Yɛkotinɔ̀.
6.
M birɛ, kɑ̀ɑ bɛ́i nkɛ yĩ ɑ bo yietí ɑ kou bɑ̀nnì kɛ potɛ́ ɑ nɔ̀ùtɛ̀ kɛtenkɛ̀, 
kɑ̀ɑ fìtɛ́ ɑ nùù kɛ tɑnnɛ́ ɑmɑ́ɑ̀ tinɑ́ɑǹtì miɛkɛ. 
Kɑ̀ɑ mɛ̀ dɔ̀ɔ̀ fɔ̃́ɔ̃̀ tiekɛ dibɑ̀nnì. Kɔtɛ kóò bɑ̀ńtɛ̀ mɛcɑ̃ɑ̃ nkòò dɑ yóu. 
Bɑ́ ntú ɑ bo om̀pɛ̀, bɑ́ɑ́ yóu kɛ̀ inuɔ ndɑ pĩ́. 
Dennɛ ɑmɑ́ɑ̀ tɛyúɔ́tɛ̀ ɔ̃ɔ̃ yentɛ́nɛ̀mɛ̀ opɑɑwɑɑ̀, tɛnɔ̀tɛ̀ ɔ̃ɔ̃ yentɛ́nɛ̀mɛ̀ ticùɔ̀tì. 
Fɔ̃́ nhotɔ̃nnɛ́kótì, kɔtɛ sikɛ̃ṹ borɛ̀ kɛ́yɑ̀ sì dɔ̀ɔ̀rimɛ̀ kɛ́pɛ́tɛ́ mɛciì. 
Sikɛ̃ṹ í mɔkɛ wèè sì bɑ̀ɑ, sì í mɔkɛ wèè sì bɛnkú mutɔ̃mmú, sì í mɔkɛ okpɑ̀ɑ̀tì, 
kɛ nɛ́ ɔ̃ɔ̃ wɑɑ́ nsi diitì dididɛ̀ì mɔ̀nnì kɛ bo nyo. 
Fɔ̃́ nhotɔ̃nnɛ́dékótì ɑ yó nduɔ́ kɛ́ítɛ́ ɔ̃̀mmɔ̀nnì? A yóó entɛ ɔ̃̀mmɔ̀nnì? 
A yóó yĩ́ m bo duɔ́ sɑ́m̀pɔ́ nwe kɛ́ṹṹ nsɑ́m̀pɔ́, kɛ́om̀pɛ̀ sɑ́m̀pɔ́. 
A bo n yóó dɑɑtɛ kɛ̀ tidɑwɑntì dɑ ĩkú, kɛ̀ mɛsémmɛ̀ dɑ pĩ nhoyúókù kɔ̃mɛ. 
Wèè cèntì kɛ poti siyɑ́ɑ̀bìsí ò tu osĩ́ntɛ́nìtì nwe. 
Kɛ ɔ̃ nkɑ̃míí inuɔ nkɛ nɑ́ɑ́nnɛ̀ o nɑɑ̀cɛ̀i kɛ fietì inɔ́mbí, 
kɛ dɔ́ mɛyɛi nkɛ mɛ̀ wɑnti sɑ̃́ɑ̃̀, kɛ ce nyɛkpɑ̀rɛ̀. 
Dɛɛ̀ te kɛ̀ mɛyɛi nhɔ̃ɔ̃ ò do dimɔ̀nnì dimɑ́ɑ̀, kóò potɛ́ bɑ́ ò bɑ́ɑ́ nɑ kɛ́yentɛ́ bìtì! 
Dɛnɛnnɛ̀ bo dɛ̀kuɔ̀ ndi Kuyie nyí dɔ́ dɛ̀, dɛ̀yiekɛ̀ ndi ketíkɛ kù í dɔ́ kɛ́yɑ̀ dɛ̀ fɛnɔ̀nfɛ̀, dɛɛ̀ tu: Tɛpɔ̀tɛ̀, siyɑ́ɑ̀bìsí, ɑ bo sɔ̃́ntɛ́mɛ̀ kɛ́kuɔ onìtì, iyɛntotí yɛiyi, wèè cɑ̃ɑ̃ mɛyɛi mmudɔɔ̀rìmù, ɑ bo nsoúmmɛ̀ kɛ nɑ́ɑ́ nhɑ í yɑ̀ dɛ̀, nɛ̀ ɑ bo ncemmɛ̀ yɛkpɑ̀rɛ̀ ɑ tebìí cuokɛ̀. 
M birɛ, nyo ɑ cicɛ dɑ nɑ́ɑ́ ntì, bɑ́ɑ́ yetɛ ɑ yɔ̃ tié. 
Ãnnɛ́ i ɑ yɛ̀mmɛ̀ miɛkɛ, kɛ́ nyì dùúkú ɑ fɔ̃̀níí kusɑ̃rìkù kɔ̃mɛ. 
Iì yó ndɑ ni ɑ cèmmu, kɛ́ ndɑ bɑɑ ɑ duɔ́ dɛ̀, kɑ̀ɑ èntɛ ì ndɑ nɑ́ɑ́nnɛ̀. 
A cicɛ nɛ̀ ɑ yɔ̃, bɛ tié ndò nfìtírɛ̀ ndɛ, kɛ tú kuwenniku, bɛ̀ dɑ kpɑnnɛ̀ kɛ dɑ bɛnkú mufòmmu cɛ nku. 
Iì yó ndɑ kɑ̃nkɛ́ onitipòkù wèè dɔuti dɔutinɛ̀ bɛnitidɑɑbɛ̀ nɛ̀ otɔù pokù nùnɑɑtí. 
A bɑ́ nyɑ́ɑ́ ndɛ kóo nitipòkù botí o wenniku kpɛ́í, bɑ́ɑ́ yie nkòò dɑ soutɛ́ nɛ̀ o nuɔ. 
Onitipòkù wèè dɔù í bo kòò dɔuti dɔutinɛ̀ bɛnitidɑɑbɛ̀ o borɛ̀ ɑ kpɛrɛ ɔ̃ɔ̃ yɛ̀ sɑ́m̀pɔ́ nwe, wèè mɔ̀kɛ o dɔù kòò tɔ̀kɛ́nɛ̀ ò bo níntɛ́mɛ̀ ɑ fòmmu. 
Òmɔù bo ɑ̃nnɛ́ muhɑ̃ɑ̃́ nho yɑɑ̀yɔ̀rɛ̀ miɛkɛ kòo yɑ̀ɑ̀tì bɑ́ɑ́ cɔ́útɑ́ɑ̀? 
Onìtì bo nɑ kɛ́nkérí muhɑ̃ɑ̃́ miɛkɛ kɛ bɑ́ɑ́ cɔ́útɑ́ɑ̀? 
Mɛɛ̀ botí nku ɑ bɑ́ɑ́ nɑ kɛ́kɑ́ɑ́kɛ́ ɑ kou pokù kɛ̀ bɛ̀ dɑ yóu. 
Bɛ̀ ɔ̃ɔ̃ í ncĩ̀ɛ̃́ nwèè yùúkú kɛ bo kuɔ dikònnì dɔ̀mmɛ̀. 
Kɛ̀ bɛ̀ ò yɑ̀ ò ɔ̃ɔ̃ yietí kucɛ mɛ̀yiekɛ̀ ndi, kɛ́duɔ́ nho kpɛrɛ dɛmɔu ò mɔ̀kɛ dɛ̀ o cĩ́ɛ̃̀tɛ̀. 
Wèè mɛ nduɔ́nɛ̀ otɔù pokù ò tu kuyɛìnkù nku, kɛ cɑ̀ɑ̀rɛ̀ o fòmmu. 
Bɛ̀ ɔ̃ɔ̃ ò puotímu kóo fɛ̀ìkùnnɛ bɑ́ dɛ kó ifɛi bɑ́ɑ́ deè. 
Dɛ̀ ɔ̃ɔ̃ yonkɛ o dɔù nwe kòo miɛkɛɛ pɛikɛ kòò mpɛiri bɑ́ mmɛsémmɛ̀ bɑ́ɑ́ ò pĩ. 
Ò ɔ̃ɔ̃ í ndɔ́ tiyeti mɑtì, bɑ́ kɛ̀ di dɔ́ dí ò cu kɛ̀ dɛ̀ nsũ ò bɑ́ɑ́ yie.