀tì miɛkɛ. 
Ò ɔ̃ɔ̃ kúkúmu, kɛ́bɑkɛ, kɛ́yɑ̃kɛ ocĩ̀rì. 
Kòo yɛ̀mmɛ̀ dò nKuyie nyɛ̃̀ nho kpɛti, kɛ dò nkù í dɑkɛ o kpɛti ĩ́nkɛ̀, kɛ dò nkù í wúó nhò dɔ̀ɔ̀ri dɛ̀. 
Kuyie, nyítɛ́ kɛ́cómmú, Kuyie, nyoutɛ ɑ nɔ̀ùtɛ̀! Bɑ́ɑ́ yɛ̃̀ mbɛcĩ̀rìbɛ̀ kpɛ́í. 
Dɛ̀ yĩ́mɛ kòo yɛiwe dɑ dɑú, kɛ tú ɑ í yóó ò kpetínnɛ́? 
A wúómmu ocĩ̀rì ɑ́ɑ̀rìmɛ̀ kɛ fɛ̃́ṹrì, fɔ̃́ɔ̃̀ ò kómmú. Ocĩ̀rì duɔ́ nfɔ̃́ nwe omɑ́ɑ̀, fɔ̃́ɔ̃̀ dɑ̀kɛ dɛciribirɛ kpɛ́í. 
Pɔntɛ oyɛiwe wɛ̃rímú, yietí we o yɛi, dɛitɛ we ɑ ììkɛ̀. 
Ti Yiɛ̀ nKuyie nfɔ̃́ɔ̃̀ tu okpɑ̀ɑ̀tì sɑ̃́ɑ̃̀, bɛ̀ɛ̀ í dɑ yɛ̃́ bɛ̀ í yó nkpɑɑ́ ɑ ɛì. 
A kemmumu bɛcĩ̀rìbɛ̀ dɔ́ tì, kɛ nɑ́ríkùnko bɛ yɛ̀mmɛ̀, kɛ yo bɛ̀ tu mù. 
Kɛ kommu iciribí nɛ̀ bɛ̀ fɛ̃́ũnko wè, kɛ̀ dɛ̀ bo yie nkòo nìtì bɑ́ ndɔɔrinɛ̀ otɔù muwɛ̃rímú.